Read Tobelo O KOKOANO MADODIHIRAKA 2 Bible Online

O KOKOANO MADODIHIRAKA 2 - Tobelo bible

O KOKOANO MADODIHIRAKA 2

¹Maöraha ai ajali itigioka, o Daud wï ahoko o Salomo, ai ngohaka o nauru, de wihi döaka o behehongo-o behehongo mabobaha. O Daud wato,

²”Maöraha iböto ngohi tohonenge. Kokiani ngona nongaku de nobarani.

³Nadiai okia ma Jou ani Jou Madutu wonihipo paretaka ngonaika. Nohi ngounu o tita-o tita de Ai pareta-pareta mata-mata itö tuli-tulihi o Musa ai Buku magoronaka, hupaya okiaikaö ngona noiki ngona aha nohasili hagala ani hidailako magoronaka.

⁴Nako ngona de ani hingounu ma Jouika, Unanga aha wohi totomo Ai jaji ahi difauku aha yäpareta o Israeloka, iti önanga de manga hininga magahumu de manga jiwa magahumu salalu yosetia ihi ngounu Ai tita.

⁵ Naga o hali moioli! Ngona maraioka nohininga okia o Yoab wadö diaioka ngohino de wä toma o Israeloka manga tentara manga baluhu yahinoto, enagënanga o Abner o Ner aingohaka de o Amasa o Yeter aingohaka. Unanga wätoma önanga o dame maorahoka, mangale wabalahi o doma önanga yadodiai o parangi maorahoka. Unanga wätoma o nyawa koö iwa-iwa manga howono, mä öraha nënanga ngohi kokiani tatagongo ai manarama de ngohi tatagongo o huha de o hangihara.

⁶Aa, ahi ngohaka, ngona kiani nodiai unangika ima moteke okia napulono yaoa; duga-duga uha nimal̄aika ünanga wohonenge de madodagi kabiaha.

⁷ Mä o Barzilai o Gileadino ai ngoha-ngohaka o naurika kokiani ngona nadiai yaoa-oa. Ngona kiani natagongo toönanga manga paralu o wange mahi getongo, önanga yodiaioka o oa-oa ngohino maöraha ngohi tohi oara ahi diri ani riakino, o Absalom.

⁸ Yakorona o Simei o Gera aingohaka o Bahurim ma kotaino o Benyamin madaeraoka, nagaö ahi behehongo ngonaika. Ahi dodagi magoronaka o Mahanaimika, o Simei gënanga mahira wohihilai ngohi de mahayanga koiwa. Mä ipaha maöraha ünanga wohï buhuku ngohi o Yordan ma Ngairoka, ngohi tokobotoka unangika de ma Jou, ngohi aha titomaua.

⁹Mä nënanga ahi behehongo ngonaika: uha nimal̄aika ünanga wobebasi de o hukumanga. Ngohi tohi öriki ngona nobarija; hoʼ, ngaroka ünanga iwi perekioka, nohi dailako hupaya ünanga nihukumu wohonenge.”

¹⁰Ipaha o Daud wohonenge de iwi jere o Daud ai kotaka.

¹¹ Unanga wodadi o Israeloka manga koano o taongo moruata madekana: o taongo tumidi ünanga wogogere o Hebronoka, de o taongo moruange de hange o Yerusalemoka.

¹² Ipaha o Salomo wodadi o koano witagali o Daud, ai Ama. O Salomo ai kuaha hokä o koano duru i kua-kuata.

¹³O wange moiuku, o Adonia woiki o ngo Batsyebaika. O ngo Batsyeba mileha o Adoniaika, ”Boteka ani boa nohï lega nënanga de madungutu yaoa-oa?” ”Ia,” o Adonia wohaluhu.

¹⁴Daha ünanga wödogo, ”Naga okianaga moi ngohi toigo togahoko ngonaika Ayo.” ”Okia?” o ngo Batsyeba mileha.

¹⁵O Adonia wohaluhu, ”Ayo nohi öriki ngohi kokiani todadi o koano; gënanga yonganonoka o Israeloka yongodumu. Mä de idadi ganga i iduloka; ahi dodoto wodadi o koano, karana ma Jou womau hoko gënanga.

