Read Tobelo O KOKOANO MADODIHIRAKA 7 Bible Online

O KOKOANO MADODIHIRAKA 7 - Tobelo bible

O KOKOANO MADODIHIRAKA 7

¹O Salomo wohi gokoö o kadato mangale ai diri. Wohi goko o kadato gënanga yaol̄omo maöraha o taongo ngimoi de hange.

²O kadatoka gënanga o Salomo wodiai o ngï yahetongo o ”Libanon ma Hongana ma Tau”. Maduduga: magurutu o metere moruata de iata. Mangoata o metere monaoko de hinoto. O Tau gënanga to ënanga maliate o datoro hange o Libanon maliwewuru magota; madatoro magetongo maliate ngimoi de motoa, ma l̄okuoka ihi pake madudukuru o Libanon maliwewuru magota. Malotenge yadiai magota kaima daene, de yatamunu madudukuru-dudukuru gënanga.

⁴Mabebenoika o higili de o niraka o tau gënanga de majangela-jangela: o duono hange mabebenoika moi ima rihimangino de o duono hange mahomoa o bebenoika. O ngorana-o ngorana de o jangela-o jangela mariwoto madüku magurutu ipahagi iata.

⁶O Salomo wohi gokoö o ”Tau ma Liate o Helewo”. Magurutu o tau gënanga o metere monaoko de hinoto de mangoata o metere ngimoi de hange de mahononga. O tau gënanga mahimangoka naga matire maliate o helewo de.

⁷O tau mahomoa enagënanga ö Pareta makuruhi ma Tau” yahetongö o ”Juru hakimi ma Tau”. O tau nënanga malanteoka de yail̄e hiädono madudukuru-durukuruil̄e ihi lape de o Libanon maliwewuru magota. Ma tauoka nenangala o Salomo wapö putu-putuhu o perekara-o perekara watotailako.

⁸ O Salomo ai ngï wogö gogere yadiai hokä o tau ma ago-agomo mahomoa de maloa mahomoa o Juru hakimi ma Tau maporetoka. Mangale ngoi hekata, enagënanga ma koano Mesir ngoi ora, o Salomo wohi gokoö o tau ma ago-agomo kai maketero.

⁹Mata-mata o tau gënanga, yongohamika malöa ma amo-amoko, mapondasioka de yail̄e hiädono makatuil̄e, yadiai o helewo marorahaino. O helewo-helewo gënanga yasadia o helewo yafö fai-faitoka, de yatobiki ima moteke maduduga; madol̄aino de maporetino ihi tiai de o garagaji.

¹⁰O tau-o tau ma ago-agomo gënanga mapondasi yadiai o helewo ma ago-agomino de ma ija-ijaka. O helewo-helewo gënanga naga magurutu o metere hange de ma hononga, nagali o metere iata.

¹¹Mal̄okuoka ihi pake o helewo-o helewo mahomoa de ma ija-ijaka de yatobiki imoteke maduduga, daha ihi tamunu de o Libanon maliwewuru magota.

¹²O kadato malöa mabebeno o mehele de o löa ma Jou Ai Tau magoronaka mabebeno o mehele ma Jou Ai Tau mahimangiha idaduoka, moi-moi malape o lape moi o Libanon maliwewuru magota o helewo o lape hange magetongo mal̄okuoka.

¹³O Tirus makotaoka naga o nauru womatengo ai romanga o Huram. Igou-goungu ünanga duru kai sawaro de mangoë wanako wodiai hagala marupa okia honanga magoronaka o tabaga. Ai ama wohö hone-honengö ganga o Tirus manyawa de duru wosawaro okia honanga magoronaka o tabaga. Ngoi ayo o Naftali ai hoanino. Ma Koano Salomo wahulokoka o nyawa yöiki iwi ngoho o Huram mangale woböa de wohibaluhu o manarama mata-mata yododiai okia honanga o tabaga. Daha o Huram woböa de wamanarama okia o Salomo wogö gaho-gahoko.

¹⁵O Huram wodiai o liate o tabaga hinoto moi-moi magurutil̄e o metere tufange, mabululunu o metere motoa de o senti moruange, de mabirini matabaga o senti tumidi iholoi. O liate gënanga magoronauku mahomoa.

