Read Tobelo O KOKOANO MADODIHIRAKA 20 Bible Online

O KOKOANO MADODIHIRAKA 20 - Tobelo bible

O KOKOANO MADODIHIRAKA 20

¹O wange moiuku o Benhadad, o Siria manga koano, wätoomu aitentara yongodumu, de ima kinïki o koano mahomoa yamoruange de yahinoto de manga kureta ihi poparangi, de toönanga manga kuda, ünanga wahi gororomo de waparangi o Samaria makota.

²Daha ünanga wähuloko o nyawa o Ahabika, o Israeloka manga koano, o kotaka gënanga de o behehongo nënanga,

³”Ma Koano Benhadad wogahoko hupaya ngona nohilapahi unangika o gurasi, o haaka, ani heka-hekata, ani ngoha-ngohaka yo poputurungu.”

⁴O Ahab wohaluhu, ”Ma Jou Koano Benhadadika nihi ngahu ngohi tomodeke. Unanga yakunu wohi paretaino ngohi de hagala moi-moi tongohi.”

⁵Ipaha hagala yahulo-huloko gënanga yoliooli o Ahabika mangale ihiädono ai gogahoko mahomoa o Benhadadino. Hoko nënanga ai gogahoko gënanga mabetongo, ”Ma hira tongomi mia koano wogahoko hupaya ngona nohilapahi unangika o gurasi de o haaka ikali ani heka-hekata de ani ngoha-ngohaka yokua-kuata.

⁶Mäöraha nënanga ünanga aha wähuloko aitentara manga balu-baluhu mangale yatailako ani kadato de ani pegawe-pegawe manga tau, ikali yal̄ë okia dika önanga yapulono de ma ija-ijaka. Önanga aha yoboa nenangino iyarehe maöraha hoko nënanga.”

⁷Daha ma Koano Ahab wä ahoko o Israeloka manga tutuda mata-mata de wätemo, ”Ngini mahirete nihakihi o nyawa nënanga woigo wona hibodito ngone. Unanga wogahoko hupaya ngohi tä hilapahi ahi heka-hekata de ahi ngoha-ngohaka ikali ahi gurasi de ahi haaka, de ngohi tatilaua ai gogahoko gënanga.”

⁸O tutuda-tutuda de o kawaha yotemo, ”Uha ni legaika ünanga, Jou Koano! Uha namoteke ai mau.”

⁹Karana gënanga o Ahab wäbaluhu o Benhadad ai huhuloko-huholoko gënanga hoko nënanga, ”Nihi ngahu ma Jou Koanoika, nia koano gënanga ai gogahoko madodihiraka ngohi tohi moteke, maʼ ai gogahoko mahinoto nënanga tohi motekua.” Daha o huhuloko-o huhuloko yöiki, ipaha ima iduloli o Ahabika de yato,

¹⁰”Tongomi mia koano aha wahidingoto hoko gënanga manga ngoë o tentara mangale yawedere ani kota, hiädono ani kota ikokilianguku makafo gënanga yakunu önanga yatoraka yamata duga-duga de toönanga manga giama. Unanga wokoboto hupaya o gikiri-o gikiri iwi hukumu, i goungu iwi toma ünanga, nako wadiaiua o hali gënanga!”

¹¹Ma Koano Ahab wohaluhu, ”Nia hetongo ma Koano Benhadadika: O tentaraka madutu aha yamao manga hininga ilamoko o parangi ipahaino, mä ipaha inoua.”

¹²O Ahab ai bobaluhu gënanga ihiädono o Benhadadika maöraha ünanga ima kinïki o kokoano mahomoa yodadi ai dodiawo magogiria ima hikokere toönanga manga tau-tau magoronaka. Yo ihene gënanga o Benhadad wä pareta aitentara manga balu-baluhu mangale ima hidiai yaparangi o Samaria makota. Daha onangö imahidiai.

¹³Öraha gënanga, o nabi womatengo wöiki ma Koano Ahabika de witemo, ”Ma Jou wotemo: ’Namake o tentara yowoë-woë gënanga? Ngohi aha toni hidöaka o utumu ngonaika mangale önanga o wange nënanga. Ngona aha nohi öriki Ngohi ma Jou.’ ”

¹⁴”O nagona kokiani iholoi ihira yoparangi?” O Ahab wo leha. O nabi gënanga wohaluhu, ”Hagala o tentara yogö gö, yanö niniïki o Bupati-bupati. Hoko gënanga ma Jou wato.” ”Deʼ o nagona kokiani yä tuda o parangi gënanga?” ma koano wolehali. ”Jou Koano mahirete,” ma nabi gënanga wohaluhu.

