Read Tobelo O KOKOANO MADODIHIRAKA 21 Bible Online

O KOKOANO MADODIHIRAKA 21 - Tobelo bible

O KOKOANO MADODIHIRAKA 21

¹Ma Koano Ahab ai kadato o Yizreeloka, naga o angguru ma dumule moi toma dutu ai romanga o Nabot.

²O wange moiuku o Ahab witemo o Nabotika, ”Nohihidöaka ani angguru madumule gënanga ngohino, hababu o dumule gënanga itigi de ahi kadato. Ngohi toigo todatomo o gau-gauku genangoka. Ngona aha namake o angguru madumule iholoi yaoa hokä madagali, ekola nako ngona nö modeke, ngohi aha ta ija de maija ipatutu.”

³O Nabot wohaluhu, ”O angguru madumule nënanga tongohi ahi ete de ahi tohora manga puhaka. De ma Jou Madutu, ngohi iyakunua tonihi döaka ngonaika Tuanga!”

⁴De ai hininga isanangua de wongamo karana woihene okia o Nabot wotö temo-temo unangika, o Ahab wolio daha woma rubaiha ai dangiroka de wohi niporika ai biono de woluku wol̄omo.

⁵O ngo Izebel ngoi hekata moiki unangika de mileha, ”Yadodoa ngona no sanangua? Yadodoa nöluku nol̄omo?”

⁶O Ahab wohaluhu, ”Ngohi tosanangua de o Nabot. Ngohi togahoko unangika hupaya ünanga wahukunu ai angguru madumule ngohino, ekola ngohi tohi tagali de o angguru madumule mahomoa, nako gënanga woigo, maʼ ünanga woluku!”

⁷”Ngonala no koano o Israeloka!” o ngo Izebel mohaluhu, ”Oraha nënanga nomomiki de nol̄omo. Nohisanangi ani hininga, hababu ngohi aha tohi döaka o Nabot ai angguru ma dumule gënanga ngonaika!”

⁸Daha o ngo Izebel motulihi o hurata mangale de o Ahab ai romanga de mogelenga o koano masapu o huratoka gënanga. O hurata gënanga mohidingoto o tutuda-o tutudaika de o kawaha manga balu-baluhu o Yizreeloka.

⁹Nenanga madol̄a o hurata gënanga, ”Nihi ngahu hupaya o kawaha yopuaha de nia huloko önanga ima toomu! O doomu gënanga magoronaka niwihi döaka o Nabotika o gogogere ihö horomati.

¹⁰Nia huloko o nyawa madorou yahinoto yogogere iwi himangika de iwi kalaki ünanga, ünanga walolaioka ma Jou Madutu de ma koano. Daha niwi ao ünanga o kota maporetika, de niwi kaweli ünanga de o helewo hiädono wohonenge!”

¹¹O ngo Izebel ami pareta gënanga yadiai o tutuda-tutuda de o Yizreel makawaha manga balu-baluhu.

¹²”Onanga ihi ngahu hupaya o kawaha yopuaha. Ipaha önanga yähuloko o nyawa ima toomu de o Nabot iwihi döaka o gogogere ihö horomati.

¹³O nyawa madorou yahinoto yogogere ima teke rihimangino de o Nabot, de o kawaha manga himangoka önanga iwi kalaki ünanga, ünanga walolaioka ma Jou Madutu de ma koano. Karana gënanga ünanga iwi ao o kota maporetika daha iwi kaweli de o helewo hiädono wohonenge.

¹⁴Ma abari mangale yadiai iwi toma o Nabot imi hiädono o ngo Izebelika.

¹⁵O ngo Izebel matarima o abari gënanga ibötino de ma japati munanga motemo o Ahabika. ”O Nabot wohonengoka. Oraha nënanga nöiki nal̄ë o angguru madumule gënanga woö olu-oluku wahukunu ngonaika.”

¹⁶O Ahab wöiki de ai japatioka de wal̄ë o angguru ma dumule gënanga idadi to ünanga madutu.

¹⁷Daha ma Jou wïtemo o Eliaika, o Tisbeino ma nabi gënanga,

¹⁸”O Ahab o Samaria manga koano gënanga öraha nënanga naga o Nabot ai angguru madumuleoka womau wa l̄ë o dumule gënanga idadi to ünanga madutu. Hoʼ, nöiki dokengika,

¹⁹deʼ nohiadono unangika Ngohi, ma Jou, Totemo hoko nënanga, ’Notomaka, naoraoli! Karana gënanga ani awunu aha o kaho ya al̄eme o Nabot ai awunu o kaho yaö al̄e-al̄eme ma ngïoka!ʼ ”

²⁰Maöraha o Ahab wimake o Elia, ünanga wotemo, ”Hei haturu, mabaha ngona nohimake ngohi!” ”Itiai,” o Elia wohaluhu. ”Karana Tuanga de ani dungutu nadiai itotorou ma Jou Ai lolegaka,

²¹daha ma Jou wotemo nënanga Tuangika, ’Ngohi aha to ni do tagao o bodito ngonauku. Ngona aha Tonihi kurutika, de o nau-nauru moi-moi ani tau manyawa magoronaka, yatö timono deʼ yogö gö, aha Tahö hihanga.

²²Ani tau manyawa aha yodadi hokä ma Koano Yerobeam o Nebat aingohaka ai tau manyawa de hokä ma Koano Baesa o Ahia aingohaka ai tau manyawa, karana ngona no diaioka o hababu o Israel manyawa yodiai o baradoha hiädono yamomiki Ahi gangamo.’

²³ De yakorona o ngo Izebel, ma Jou wotemo ani roëhe aha yaol̄omo o kaho o Yizreel makota magoronaka.

²⁴O nagona dika ani tau ma nyawaino yohonenge o kotaoka aha yaol̄omo o kaho, deʼ yohonenge o kota maporetoka aha ya ol̄omo o totaleo.”

²⁵Komaiwahi naga o nyawa manga dungutu yodiai itotorou ma Jou Ai lolegaka hokä wadodiai o Ahab. Mata-mata o dorou wadodiai gënanga mangale o ngo Izebel ngoi hekata, ami higaro.

²⁶O Ahab wadodiai o baradoha duru itotorou; ünanga wahuba o gomanga hokä yadodiai o Amori manyawa, enagënanga hagala o nyawa ma Jou waduhu-duhuoka yohupu o Kanaan ma bereraino maöraha o Israeloka manyawa yongohama o berera gënanga.

²⁷O Elia wotemo iböto ipahaino, o Ahab wakakihi ai pakeanga de womahi pake o ngoëre o karongo hokä manonako woma toduba, daha wopuaha. Maöraha woma iduö ünanga womahi gal̄oko o ngoëre o karongo, de nako wotagi ai biono kaihü huhaika.

²⁸Ma Jou wïtemo ma nabi Eliaika,

²⁹”Nimakeoka sarakia o Ahab woma hitipokouku ai diri Ahi himangoka? Karana gënanga, Ngohi aha tohi boaua o huha ma dekanino ünanga kawö wangohi. Maöraha ai ngohakika daha ngohi tohiboa o huha gënanga ai tau manyawauku.”