Read Tobelo O KOKOANO MADODIHIRAKA 9 Bible Online

O KOKOANO MADODIHIRAKA 9 - Tobelo bible

O KOKOANO MADODIHIRAKA 9

¹O Salomo wohi goko ibötoka ma Jou Ai Tau de ma koano ai kadato ikali wo hi dö dato-datoroka mata-mata,

² ma Jou wo mahi matokoli Ai diri unangika hokä idä dadadi o Gibeonoka.

³Ma Jou wïtemo unangika, ”Ani niata Toihenoka, de nënanga o tau nohigö goko-gokoka nënanga Tohi nyata idadi o ngï itingakoka mangale ihi puji Ngohino kahi ado-adonika. Ngohi aha salalu Ta pulo-pulono de To goana o ngï nënanga.

⁴Nako ngona noma higilaongo Ngohino de ani hininga itebini de irikoto hokä ani ama o Daud, de ngona nohingounu Ahi tita-tita de Ahi pareta-pareta,

⁵done Ngohi aha tohiganapu Ahi jaji ani amaika o Daud, ai ngohaka de ai danongo manga difauku aha salalu yäpareta o Israeloka.

⁶Mä nako ngona ekola ani difauku ihï porete Ngohi de ihi ngounua Ahi tita-tita de Ahi pareta-pareta, ikali ngona nahuba o hagala gikiri mahomoa,

⁷done Ngohi aha täduhu Ahi umati o Israeloka o berera Tahidö doa-doakoka onangika. Ngohiö aha tämal̄a o tau nënanga Tohitö tototapuoka idadi o puji mangï Ngohino. Kiaka dika o Israeloka manyawa aha yahikauku de yagogiete.

⁸O puji matau nënanga aha idadi o tau magilianga o doporono moi hiädono o nyawa moi-moi yakaino genangino aha yatodokana de yoborohono. Önanga aha yotemo, ’Yadodoa ma Jou wodiai hoko gënanga o tau de o bereraika nënanga?ʼ

⁹Daha o nyawa yohaluhu, ’Karana önanga iwi mal̄aka ma Jou, toönanga manga Jou Madutu, wängotakoka toönanga manga ete de manga tohora o Mesiroka de yohupu. Önanga yahuba hagala o gikiri mahomoa. Hababu gënanga ma Jou wodotagao o huha nënanga onanguku.’ ”

¹⁰O Salomo wohi goko ma Jou Ai Tau de ma koano ai kadato maöraha o taongo monaoko magoronaka.

¹¹O Libanon maliwewuru magota mata-mata de o liwewuru magota biaha ikali o gurasi mata-mata o Salomo wopö paralu mangale o tau gënanga ma Koano Hiram wihi döakoka unangika. O manarama gënanga ibötoka, ma Koano Salomo wihidöaka o Hiramika o kota monaoko o Galilea madaeraoka.

¹²Daha o Hiram wöiki wolega, mä ünanga wosanangua de o ngongike gënanga.

¹³Unanga witemo o Salomoika, ”Ahi riadodoto, hoko nënanga marupa o kota-o kota nohihi doa-doaka ngohino?” Genanga mahababu o daera gënanga kayahetongohi o Kabul.

¹⁴O gurasi o kilo o ribuhu iata iholoi o Hiram wohi dingotoka o Salomoika.

¹⁵Ma Koano Salomo wapake madodagi o manarama de mapakisa mangale wohigoko ma Jou Ai Tau, ma koano ai kadato, o Yerusalem mabebeno o mehele de mangale yodoporono o tonaka ma Jou Ai Tau o korehara il̄e idaduoka. Unanga wapake madodagi ima daene mangale ihi goko okali o Hazor makota, o Megido de o Gezer. (

¹⁶O Gezer makota ganga o kota mahira ma koano Mesir waparangi de wahihangoka, daha manyawa yätoma de makota yatuhuku. Ma duruino o kota gënanga ma koano Mesir womihidöaka ngoi oraika hokä womihihadia mawange mokawingi de o Salomo.

¹⁷De o Salomo wohigokooli o kota gënanga.) De o karajanga wapakisa, o Salomo wohigokoli o Bet-Horon-Hilir,

¹⁸o Baalat, o Tamar o Yehuda matonaka makokakahaka,

¹⁹o kota-o kota o inomo magogogono de o kota-o kota de mahö hohanoka o kureta ihi poparangi de makuda. Mata-mata ma datoro wohigö goko-goko o Yerusalemoka, o Libanon de ai kuaha madaera ingodumu wadiaioka.

²⁰Mangale o manarama ipö pakisa gënanga o Salomo watoomu hagala o nyawa o Amori manyawa manga difauku, o Het, o Feris, o Hewi de o Yebus. ”Onanga ganga o Kanaan manyawa manga difauku o Israeloka manyawa yämataua yätoma, maöraha önanga yogogere o berera gënanga. Hiädono öraha nënanga toönanga manga difauku kayodadiohi o gilaongo.

²²O Israeloka manyawa o Salomo wadiaiua o gilaongo; önanga wahimanarama hokä o tentara, o tentara manga häeke, o kapita, o kureta ihi poparangi manga baluhu de o tentara o kudauku yobö bare-barene.

²³O pegawe yaratuhu motoa de yamoritoa wahilapahi o manarama yägoana hagala o nyawa yadodiai o manarama ipö pakisa o Salomo ai tau ihi goko mahidailako irupa-rupa magoronaka.

²⁴O tonaka ma Jou Ai Tau o korehara il̄e idaduoka o Salomo wöpohuku maöraha ngoi hekata, enagënanga ma koano Mesir ngoi ora, momatururu o Daud ai kota de maino o kadatoika o Salomo wohigö goko-goko mangale munanga.

²⁵ O taongo moi wohi gali mahange o Salomo wohihuba o huhuba itö tuhu-tuhuku de o dame mahuhuba, o huhuba mangï mal̄okuoka, wohigö goko-gokoka mangale ma Jou. Unanga watuhukö o dupa mangale ma Jou. Hoko gënanga o Salomo wohigoko waböto ma Jou Ai Tau.

²⁶Mangale ai kapa madoomu ma Koano Salomo wodiai hagala-o kapa o Ezion-Geberoka, itigika o Elot o Akaba ma Jiko mahohanoka, o Edom madaeraka.

²⁷Ma Koano Hiram wähidingoto ai kapa manyawa yanö nako-nako mangale yohidete ima kinïki o Salomo ai kapa manyawa.

²⁸Mamoi ibötoönanga yohidete o Ofir mabereraika mangale yo l̄ë o gurasi o kilo o ribuhu ngimoi de iata de yao o Salomoika.