¹⁶Mangale o liate-o liate gënanga ünanga wodiai o liate mahaëke hinoto o tabagaino, moi-moi magurutil̄e o metere hinoto de o senti monaoko

¹⁷madüku o bakung mabunga-bunga magurutil̄e o metere moi de o senti tufange. O liate moi-moi mahaëkoka gënanga ihi poromu o datoro hinoto de o delima mahohoko o tabagaino o duono hinoto. Mata-mata naga o delima mahohoko o ratuhu hinoto o liate mahaëkoka yogetongo. Daha o Huram wodiai o rante o tabagaino ihako-hakoro de wogelengauku o liate-liate gënanga mal̄okuoka. Naga o rante ihako-hakoro tumidi o liate magetongo mal̄okuoka, de o rante ihako-hakoro mal̄okuokaö gënanga, naga moi mahohol̄e ihululunino. Mahohol̄e ihöhululunino mal̄okuoka nenangala

²¹maliate-maliate mahaëke madüku o bakung ma bunga-bunga gënanga ihi goko o liate-liateoka gënanga. O liate-o liate gënanga ihi gogere o ngorana howö woha-wohama ma Jou Ai Tau mahimangoka — moi o koreharail̄e idaduoka, mahomoa o koremiëuku idaduoka. O korehara il̄e idaduoka ihi romanga o Yakhin, de o koremië uku i daduoka ihi romanga o Boas. Hoko gënanga o Huram wadiai o liate-liate gënanga hiädono iböto.

²³Ipaha o Huram wodiai moi o rube tabaga ihohululunu, de maduduga hokä hoko nënanga: maluku o metere hinoto de o senti monaoko, madogoronaika o metere iata de o senti moruata de magilolitino o metere ngimoi de hange de o senti monaoko.

²⁴Madateke maporete yakilolitino ihi poromu de o hambiki mahohoko o datoro hinoto, i hi docor de o rube gënanga.

²⁵O rube gënanga ihi gogere o hapi o tabaga ngimoi de hinoto maporetuku — hange ihimanga o koremieuku, hange o koreharail̄e, hange o wange madumuniha, de hange o wange mahiwaroko.

²⁶Mabirini o rube gënanga ngade o senti moi. Mapigirina marupa o mangko mapigirino ikö okoro maporetika yodangadeika o bakung mabunga mahohe. O rube gënanga yakunu ima dol̄a doneho litere o ribuhu moruata.

²⁷O Huram wodiaiö ngimoi o kureta tabaga, moi-moi magurutu o metere moi de o senti mori tufange, mangoata o metere moi de o senti mori tufange, magurutil̄e o metere moi de o senti moruange.

²⁸O kureta-kureta gënanga o aoto-o aoto ipopahagi ihi pake mariwoto magoronaka.

²⁹O aoto-o aoto gënanga ihi poromu de o garade o singa, o hapi de o malaekat. Ma riwo-riwotika — mal̄okuoka de matimioka madulada-dulada o singa de o hapi gënanga — ima moteke de o bunga maguriti mahohe magarade.

³⁰O kureta yogetongo gënanga toënanga malululu o tabaga iatoka de malululu ma asö o tabaga. O kureta malibuku iatika gënanga, naga o liate o tabaga o bokolo madudumungu de ihi poromu maporetino de o bunga maguriti.

³¹Maliate iata madudumungu mal̄okuoka gënanga ihi dohanga de moi mariwoto mahohululunu mangale mabokolo madudumungu. Maliate-maliate madudumungu gënanga yatioil̄e o aoto i popahagi mal̄okuoka ma gurutil̄e o senti moruata de iata, de ma timioka o senti monaoko de hinoto. Mariwoto mauruino gënanga naga de magarade.

³²Magurutil̄e malululu o senti mori butanga de butanga; magogere o aoto-o aoto matimioka. Ma lululu ma as de makureta marupahi kai ahumu.

³³Malululu-lululu kaima tero de o kureta ihi poparangi malululu; malululu mariwoto, matarali, ma as de malululu matarali madoomu mata-mata yadiai de o tabaga.