¹⁶”Oraha nënanga naga moi tongohi ahi gogahoko, tanu ayo uha natila.”

¹⁷ ”Okia ani gogahoko?” o ngo Batsyeba mïleha. O Adonia wohaluhu, ”Ngohi togahoko ayo nomau nogahoko ma Koano Salomoika mangale wohihi gumal̄a ngohi tomi kawingi, o ngo Abisag, o Sunem mamoholehe gënanga. Ngohi tongaku o Salomo aha watilaua ayo ani gogahoko.”

¹⁸”Ia, kayaoa,” o ngo Batsyeba mohaluhu. ”Ngohi aha tohi ade-ade o hali gënanga de ma koano mangale ngona.”

¹⁹Daha o ngo Batsyeba moiki ma koanoika deʼ madungutu mohi ade-ade o hali gënanga mangale o Adonia. Ma koano womaoko womi tarima ngoi ayo deʼ womi huba munangika, daha wogogerokali aipareta makuruhi mal̄okuoka. Ipaha ünanga wä huloko o nyawa imi sadia o kuruhi mangale ngoi ayo ai nirakoka.

²⁰Mogogerukuoka, o ngo Batsyeba motemo, ”Ngoni ayo toigo togahoko okianaga moi mai teteke dika ngonaika. Ngoni ayo tonganono ngona aha natilaua.” ”Okia gënanga, ayo?” o Salomo womi leha. ”Ngohi aha tatilaua.”

²¹O ngo Batsyeba mohaluhu, ”Nihigumal̄a o Adonia, ani riaka gënanga womi kawingi o ngo Abisag.”

²²”Yadodoa ayo nogahoko o hali gënanga ngohino?” o Salomo womi leha. ”Genanga kaima tero dika de nogahoko hupaya ngohi tihi döaka o pareta makuruhi nënanga unangika. Koigoungua ünanga tongohi ahi riaka? Ikali ma Imam Abyatar de o Yoab iwi hiboa ünanga!”

²³Wotemo hoko gënanga iböto, o Salomo wokoboto de ma Jou, ”Mal̄aika ngohi ihi korona ma Jou Ai lolai, nako tihukumua wohonenge o Adonia karana ai gogahoko gënanga!

²⁴Ma Jou wohi kuatoka tongohi ahi gogere, tongohi ahi ama o Daud aipareta makuruhioka. Ma Jou wohi totomoka Ai jaji de wohi döakoka o pareta nënanga ngohino de tongohi ahi gutiuku. Ngohi tokoboto de ma Jou wowango-wango, o Adonia aha wohonenge o wange nënanga dika!”

²⁵Daha ma Koano Salomo wihi döaka o pareta o Benayaika, daha o Benaya woiki witoma o Adonia.

²⁶ Ipaha ma Koano Salomo witemo ma Imam Abyatarika, ”Noiki ani berera madutuika o Anatotoka. Ngona kiani ini hukumu nohonenge, mä o wange nënanga ngohi aha toni tomaua, karana maöraha ngona kanima kokinïkohi de ahi ama, ngona nima nïki nia mao hagala ai huha de ai hangihara. De ngonaö napaliara ma Jou Ai Jaji ma Peti.”

²⁷ Daha o Salomo wi aikoka o Abyatar hokä o Imam. De o Salomo ai manarama gënanga okia ma Jou wotemo-temoka o Siloka mangale ma Imam Eli aidifauku idadi inyata.

²⁸O Yoab woihene mangale mata-mata idö dadadioka gënanga. Unanga idadi wohawana karana ünanga wihi boa o Adoniaino. Mä, mahira ünanga wihi boaua o Absalomino. Daha ünanga woara ma Jou Ai Tauika de womahi jo joika o huhuba mangï ma barene-barenika.

²⁹O abari nënanga ihi ädono ma Koano Salomoika. Daha ma koano wihuloko o Benaya witoma o Yoab.

