Read Tobelo O KOKOANO MADODIHIRAKA 3 Bible Online

O KOKOANO MADODIHIRAKA 3 - Tobelo bible

O KOKOANO MADODIHIRAKA 3

¹Ma Koano Salomo o Mesir wohidadi ai dodiawo de womi kawingi ma koano Mesir ngoi ora. Ma koano ngoi ora gënanga womi ao o Salomo o Daud ai kotaika, mangale mogögere genangoka hiädono ma koano ai kadato de ma Jou Ai Tau ikali mabebeno o mehele magilolitino o Yerusalem iböto ihi goko.

²Karana öraha gënanga ma Jou Ai Tau ihi goko uahi, o kawaha kaihi kubahi manga huhuba mangï irupa-rupaka.

³O Salomo wihininga ma Jou de wanïki o hidumutu-o hidumutu ai amaino, mä ünanga kawo toakohi de wohi huba o aiwani o ngï irupa.

⁴O puji mangï duru yanako magogere o Gibeonoka. Ma moi-ma moi o Salomo wohihuba o huhuba dokengoka. O wange moiuku, hokä biaha, ünanga woikoli dokengika.

⁵O hutu gënanga ma Jou womahi matoko Ai diri unangika o nanere magoronaka de wotemo, ”Salomo, nogahoko okia noigo-igo, gënanga aha To nihi döaka ngonaika!”

⁶O Salomo wohaluhu, ”Jou, ngona nohi dumutoka, Ngona duru nihininga ahi ama o Daud, Ani gilaongo gënanga. Unanga yaoa, worikoto ikali wosetia Ngonaika. De hokä mabalahi itogu-togumua Ngona kahirahi nihininga ünanga, Ngona nihi döaka unangika o ngohaka o nauru womatengo, öraha nënanga wopareta witagali ünanga.

⁷Ya Jou, ahi Jou Madutu, Ngona nohigoraka ngohi todadi o koano titagali ahi ama, ngaroka ngohi duru katoma gö ikahi de tanakoua sarakia madodagi topareta.

⁸Ngohi naga o hoana Nairi-irikoka yodadi Ani umati mahirete manga hidogoronaka. ”Onanga o hoana moi ma ago-agomo hakunua hä etongo manga ngoë.

⁹Hababu gënanga, Jou, tanu nohihi döaka ngohino o barija topoparalu mangale täpareta Ani umati nënanga de maadili de mangale yakunu tohili howono kiaka maoa de kiaka madorou. Nako hoko genangua, kiaka yakunu ngohi takunu täpareta Ani umati ma amoko nënanga?”

¹⁰Ma Jou wosanangi de o Salomo ai gogahoko gënanga,

¹¹de witemo unangika, ”Hababu ngona nogahoko o barija mangale nopareta de maadili, de koumurua magurutu ekola o kaya mangale ani diri mahirete ekola ani haturu-haturu yohonenge,

¹²done ani gogahoko gënanga aha Tohi totomo. Ngohi aha toni hidadi ngona iholoi nobarija de iholoi nosawaro ngaro de o nagona ö dika, yaoa maöraha ipaha-paha yaoa maöraha aha ibö boa-boa.

¹³Igoungu okia nogahokoka aha Tohi döakoli ngonaika: ani umuru magurutu ngona aha nokaya de ini horomati i holoi de ngaro o koano okiaka ö dika.

¹⁴De nako ngona, hokä ani ama o Daud, nohihi ngounu Ngohi ikali namoteke Ahi tita-tita, Ngohi aha tonihi döaka ngonaika o umuru magurutu.”

¹⁵Womomikino, o Salomo wamao ma Jou Madutu wi temo-temoka unangika o nanere magoronaka. Daha ünanga wolio o Yerusalemika daha womaoko ma Jou Ai Jaji ma peti mahimangoka de wohihuba o huhuba ituhu-tuhuku de o dame mahuhuba. Ipaha ünanga wodiai o rameanga mangale ai pegawe mata-mata.

¹⁶O wange moiuku, o ngoheka yahinoto o huhutu yani nïki yoböa iwi himanga ma Koano Salomo.

¹⁷Momatengo onangino mato, ”Jou Koano nomo Mulia, ngohi de o ngoheka nënanga migogere mima tau moi. Moiua mahomoa yogogere dede ngomi. ”Oraha muruono naga ipahaika, ngohi tongohaka o ngohaka o nauru womatengo. O wange hinoto ipaha o ngoheka nënangö mongohakoli o ngohaka o nauru womatengo.

¹⁹O hutu moiuku maöraha ngomi mima iduoka, o ngoheka nënanga mohangajaua mabänga ami ngohaka magil̄au hiädono ihonenge.

²⁰O hutu gorona ngohi katoma iduokahi, munanga momomiki daha mal̄ë tongohi ahi ngohaka magil̄au tongohi ahi datekoka. Tongohi ahi ngohaka magil̄au gënanga makelenga ami dangiroka, de ami ngohaka magil̄au ihö hone-honengoka gënanga makelengauku tongohi ahi dangiroka.

²¹Yarehe mangorumino, maörahangohi tomomiki de tomau tahuhu ahi ngohaka magil̄au gënanga, ngohi timake ünanga wohonengoka. Ngohi titotailako iböto, inyata ünanga tongohiua ahi ngohaka magil̄au.”

²²”No ëluku!” o ngoheka mahomoa gënanga mato, ”Iwö wango-wango nënanga ahi ngohaka magil̄au, ihö hone-honenge gënanga ani ngohaka magil̄au!” ”Kowali!” mohaluhu o ngoheka madodihiraka gënanga. ”Ihö hone-honenge nënanga ani ngohaka magil̄au, iwö wango-wango gënanga ahi ngohaka magil̄au!” Hoko gënanga önanga imaributu makoano ai himangoka.

²³Daha ma Koano Salomo wato, ”Ngini moi-moi nimangaku o ngohaka magil̄au iwö wango-wango gënanga nia ngohaka de koihö hone-honengua gënanga.”

²⁴Wotemo ipaha hokogënanga, ma koano wähuloko o nyawa yal̄ë o oworo.

²⁵Ipaha ma koano wahipareta, ”Niatobiki o ngohaka magil̄au iwango-wango gënanga idadi hinoto de nia hidöaka o ngoheka moi-moi gënanga o dobiki moi.”

²⁶O ayo madutu o ngohaka gënanga moihene o pareta gënanga mato, ”Apongo, Jou Koano, uha natoma o ngohaka gënanga. Nomihidöaka dika munangika.” O ayo gënanga motemo hoko gënanga karana munanga duru modora ami ngohaka. Mä o ngoheka mahomoa gënanga mato, ”Ya, natobiki dika, mal̄aika la ngomi mia bori makeua!”

²⁷Daha o Salomo wato, ”Uha nia toma o ngohaka magil̄au gënanga! Nihilapahi o ngoheka madodihira okaika gënanga — munangala ma ayo.”

²⁸Maöraha o Israeloka manyawa yoihene mangale o Salomo ai putuhu o perekara gënanga magoronaka, önanga yamao yoheranga de iwi horomati unangika. Hababu, inyata ma Jou Madutu wihidöakoka unangika o barija mangale wodiai de ma adili.