³⁴Naga o liate madudumungu iata o kureta malibuku yogetongo itö timi-timi gënanga. O liate-liate gënanga marupa kaiahumu de makureta.

³⁵O kureta gënanga mal̄okuoka yakilolitino naga madateke mangoata o senti monaoko de hinoto. Maliate madudumungu de mapapanga-mapapanga mata-mata marupa kaiahumu de makureta.

³⁶Maliate-maliate madudumungu de o aoto-o aoto igogarade ihi poromu de o malaekat madulada, o singa, de o palem ma utu kiaka dika naga mangï ihomoa mangale gënanga, de ihi ginïki o bunga maguriti yakilolitino.

³⁷Hoko gënanga madodagi o kureta-kureta gënanga yadiai. Mata-mata kao rupa moi — madüku de maduduga.

³⁸ O Huram wodiaiö o bokolo ma ago-agomo o gahumu ngimoi, mangale o kureta yogetongo moi. O bokolo moi-moi gënanga to ënanga mangoatika o metere moi de o senti mori tufange de yakunu ima dol̄a o akere o litere o ratuhu tufange.

³⁹O Huram wogelenga o kureta motoa ma Jou Ai Tau o koreharail̄e idaduoka, de motoa o koremieuku idaduoka. O rube o tabaga wogelenga malibukuoka o wange mahiwaroko de o koreharail̄e idaduoka mahi dogoronako.

⁴⁰O Huram wodiaiö o bohoko, o Sikop, o mangko. Genanga de iböto ingodumu ai manarama ibötoka mangale ma Jou Ai Tau ma Koano Salomoika. Nënanga mapakakaha wadodiaioka: O liate hinoto mapako-pako O liate hinoto mahäeke madüku o mangko yogelengauku o liate hinoto gënanga mal̄okuoka O rante ihako-hakoro o liate moi-moi ma haekoka O delima o tabaga o ratuhu iata yodatoro o duono hinoto magoronaka yakilolitino o rante ihako-hakoro o liate mahäekoka yogetongo. O kureta ngimoi O bokolo mapako-pako ngimoi O rube tabaga O hapi tabaga ngimoi de hinoto yatö tiki-tikika o rube gënanga O bohoko, o sikop de o mangko. Ma pakakaha mata-mata mangale ma Jou Ai Tau gënanga, o Huram wadö dodiai mangale ma Koano Salomo, wadiai de o tabaga, de ihi gihoro hiädono iletongo.

⁴⁶Ma koano wä huloko yadiai okia honanga o gurasi de o haaka yaö ui-uihoka o Sukot de o Sartan mahi dogoronaka o Yordan ma Waioka.

⁴⁷O Salomo wahulokua yatibanga okia honanga o tabaga gënanga, hababu magegetongo duru kohä ngoë. Hoʼ, okia honanga gënanga madubuho ihi örikua.

⁴⁸ Ma Koano Salomo wahulokö yodiai mapakakaha-pakakaha mahomoa de o gurasi mangale ma Jou Ai Tau. Nenanga ma pakakaha-pakakaha wadodiai gënanga: O huhuba mangï O meja mangale o roti ihihö huba-huba ma Jou Madutuika O hilo matotodenge ngimoi yakelenga o Ngï Duru i Tebi-tebini mahimangoka, enagënanga motoa o koreharail̄e idaduoka de motoa o koremieuku idaduoka O bunga-bunga O hilo-o hilo O kakatama-o kakatama O belu-belu O hilo ihihö hone-honenge O mangko-o mangko Ododai-ododai mangale o dupa Ohude-ohude mangale o uku mangaboho O hensel-o hensel gënanga o Ngï Duru i Tebi-tebini mangorana de ma Jou Ai Tau mangorana-mangorana maporetoka.

⁵¹ O Salomo wohi goko ma Jou Ai Tau iböto ipahaino, Unanga wagogono o tau gënanga magudang-magudang magoronaka mata-mata o haaka, o gurasi de okia honanga mahomoa o Daud ai ama wohihö huba-hubaka ma Jouika.