Read Tobelo O KOKOANO MADODIHIRAKA 8 Bible Online

O KOKOANO MADODIHIRAKA 8 - Tobelo bible

O KOKOANO MADODIHIRAKA 8

¹ Iböto gënanga ma Koano Salomo wähuloko o hoana matutuda mata-mata de o umati o Israel manyawaino yoboa unangika o Yerusalemoka mangale yatururu ma Jou Ai Jaji ma Peti o Sion de yaino, o Daud ai kota ma Jou Ai Tauika.

² De aha önanga yoboa mata-mata o Wange ma Ago-agomo o Tau-tau ihi katu o Hoka-hoka Etanim mamede magoronaka.

³O tutuda mata-mata gënanga ima toomu inoka, o imam-imam yagoraka o Jaji ma Peti gënanga,

⁴de yao ma Jou Ai Tauika. Ma Jou Ai Tau ikali mapakakaha mata-mataö yatururu ma Jou Ai Tauika o imam-imam de o Lewi manyawa.

⁵Ma Koano Salomo de o Israeloka ma kawaha yongodumu ima toomu o Jaji ma Peti mahimangoka gënanga, de aha ihi huba ma Jouika o duba de o hapi hakunua haetongo mangoë.

⁶Iböto gënanga o imam-imam yao o Jaji ma Peti gënanga ma Jou Ai Tau magoronaika de yakelenga o malaekat-malaekat madulada matimioka o Ngï Duru i Tebi-tebini magoronaka.

⁷O dulada-dulada magahuhu gënanga ihoheika yatamunuku o Peti gënanga de magota madodowiti.

⁸Magota magogoraka gënanga duru koha gurutu, hiädono mari barene hamake o Ngï Duru ma Debi-debini mahimangino. (Hiädono o wange nënanga o gota-o gota gënanga kagenangoka dauohi.)

⁹ O Jaji ma Peti gënanga magoronaka okianaga moiö makoiwa sowaliua o helewo o gahumu hinoto. O helewo-helewo gënanga o Musa wonoaka genangoka o Sinai mal̄okuoka, maöraha ma Jou wodiai o jaji de o Israeloka manyawa maöraha önanga o dodagi magoronaka o Mesir de yaino o Kanaan mabereraika.

¹⁰ Maöraha o imam-imam yohupu ma Jou Ai Tauino gënanga itodokanino o tau gënanga yaomanga de o lobi.

¹¹O lobi gënanga iloleletongo mangale ma Jou Ai himanga mamulia hiädono o imam-imam gënanga yakunua yowohamoli mangale yadiai toönanga manga manarama.

¹² Daha o Salomo woma niata, wato, ”Ya Jou, Ngona nohi gogere o wange o dihangoka. Mä Ngona iholoi noigo nogogere o lobi mahuhutu magoronaka.

¹³”Oraha nënanga tohi goko o tau imomulia mangale Ngona, mangale o ngï Nogogere kahiado-adonika.”

¹⁴Ma Koano Salomo womaniata ibötino, womaidulu o kawahika yongodumu magogiria ima okoino genangoka, daha wogahoko ma Jou Madutu ai barakati onangika.

¹⁵ Unanga wato, ”Mahira Jou nojajioka ahi Amaika o Daud hoko nënanga, ’Maöraha ngohi tä ao Ahi umati o Mesiroka de yohupu, o Israeloka manga berera ingodumu koiwa naga o kota moiö Tairiki o ngï kiaka idadi kiani ihi goko o tau mangale o ngï ihi pö puji-puji Ngohino. Mä ngona, Daud, toni iriki mangale napareta Ahi umati.’ O higiriri o Jou o Israeloka manga Jou Madutu wohi ganapuoka Ai jaji gënanga!”

¹⁶

¹⁷ Wohi gila-gila o Salomo wotemo, ”Ahi ama o Daud wohi datoroka mangale wohigoko o puji mangï matau ma Jouika o Israeloka manga Jou Madutu.

¹⁸Mä ma Jou witemo unangika, ’Ani dungutu gënanga yaoa.