³⁰O Benaya woiki ma Jou Ai Tauika de witemo o Yoabika, ”Ma koano wohuloko, ngona nohupu genangoka!” ”Kowali,” o Yoab wohaluhu. ”Ngohi tomau tohonenge nenangoka.” O Benaya woma idulu de wohi ngahu o hali gënanga ma koanoika.

³¹Woihene gënanga ma koano wato, ”Noiki de nadiai okia woto temo-temoka gënanga. Nitoma ünanga de nï lungunu ünanga, hupaya ngohi de ahi ama ai difauku ingodumu mia tagongokauaoli mabobaluhu mangale o doma wadodiai o Yoab o nyawa yahowo-howonikaua.

³²Ma Jou aha wihukumu ünanga karana o doma wadodiaioka ahi ama imahi öriki moiua. O Abner o Israeloka manga tentara ma baluhu, de o Amasa o Yehuda manga tentara mabaluhu, yahinotö yahowonua. ”Onanga iholoi yaoa ngaro de o Yoab mahirete, mä ünanga wätomaka önanga.

³³O hukumanga karana manga honenge o tentara manga baluhu yahinotö gënanga, aha watagongo o Yoab de aidifauku mangale kahi ado-adonika. Mä ahi ama aidifauku ingodumu yodadadi o koano, hoko genangika ma Jou aha wahi barakati — önanga aha youtumu.”

³⁴Daha o Benaya wöiki ma Jou Ai Tauika de witoma o Yoab genangoka. Daha o Yoab iwi jere ai tauoka o kota maporetoka.

³⁵Ipaha ma koano wïgoraka o Benaya wodadi o tentara yopo parangi manga kapita witagali o Yoab, de o Zadok wï goraka wodadi o Imam witagali o Abyatar.

³⁶Iböto gënanga ma koano wïahoko o Simei daha witemo unangika, ”Nodiai o tau mangale ani diri o Yerusalemoka nënanga. Nogogere genangoka de uha nohupu de o kota.

³⁷Nako ngona nobarani nohupu de noiki na tilakuru o Kidron ma Ngairi maiti, ngona kiani ini toma; de ngona mahirete natagongo o howono gënanga.”

³⁸”Kayaoa, Jou Koano nomo Mulia,” o Simei wohaluhu, ”Ngohi aha tamoteke Jou Koano ani pareta.” Daha o Simei wogogere o Yerusalemoka.

³⁹O taongo hange ipaha idadi o hali yanïkino nënanga: O Simei ai gilaongo yahinoto yoara o Gatika, ma Koano Akhisika o Maakha aingohaka o nauru. Maöraha o Simei iwihingahu mangale o hali gënanga, ünanga

⁴⁰wohinoa o gogogere mangï ai keledaioka daha woiki ma Koano Akhisika o Gatoka mangale wälingiri o gilaongo yahinotö gënanga. Unanga wämake önanga daha wä ao önanga wahigilio.

⁴¹Maöraha o Salomo woihene okia o Simei wadodiaioka,

⁴²ünanga wähuloko iwi ähoko o Simei daha witemo, ”Ngohi tonidiaioka ngona nojaji de ma Jou, ngona aha namal̄aua o Yerusalem. De ngohiö tonihi ngahuoka ngona maöraha okia ngona nohupu o Yerusalemino, ngona kiani nohonenge. Aa, koigoungua nojajioka de norimoi mangale nohi ngounu ahi pareta gënanga?

⁴³Maöraha nënanga yadodoa namotekokaua ani jaji gënanga deʼ natilakuru ahi pareta?

⁴⁴Ngona nako de madiai ani dorou mata-mata ahi amaika. Mangale gënanga ma Jou aha woni hukumu,

⁴⁵mä ngohi aha wohihi barakati de ahi ama aipareta aha wohi kuata hiädono kahi ado-adonika.”

⁴⁶Hoko gënanga wotemo iböto, ma koano wihi döaka o pareta o Benayaika daha o Benaya wöiki witoma o Simei. ”Oraha nënanga o Salomo wokuaha itö totomo aipareta magoronaka.