Read Tobelo O KOKOANO MADODIHIRAKA 5 Bible Online

O KOKOANO MADODIHIRAKA 5 - Tobelo bible

O KOKOANO MADODIHIRAKA 5

¹O Hiram, o Tirus manga koano, salalu imadodiawo de ma Koano Daud. Maöraha o Hiram woihene o Salomo wodadioka o koano witagali ai ama, o Daud, ünanga wahi dingoto ai huhuloko o Salomoika.

²Dahaö o Salomo wohi dingoto o behehongo nënanga o Hiramika,

³”Koano Hiram nomo Mulia! Maraioka Tuanga nohi öriki ahi ama o Daud salalu pakisa woparangi karana o haturu o berera-berera imihi gogilolitino ngomi, imi parangi. De karana ma Jou wihi döakuahi o utumu unangika mangale ai haturu mata-mata, ünanga wakunua wohi goko o puji mangï matau ma Jouika ai Jou Madutu.

⁴Maöraha nënanga ahi Jou Madutu wohihi döakoka ahi kuaha madaera magilolitino de koiwa maruaë. Tongohi ahi haturü koiwa, de koiwaö ya bänga o bodito ahi berera.

⁵ Ma Jou wojajioka hoko nënanga ahi amaika o Daud, ’Ani ngohaka o nauru aha Tï goraka wodadi o koano woni tagali ngona, aha wohi goko o puji Ngohino mangï matau Karana gënanga, Tuanga Hiram nomo Mulia, ngohi, o Salomo, taputuhoka mangale tohi goko o tau gënanga.

⁶Ma Jou wohi orikoka ahi kawaha manga hidogoronaka koiwa yo sosawaro yotol̄anga o gota hokä Tuanga ani kawaha. Hababu gënanga, ngohi togahoko noigo Tuanga nahüloko hagala ani nyawa Tuanga, yotol̄angö o Libanon ma Liwewuru ma gota mangale ngohi. Ahi kawaha aha tä huloko ya riwo önanga, de hokokia dika manga hewa Tuanga nohi tantu mangale hagala ani nyawa Tuanga gënanga, ngohi aha tofangu.”

⁷O Hiram duru wosanangi, maöraha watarima o abari gënanga. Unanga wato, ”Hihigiriri ma Jou o wange nënanga, karana ünanga wihi döaka o Daudika o ngohaka o nauru womatengo duru wobarija mangale wodadi o koano o hoana ma amo-amokika gënanga.”

⁸Daha o Hiram wohi dingoto o bobaluhu nënanga o Salomoika, ”Ngohi tatarimaka ani gogahoko ma abari Tuanga, deʼ ngohi tohi totomo ani gogahoko Tuanga. Ngohi aha tasadia o Libanon ma liwewuru ma gota de o liwewuru ma gota biaha ima moteke Tuanga ani gogahoko.

⁹Hagala ahi nyawa aha yao ihi guti o Libanonuku o gahioko. Genangoka o gota ma dengeoti-ma dengeoti gënanga önanga aha yaliko yadiai o getehata de önanga aha yal̄ahini ihi igo-igoro o dowongi madatekino mangïika Tuanga nohi tatantuoka. Dokengoka o getehata-o getehata gënanga aha yakilianga de ihi lapahi ani nyawaika Tuanga mangale ihi dailako ihi gila-gila. Ngonaino Tuanga, ngohi togahoko hupaya Tuanga na sadia o inomo mangale hagala o nyawa ahi kadato magoronaka.”

¹⁰Daha o Hiram wihi döaka o Salomoika o Libanon ma liwewuru ma gota mata-mata de o liwewuru ma gota biaha wopoparalu.

¹¹De mangale wa hi ol̄omo hagala o nyawa o Hiram ai kadato ma dol̄a gënanga, o taongo higetongo o Salomo wo hi döaka o Hiramika o gandum o kilo o ratuhu hange de monaoko de hinoto ma ribuhu de o ratuhu motoa deʼ o zaitun maminya madutu o litere o ribuhu iata de o ratuhu iata.

¹²Ma Jou wohi ganapu Ai jaji de wihi döaka o sawaro o Salomoika. O hiram deʼ o Salomo manga hidogoronaka naga manga dodohanga yaoa-oa, de önanga yahinoto yadiaioka manga jaji maliliko.

¹³Ma Koano Salomo wasadia o nyawa o nau-nauru o Israelokaino yongodumu yaribuhu moruange mangale yokarajanga koö iwa-iwa mahewa,

¹⁴ de wïgoraka o Adoniram wodadi watö tailako önanga. O Salomo wäregu önanga idadi o doomu hange, moi-moi manga ngoë yaribuhu ngimoi. O doomu hange gënanga de madatoro ima teke totagali o mede moi yogogere o Libanonoka, de o mede hinoto o tauoka.

¹⁵O Salomo wasadiaö o nyawa yaribuhu mori tufange mangale yahonotoko o helewo o l̄okuino de o nyawa yaribuhu mori tumidi mangale yamoku-moku o helewo gënanga.

¹⁶Unanga wägoraka o mandoro yaribuhu hange de yaratuhu hange mangale yato tailako o manarama gënanga.

¹⁷De ai paretaö önanga yahonotoko o helewo-o helewo mapako-pako marorahai mangale mapondasi ma Jou Ai Tau.

¹⁸Hoko gënanga o Salomo ainyawa yokokarajanga de o Hiram ainyawa yokokarajanga ikali hagala o nyawa o Gebal makotaino yasadia o helewo de o gota mangale ihi goko ma Jou Ai Tau gënanga.