¹⁹ Mä, ngonaua, mä ani ngohaka aha wohigoko Ahi tau gënanga.’

²⁰”Oraha nënanga ma Jou wohi ganapuoka Ai jaji. Ngohi todadioka o Israeloka manga koano titagali ahi ama, de ngohi tohigokoli o tau mangale o puji mangï ma Jouika, o Israeloka manga Jou Madutu.

²¹Ma Jou Ai Tau magoronaka gënanga tasadiaka o ngï mangale o Jaji ma Peti madol̄a o jaji mahelewo ma Jou de tongone nanga ete de nanga tohora manga hidogoronaka, maöraha Unanga wä ao önanga o Mesiroka de yohupu.”

²²Iböto gënanga, o kawaha yoböa-böaino manga himangoka, o Salomo woma okoino wohimangika o huba mangï daha wagoraka ai giama hinoto

²³deʼ womä niata, ”Jou, o Israeloka manga Jou Madutu! O dihangoka ekola o duniakaö koiwa naga hokä Ngona! Ngona Nohi ganapu Ani jaji de Nohi dumutu Ani dora Ani umatika yosösetia de ini hingö ngou-ngounu Ngonaika de manga hininga magahumu.

²⁴Ngona Nohi ganapuoka Ani jaji ahi amaika o Daud. Okia No jajajioka gënanga Nadiaioka o wange nënanga.

²⁵ Ngonaö Nojajioka ahi amaika, nako aidifauku igou-goungu ini hingounu Ngonaika hokä ünanga, done hoko genangika aha naga womatengo aidifauku wodadi o koano o Israelokaika. Öraha nënanga, ya Jou o Israeloka manga Jou Madutu, Nohi ganapu ö mata-mata Nohi jö jajajioka ahi amaika o Daud, Ani gilaongo gënanga.

²⁶

²⁷ Mä, ya Jou Madutu, igoungu Ngona Noigo Nogogere o duniaka nënanga? O dihanga ingodumuö yawedonua maamokika mangale Ngona, okia hongoli o puji matau tohigö goko-goko nënanga!

²⁸Ya Jou, ahi Jou Madutu, ngohi Ani gilaongo! Mä tanu Noihene ahi niata, de matarima ahi gogahoko o wange nënanga.

²⁹ Tanu o hutu de o wange Ngona Nahohongino o tau nënanga ta o iri-irikoka hokä o puji matau Ngonaika. Tanu Ani gogere mangï ino o horogaka Ngona Noihene de Nohihiapongo ngohi ikali Ani umati nako ngomi mio himangika o tau nënanga de mimaniata Ngonaika.

³⁰

³¹Nako womatengo iwi kalaki wahowono o nyawa mahomoaika de iwi ao Ani huba mangïika o puji matau magoronaka nënanga mangale wokoboto, ünanga wahowonua,

³²ya Jou, kokiani Ngona noihene o horogaka de Naputuhu Ani gogilaongo manga perekara nënanga. Nahukumu yahö howo-howono imamoteke manga manarama de Nahi bebasi yahö howo-howonua.

³³Nako Ani umati o Israeloka manga haturu-haturu yahohihanga önanga karana önanga yobaradoha, daha önanga ima idulu Ngonaika de ini horomati ngona hokä o Jou, ipaha yoboa o puji matauino nënanga ikali imä niata yogahoko o apongo Ngonaika,

³⁴tanu o horogaka de Nagihene önanga. Tanu Ani umati nënanga Nahiapongo manga baradoha, de Na ao önanga ima idulu önanga o berera Nahidodoa-doakoka toönanga manga ete de manga tohoraika.

³⁵Nako Ani umati yobaradoha Ngonaika, de Ngona Nahukumu önanga de Nohigutiua o awana daha önanga yodiaiokaua toönanga manga baradoha, de i ni horomati Ngona hokä o Jou, ipaha yohimanga o puji matauika nënanga ikali imä niata Ngonaika,

³⁶tanu o horogaka de Nagihene önanga. De Nahi apongo Ani umati o Israeloka manga baradoha de toönanga manga koano. Nadotoko önanga yadiai okia itö totiai. Iböto gënanga, ya Jou, Nohiguti o awana Ani bererauku nënanga, oberera Nahidö doa-doaka Ani umatika mangale idadi toönanga madutu kahi ado-adonika.

