Read Tobelo O KOKOANO MADODIHIRAKA 19 Bible Online

O KOKOANO MADODIHIRAKA 19 - Tobelo bible

O KOKOANO MADODIHIRAKA 19

¹Ma Koano Ahab womï ade-ade ngoi hekatika o ngo Izebel, mata-mata o Elia Sarakiaö o Elia wätoma mata-mata o Baal ma nabiika,

²Daha ongo Izebel mohidingoto o abari nenanga o Eliaika, ”Tanu o gikiri-gikiri ihi hukumu, ikali ihi toma ngohi, nako i yarehe maöraha hokä hoko nënanga ngohi toni hidiaiua ngona hokä ngona nä hidiai o Baal ma nabi-nabi gënanga.”

³O Elia idadi wohawana, daha woara hupaya mitomaua. Unanga wöiki de wilöleleani o Bersyebaika o Yehuda madaeraoka. Dokengoka ünanga wimal̄a wilöleleani gënanga,

⁴ daha woma dagi o tonaka makokakahaika o wange moi madekana de woma togumu o gota moi ma hokä irubu-rubu matimi uku. Genangoka ünanga wogogeruku de woigo hupaya wohonenge dika. ”Ngohi tatahanokauaoli, Jou,” wato ma Jouika. ”Na l̄ë tongohi ahi nyawa. Ngohi iholoiua yaoa ngaro de tongohi ahi ete de ahi tohora!”

⁵Daha ünanga woma rubaiha o gota matimiuku gënanga de ai gogioko. Itodokanino o malaekat womatengo wigiwi de witemo, ”Elia, nomomiki, nol̄omo!”

⁶O Elia ai lako kaiwi kiloliti, daha wamake ai häekiha i tigioka o roti iharo-harongo o dobiki moi de o kendi madol̄a o akere. Unangö wol̄omo de wokere, daha woma rubaokali.

⁷Ihigali mahinotoka ma Jou Ai malaekat iboa iwi giwi de iwi temo, ”No momiki, Elia, nol̄omo, hupaya ngona nakunu no kuata nomä dagi ngaro magurutika.”

⁸O Elia womomiki, daha wol̄omo de wokere. Daha ünanga idadi wokuata de wakunu womä dagi o wange moruata madekana o Sinai mal̄okuika, mangï ma Jou Madutu womahi nyata Ai diri.

⁹Dokengoka o Elia woma idu o aruku magoronaka. Daha ma Jou witemo unangika, ”Elia, okia nodiai ngona nenangoka?”

¹⁰ O Elia wohaluhu, ”Ya Jou, o Jou Madutu Noko Kuaha, ngohi salalu tomanarama duga-duga mangale Ngona mahirete. Mä o Israeloka manyawa yatilakuru toönanga manga jaji dede Ngona. Onanga yakilianga ini huba-huba mangï de yätoma ani nabi-nabi. Duga-duga ngohi mahirete togö gogere, de öraha nënanga önanga yomau ihi toma ngohi!”

¹¹”Nohupu o arukino gënanga,” ma Jou witemo unangika, ”deʼ noma okoino nohihimanga Ngohi ol̄oku mal̄okuoka.” Daha ma Jou wakaino genangino, ihihiraino o hidal̄oko duru ikua-kuata iwuwu, hiädono o doporono-o doporono ibela-belaka de ol̄oku-ol̄oku mahelewo iwedere. Mä ma Jou womahi nyataua Ai diri o hidal̄oko gënanga magoronaka. O hidal̄oko gënanga iridoka, idadi o ohu, maʼ o ohuö gënanga magoronaka ma Jou womahi nyataua Ai diri.

¹²Ipaha o uku iboa, mä ma Jouö koiwiwa o uku gënanga magoronaka. Iböto gënanga maöraha idadi kai ridika, daha wo ihene moi o ilingi mai teteke yabole-boleil̄e.

¹³Maöraha o Elia woihene o ilingi gënanga, ünanga watamunu ai biono de ai juba, daha wohupu de woma okoino o aruku ma uruoka gënanga. Daha woihene o ilingi itemo, ”Elia, okia nodiai ngona nenangoka?”

¹⁴O Elia wohaluhu, ”Ya Jou, o Jou Madutu Noko Kuaha, ngohi salalu tomanarama duga-duga mangale Ngona mahirete. Mä o Israeloka yatilakuru toönanga manga jaji dede Ngona. Önanga yakilianga ini huba-huba mangï de yätoma ani nabi-nabi. Duga-duga ngohi mahirete togogogere, de öraha nënanga önanga yomau i hi toma ngohi!”

¹⁵ Ma Jou witemo, ”No maidulu o tonaka makokakahaika o Damsyikika itigioka! Daha nöiki o kotaika de o minya nihi tuagi o Hazael ai häeke mal̄okuku hokä manonako iwi goraka wodadi o Siria manga koano.

¹⁶ Nodiai hoko genangoli o Yehuika o Nimsi aingohaka, hupaya ünanga o Israeloka manga koano, de o Elisaika o Safat ai ngohaka o Abel-Meholaino, hupaya ünanga wodadi nabi woni tagali ngona.

¹⁷O nagona dika wätomaua o Hazael, aha watoma o Yehu, de önanga yo ö ota-otana o Yehuino, aha wä toma o Elisa.

¹⁸ Mä o nyawa yaribuhu tumidi o Israelokak aha tahi halamati, enagënanga hagala o nyawa kahirahi yo setia Ngohino deʼ komaiwahi yatilabuku yahuba o Baal madulada ekola yä ame.”

¹⁹Daha o Elia woma jobo de wimake o Elisa magogiria wopajeko. Naga o hapi o habi ngimoi de hinoto ai himangoka de o Elisa mahirete wopajeko de o hapi mahabi mabobahaka. Maöraha o Elia wakaino o Elisa ai datekino, o Elia wahuputu ai juba de wihi parono o Elisa ai belekauku.

²⁰Daha o Elisa wamal̄a hagala ai hapi de woma popäta winïki o Elia, ikali wotemo, ”Nohihigumal̄a ngohi toma hidemo ihira tongohi ahi dimonika, ipaha ngohi aha toni nïki Bapa.” O Elia wohaluhu, ”Ika. Ngohi toni duhunua ngona.”

²¹O Elisa wolio ai dumuleika daha watoaka hagala ai hapi. Ai pajeko magota wapake o gota ihi dofo-dofo mangale ihi hakai hagala o hapi ma akeme gënanga. Ipaha ünanga wahikodoku o hapi ma akeme gënanga ainyawaika de önanga ya ol̄omo. Iböto gënanga o Elisa wöiki winïki o Elia de wodadi wirö riwo-riwo.