Read Tobelo O KOKOANO MADODIHIRAKA 4 Bible Online

O KOKOANO MADODIHIRAKA 4 - Tobelo bible

O KOKOANO MADODIHIRAKA 4

¹O Salomo wodadioka o koano mangale o Israeloka manga berera ingodumu. Nenanga o pegawe-pegawe ma gogurutil̄e o Salomo wagö gora-goraka: O imam-imam: o Zadok, o Azarya o Zadok aingohaka, o Abyatar O negaraka wotö tuli-tulihi: o Elihoref de o Ahia, enagënanga o Sisia aingoha-ngohaka O negara matiwi majojo: o Yosafat o Ahilud aingohaka O tentara yopoparangi manga kapita: o Benaya o Yoyada aingohaka Watö tailako o bupati-o bupati: o Azarya o Natan aingohaka O kadatoka wohidö dailako manga baluhu: o Ahisar Winonasihati ma koano: ma Imam Zabud, o Natan aingohaka O karajanga yahipopakisa manga baluhu: o Adoniram, o Abda ai ngohaka

⁷O Salomo wägoraka o bupati yangimoi de yahinoto o Israeloka manga daera ingodumu. Toönanga manga manarama enagënanga önanga yototoomu o ïnomo manga daeraino mangale ma koano de ai kadato madol̄a. O bupati ima teke tagali ima tengo-tengo yatagongo o hali gënanga o mede moino madekana o taongo ihi getongo.

⁸O bupati yangimoi de yahinoto gënanga wahi baluhu womatengo magubernur. Nenanga manga roma-romanga o bupati-bupati gënanga de toönanga manga kuaha madaera: O Ben-Hur: o Efraim madaera de ma l̄oku baturungaoka O Ben-Deker: o Makas makota, o Saalbim, o Bet-Semes, o Elon, o Bet-Hanan O Ben-Hesed: O Arubot makota, o Sokho, de o Hefer madaera ingodumu O Ben-Abinadab, o ngo Tafat ami rokata, O Salomo ngoi ora: o Dor madaera ingodumu O Baana o Ahilud aingohaka: o Taanakh makota, o Megido, de o daera mata-mataika itigi de o Bet-Sean, itigi o Sartan makota o Yizreel makota o koreharail̄e idaduoka, magurutika hiädono o Abel-Mehola makota de o Yokmeam makota. O Ben-Geber: O Ramot ma kota o Gileadoka, o kapongo-o kapongo o Gileadoka to Yair manyawa o Manasye aidifauku, o Argob madaera o Basanoka; mata-mata o kota mori butanga mangorana ma ago-agomo ihi kuata de ma bebeno o mehele de ma dudukuru-dudukuru ma ngora-ngoranoka o tabaga O Ahinadab o Ido aingohaka: o Maha(...)

²⁰O Yehuda de o Israeloka ma kawaha manga ngoë hokä o dowongi o gahi ma datekoka. Toönanga manga inomo de manga akere ka ima kewedono ikali yowango yosanangi.

²¹ O tau manyawa yogetongo de manga angguru madumule de manga ara madumule. O Salomo ai wowango magurutu o Yehuda de o Israel makawaha yongodumu o Dan de yaino hiädono o Barsyebaika yowango yorïdi de koiwa maruaë. Hababu, koano mata-mata o Efrat o wange madumuniha idaduoka iwihi gihene unangika, de mata-mata o hoana o negara-negaraino aipareta magilolitino ima teke dodiawo dede ünanga. O tonaka o Efrat ma Ngairi o wange madumuniha idaduoka o Tifsah o Efrat ma Ngairi madatekoka de yaino gila-gila o wange madumuniha o Gaza ma kotaika o Filistinoka hiädono o Mesir mari batingika, mata-mata o Salomo wakuaha. O hoana-o hoana o bereraka gënanga yoihene unangika de yofangu o soungu O Salomo wopö paralu okia honanga iö ol̄o-ol̄omo o wange higetongo ganga: o tarigu ma aluhu o litere o ribuhu motoa, o tarigu mapako o litere o ribuhu ngimoi, o hapi ikokurunga ngimoi, o hapi o tonaka ilua-luasoka monaoko, deʼ o duba o ratuhu moi. Mahomoa de gënanga, o maijanga o, o kijang, o mai janga madabo-daboho de o t(...)

²⁶ O Salomo to ünanga aitentara o kuda uku yo bare-barene ya ribuhu ngimoi de hinoto de o kuda mangale yatö tau-tauru ai kureta-kureta o kuranga o ribuhu moruata.

²⁷Madatoro ima teke totagali, o mede moino madekana, o bupati moi-moi ihi lapahi o inomo mangale ma Koano Salomo de mangale o nyawa mata-mata yamö make-make o ïnomo o kadatoino, hiädono önanga yokurangua okianaga moiö ma.

²⁸O bupati moi-moi gënanga ihi doakö o gandum de o gandum ma roëhe madoolenge mangale o Salomo ai kuda mata-mata, ya oa o kuda yo bö bare-barene ya oa o kuda ihi kokokureta. O aïwani ma inomo gënanga yao o kuda makurunga-kurungaika imamoteke yopoparalu.

²⁹Ma Jou Madutu wihidöaka o Salomoika o barija, de o sawaro kabiahaua, ikali o mangarati ilö luku-luku.

³⁰O berera-o berera o wange mahiwaroko de o Mesiroka moiua o nyawa iholoi yosawaro hokä ünanga.

³¹ Unanga igou-goungu duru wosawaro ngaro de o nyawa mata-mata. Unanga watilakuril̄e o Etan o Ezrahi manyawa, o Heman, o Kalkol de o Darda o Mahol aingoha-ngohaka. O Salomo ai romanga yanako okiaika honanga o berera-berera ihi gogilolitino aipareta.

³² Naga o dol̄a bololo o ribuhu hange de wo tulihi o nyanyian o ribuhu moi iholoi.

³³Unanga wakunu wohi ade-ade mangale o gota ma o utu-o utu de ido dato-datomo — o liwewuru mautu o Libanonino hiädono o hisop mamomomoika iwo wango-wango o helewo mabako-bakorika. Unanga wohi ade-adeö imakorona o aiwani-o aiwani, hokä hohiade o totaleo, o aiwani ima tahe-tahe de o nawoko.

³⁴O kokoano o dunia ingodumu yoihene mangale o Salomo ai sawaro, hiädono önanga yähuloko o nyawa unangika mangale yoihene unangino.