³⁷Nako o berera nënanga yatapal̄u o habirokata ekola o bobaku o panyake, de idö dato-datomo yakilianga o hidal̄oko i kö kua-kuata, yaköto o pipiti ekola o kahoho, ekola nako Ani umati yäparangi manga haturu, ekola yadaene o panyake,

³⁸tanu Ngona Noihene toönanga manga niata. Nako Ani umati o Israeloka manga hidogoronaino naga de manga hininga ihuha ima niata Ngonaika ikali manga giama yatoakika mameta o puji ma tauino nënanga,

³⁹tanu Ngona ani gogere magoronaka o horogaka Noihene ikali Nahiapongo de Nariwo önanga. Duga-duga Ngona Nanako o nyawa manga hininga madol̄a. Hababu gënanga Nahidiai o nyawa ima moteke manga manarama moi-moi,

⁴⁰hupaya Ani umati hoko genangika ihingounu Ngonaika hoko kia madekana önanga yo wango o bereraka Nahidö doa-doakoka to ngomi mia ete de mia tohoraika.

⁴¹Nako womatengo maporetino o berera magögurutoka wo ihene mangale Ani mulia de mangale ihö hera-heranga Nadiaioka mangale Ani umati, de aha ünanga woboa o puji matauoka nënanga mangale woni horomati Ngona de woma niata Ngonaika,

⁴²

⁴³tanu o horogaka Ani gogere de yaino Ngona Noihene ai niata de Natarima ai gogahoko. De hoko gënanga hagala o nyawa o dunia ingodumu ininako Ngona de ini hingounu Ngona ika hokä Ani umati o Israeloka. Önanga aha ihi öriki o tau tohi gö goko-goko nënanga nagala o ngï mangale ini puji Ngonaika.

⁴⁴Nako Ngona Nahi pareta Ani umati mangale yöiki yoparangi yälawani manga haturu, daha kiakaö naga önanga, önanga yohimangika o kota Naö iri-iriki nënanga de ima niata manga meta o tauino nënanga tohigö goko-gokoka mangale Ngona,

⁴⁵tanu o horogaka de Ngona No ihene toönanga manga niata gënanga, de Nahi döaka o utumu onangika.

⁴⁶Nako Ani umati yobaradoha Ngonaika — igou-goungu moiuaö la yobaradohaua — daha karana Ani gangamo Namal̄aika önanga manga haturu yahohihanga, de yaao hokä o dagokino o berera moika magö gurutika ekola madigi-digino,

⁴⁷tanu Ngona Noihene toönanga manga niata. Nako o bereraka gënanga önanga yamal̄aka toönanga manga baradoha, de imä niata Ngonaika ikali ima ngaku önanga yobaradohaka de yodiai o dorou, Noihene toönanga manga niata, ya Jou.

⁴⁸Nako o bereraka gënanga önanga de manga hininga iriko-rikoto de yagou-goungu yamal̄a toönanga manga baradoha, de imä niata Ngonaika ikali yohimanga o bereraino nënanga Nahidö doa-doaka tongomi mia ete de mia tohoraika, manga meta o kota Naö iri-irikoka de o puji matau tohigö goko-gokoka nënanga mangale Ngona,

⁴⁹daha o horogaka Ani gogereino Ngona Nomau Noihene toönanga manga niata de Nadora önanga.

⁵⁰Nä apongo mata-mata toönanga manga baradoha de manga setiaua Ngonaika, de Nä diai toönanga manga haturü-haturü yahidiai önanga kayaoa-oa.

⁵¹Onanga ganga Ani umati mahirete Nä aoka nahihupu o Mesirino o berera kiaka önanga yahö hangihara.

⁵²Tanu Ngona, ya Jou Madutu, salalu Nahohininga Ani umati oIsraeloka kamamoi de manga koano. De Ngona Noigo Noihene toönanga manga niata ihi geto-getongo önanga imahi böaka yogahoko o roriwo Ngonaika.