¹⁵Dahaö ma koano watoomu o tentaraoka yogö gö, yanö ninïki o Bupati-bupati. Mata-mata naga o tentara yaratuhu hinoto de yamoruange deʼ hinoto. Ipaha ünanga wadiai kaima tero de o Israeloka, manga tentara. Naga mata-mata yaribuhu tumidi.

¹⁶Yaparangi yomulaenge o wangeoka maöraha o Benhadad de o koano yamoruange de yahinoto yodadi ai dodiawo gënanga ma gogiria imahi kokere hiädono yadaluku toönanga manga tau-tau magoronaka.

¹⁷Yotagi iholoi yohiraika ganga o tentaraoka yogö gö gënanga. Hagala o nyawa wahö hulo-huloko o Benhadad mangale yoto tailako manga haturu, ihi ngahu o Benhadadika o tentara o doomu moi magogiria yangino önanga o Samaria de yaino.

¹⁸O Benhadad wahi pareta hupaya manga haturu manga tentara gënanga yätagoko kamanga ngango, haduliua boteka önanga yo boa mangale ima teke parangi ekola mangale imaka dame.

¹⁹O tentaraoka yogö gö gënanga ma Koano Ahab watoomu mulaenge ima jobo o Samaria makota de yaino, yanïkino o Israeloka manga tentara.

²⁰Önanga moi-moi yätoma manga haturu yahö hima-himanga. Hagala o Siria manyawa yopiringana, o Israeloka manyawa yaginïki. Mä o Benhadad wo otana. Unanga wohi oara ai diri de o kuda ima kinïki o tentara yamuruono naga o kudauku yo bare-barene.

²¹Ma Koano Ahabö wonïki o parangi mangïika daha wawedere o kureta-o kureta ihipoparangi de watoma manga kuda. O wange gënanga o Siria manyawa yamao yohihanga kohä amoko.

²²Ipaha ma nabi gënanga waika o Ahabika deʼ witemo, ”Öraha nënanga, kayaoa Tuanga nolio de nakuata ani diri ikali nadiai o datoro na oha-ohaka, karana o Siria manga Koano aha woboa woparangioli maöraha mulaenge ihiwara yanïkino.”

²³Ma Koano Benhadad aitentara manga balu-baluhu iwi temo o Benhadadika, ”O Israeloka manyawa yahö huba-huba o gomanga ikuaha ol̄oku mabuturungoka, gënanga hababu o hoana gënanga yakunu ina hihanga ngone. Mä ngone maraioka yakunu hähihanga önanga nako ngone haparangi o tonaka irata-rataikaoka.

²⁴Kayaoa öraha nënanga Jou Koano natagali o koano yamoruange de yahinoto gënanga deʼ Jou Koano mahirete ani tentara manga balu-baluhu.

²⁵Ipaha kokiani Jou Koano natoomu o tentara manga duduono kaima daene manga ngoë Jou Koano ani tentara manga duduono yohohï hihangoka gënanga, ima kinïki o kuda de o kureta ihi poparangi kaima daene mangoë de mahira. Ngone aha haparangi o Israeloka manyawa gënanga o tonaka irata-rata ikaka, de mamoi nënanga maraioka ngone houtumu.” Ma Koano Benhadad wohi goungu, daha wamoteke aitentara manga balu-baluhu gënanga manga nasihati.

²⁶Maöraha ihiwara mulaenge yaino ünanga wätoomu aitentara de ima jobo o Afek makotaika mangale yaparangi o Israeloka manyawa.

²⁷O Israeloka manyawaö manga tentara yadongodumu manga daë de yatoomu önanga. Daha o Israeloka manga tentara gënanga yotagi imä jobo o duduono hinoto magoronaka de imä tau ima teke rihimangino de hagala o Siria manyawa gënanga. Hohitotero de o Siria manga tentara yodogerewoto ma amokika ya ömanga o daera gënanga, o Israeloka manga duduono ha pulo-pulono hokä o kabingi o tika hinoto dika.

²⁸Daha ma nabi womatengo woboa ma Koano Ahabika de wato, ”Nenanga wotö temo-temoka ma Jou: ’Karana o Siria manyawa gënanga yatobote Ngohi tokuaha duga-duga o l̄oku ma buturungaka de i rata-rataikaua, daha Ngohi aha tonïhi döaka o utumu ngonaika mangale toönanga manga tentara kabiahaua manga ngoë gënanga. Ngona de ani kawaha aha ihi öriki Ngohila ma Jou.’ ”

²⁹O wange tumidi madekana o Siria manyawa de o Israel manyawa kahirahi toönanga manga tau-tau magoronaka, kaima kokihimanga. O wange matumidoka önanga mulaenge yataiti manga parangi. O parangi gënanga magoronaka o Israeloka manyawa yätoma o Siria manyawa ya 100.000.