⁵³Ngona, ya Jou Madutu, Nä irikoka önanga hagala o hoana manga hidogoronaka mangale yodadi Ani umati mahirete, hokä Notemoka onangika Ani gilaongo o Musaika, maöraha Ngona Nätuda tongomi mia ete de mia tohora o Mesiroka de yohupu.”

⁵⁴Hoko gënanga o Salomo woma niata daha watilabukuku o huba mangï mahimangoka de ai giama wotoakil̄e dakuil̄e. Iböto gënanga ünanga womaoko,

⁵⁵de ai ilingi makuatil̄e wogahoko ma Jou Madutu Ai barakati mangale o nyawa mata-mata ima totöomuino genangoka, wato,

⁵⁶ ”O higiriri ma Jou wohidö doa-doaka o hininga madumuloa Ai umatika hokä wohi jajioka o Musaika Ai gilaongo. Mata-mata maoa-oa Wohijö jajaji Waganapuoka.

⁵⁷Tanu ma Jou tongone nanga Jou Madutu wona tomoteke ngone hokä sarakia Unanga watomoteke tongone nanga ete de nanga tohora. Tanu Unanga wona mal̄a ikaua ngone.

⁵⁸Tanu Unanga wonahidadi ngone o nyawa yososetia Unangika hupaya ngone salalu howango ima moteke Ai mau de hohingounu Ai titaika mata-mata de Ai pareta wohidö doa-doakoka tongone nanga ete de nanga tohoraika.

⁵⁹Tanu ma Jou, tongone nanga Jou Madutu, salalu aha wo hininga ahi niata de ahi gogahoko tohi ado-adonoka nënanga Unangika. Tanu Unanga salalu wohidumutu Ai hininga maoa Ai umatika o Israeloka de manga koano de wahi döaka onangika okia önanga yoparalu o wange mahigetongo.

⁶⁰De hoko gënanga hagala o hoana o duniaka aha ihi öriki duga-duga Jou mahirete o Jou Madutu, mahomoa koiwa.

⁶¹Kokiani ngini, Ai umati hoko genangika nisetia ma Jouika, tongone nanga Jou Madutu de nihingounu Ai tita-ai titaika de Ai pareta-pareta, hokä ngini nia dodiai o wange nënanga.”

⁶²Iböto gënanga ma Koano Salomo deʼ o nyawa mata-mata ima totoomuino genangoka ihihuba o huhuba ma Jouika.

⁶³Mangale o dame mahuhuba o Salomo wohihuba o hapi o ribuhu monaoko de hinoto de o duba o ribuhu o ratuhu moi de monaoko. Hoko gënanga ma koano de o kawaha yongodumu yodiai upacara yatabisang ma Jou Ai Tau.

⁶⁴O wange gënangaö o Salomo watabisang malöa mahidoku magogoronaino ma Jou Ai Tau mahimangoka gënanga. Ipaha o löaka gënanga ünanga wohihuba o huhuba ituhu-tuhuku, o huhuba o gandum, de o aiwani mahaki mangale o dame ma huhuba. Mata-mata gënanga wohihuba genangoka karana o huba mangï o tabaga duru ieteke holi mangale o huhuba mata-mata gënanga.

⁶⁵Ma Jou Ai Tauoka gënanga o Salomo de o Israel manyawa yongodumu yodiai o Tau-tau ihi Katu o Hoka-hoka marameanga o wange tumidino madekana. Duru komanga ngoë o nyawa imatoomu genangoka. ”Onanga yokokiboa o Hamat mangemoko madaera ma gurutika koremiëuku hiädono mabatingi o Mesir o korehara il̄e.

⁶⁶O wange tufangeoka o Salomo wähuloko hagala o nyawa gënanga yolio. Önanga mata-mata iwi higiriri ünanga daha yolio toönanga manga tauika de manga hininga imore-morene, karana mata-mata o barakati ma Jou wahi döakoka Ai gilaongika o Daud de Ai umatika o Israeloka manyawa.