³⁰Hagala o nyawa yoö ota-otana, yoara o Afek makotaika, maʼ o kota mabebeno o mehele gënanga ikilianga yabanga ya 27.000 önanga manga hidogoronaka. O Benhadadö wohi oara ai diri o kotaika gënanga de woma ngiunika o tau moioka dokä makamari magoronaka.

³¹Aitentara manga balu-baluhu yoboa unangika de iwi temo, ”O nyawa yato, o Israeloka manga kokoano ganga o kokoano de manga dora de manga hayangoka. Karana gënanga, nomi higumal̄a ngomi miwï himanga o Israeloka manga koano de mimahipake o ngoere o karongo hokä manonako mia doduba de o gumini mia tomaruku hokä manonako mimaike. Tanu ünanga woni tomaua Jou Koano.”

³²Daha onangö ima hipake o ngoëre o karongo de gumini toönanga manga tomaroka, daha yöiki iwi himanga o Ahab de yo temo, ”O Benhadad ganga Jou Koano ani gilaongo. Unanga wogahoko hupaya Jou Koano uha nitoma ünanga.” O Ahab wohaluhu, ”Kawowangohi ünanga, tongohi ahi riadodoto gënanga?”

³³Igoungu o Benhadad aitentara manga balu-baluhu gënanga magogiria yodamä o nonako maoa-oa o Ahabino. Hoʼ, maöraha o Ahab wotemo ”riadodoto”, önanga gila-gila yohaluhu, ”I tiai, o Benhadad ganga Jou Koano ani dodoto.” Daha o Ahab wato, ”Niwi ngotakino ünanga nenangino!” Maöraha o Benhadad womahiädono, o Ahab wiahoko ünanga wodoa o kuretail̄e.

³⁴Daha o Benhadad wotemo unangika, ”Ngohi aha tohi gilio Tuangika hagala o kota tongohi ahi ama waora-oraka ahi Tuanga ani amaino. Tuanga yakunö nohi goko ima daga-daganga matiti o Damsyik makotaka hokä ahi ama wadodiai o Samariaka.” O Ahab wohaluhu, ”Mangale de ani jaji Tuanga gënanga, ngohi aha toni hilapahi Tuanga.” Iböto gënanga o Ahab wodiai o jaji de o Benhadad daha wipidili ünanga.

³⁵Mangale ma Jou Ai pareta, ma nabi woma tengo o nabi manga doomu mahi dogoronaino iwi huloko manga dodiawo wigohara ünanga. Mä ai dodiawo gënanga woluku.

³⁶ Daha ma nabi gënanga wotemo, ”Karana ngona nohi ngounua ma Jou Ai pareta, ngona aha de majapatioka o singa ini goli nenangoka de nolio ipaha.” Itiai. Unanga wöiki genangoka de majapati ipaha, o singa o dutu moi iwi goli ünanga.

³⁷Ipaha ma nabi gënanga wöiki o nyawa ma homoaika de wotemo, ”Nihi gohara ngohi!” Done o nyawa gënanga wigohara duru kohagiria hiädono iwi l̄abo.

³⁸Iböto gënanga ma nabi gënanga wapakitoko ai biono de o ngoëre o dobiki moi, hupaya o nyawa iwi nakoua, daha ünanga wöiki woma okoino o ngekomo madatekoka mangale wotamä o Israeloka manga koano wakaino.

³⁹Maöraha ma koano wakaino, ma nabi gënanga wiböaka unangika, ”Jou Koano Nomo Mulia, maöraha ngohi magogiria to parangi o parangi mangïoka, o tentaraoka womatengo wiao ngohino o haturu womatengo iwi tago-tagokino. O tentaraka gënanga wato, ’Nï goana o nyawa nënanga nohidodiai. Nako ünanga woara, ngona kiani ini toma nitagali ünanga ekola no fangu o ribuhu hange o tiwi o haaka.’

⁴⁰Mä maduruino maöraha ngohi magogiria tongika-ngino, o nyawa gënanga wohi oara ai diri.” Ma koano wohäluhu, ”Ngona mahirete noma duputuhoka o hukumanga. Ngona kiani natagongo.”

⁴¹Ma nabi gënanga wahohe o ngöere wohi liko-likoko ai bionoko, daha ma koano winako ünanga hokä o nabi womatengo.

⁴²Daha ma nabi gënanga wïtemo ma koanoika, ”Nenangala ma Jou waheto-hetongoka: ’O nyawa tihi poparetaka hupaya nitoma, nimal̄aioka wootanoka. Karana gënanga ngona kiani nohonenge hokä ai dagali. Ani tentara aha yobinaha karana yä mal̄aikaoka manga haturu manga tentara ihi oara manga diri.’ ”

⁴³Ma koano wolio o Samariaika de ai hininga isanangua de wongamo.