Read Tobelo O KOKOANO MAHINOTOKA 1 Bible Online

O KOKOANO MAHINOTOKA 1 - Tobelo bible

O KOKOANO MAHINOTOKA 1

¹O Ahab o Israeloka manga koano wohonenge ipahaika, o Moab maberera yälawani o Israelokaika.

²O wange moiuku ma Koano Ahazia o Israelino iwi ötaka ai kadato o Samariaoka matire il̄oku-l̄okuoka de wauku, hiädono ünanga ai nabo ma ago-agomo. Daha ünanga wähuloko o nyawa mangale yoleha o Baal-Zebub, o Ekron makota magikiri o Filistinoka manga dairaoka, boteka ünanga aha wotogumu ekola kowali.

³Mä ma Jou Ai malaekat iwi huloko o Elia, ma nabi o Tisbeino, wöiki ima kamake de ma Koano Ahazia ai huhuloko-hu huloko gënanga mangale wätemo, ”Boteka o Israelokaka koiwa o Jou Madutu hiädono ngini nimau nioiki nigahoko o hidumutu o Baal-Zebubika, o Ekron makota magikiri gënanga?

⁴Niwihi ngahu makoanoika ma Jou wotemo hoko nënanga, ’Ngona aha notogumokaua ngona aha nohonenge!ʼ ” O Elia wadiai ibötino ma Jou Ai pareta gënanga,

⁵o huhuloko-huhuloko gënanga yolio ma koanoika, daha ma koano wäleha, ”Yadodoa ngini nilio?”

⁶Önanga yohaluhu, ”O nauru womatengo woboa womi buhukino ngomi, deʼ womi huloko ngomi milio mangale mia hetongo Jou Koanoika, ma Jou wotemo hoko nënanga Jou Koanoika, ’Boteka o Israeloka koiwa naga o Jou Madutu, hiädono ngona nähuloko yogahoko ohi dumutu o Baal-Zebubika, o Ekron makota manga gikiri? Ngona aha notogumua, ngona aha nohonenge!ʼ ”

⁷”Sarakia ai rupa o nyawa gënanga?” ma koano woleha.

⁸ ”Ai juba deʼ ai gorona maninikutu o aiwani makaiino,” önanga yohaluhu. ”O, gënanga o Elia!” ma koano wato.

⁹Daha ünanga wïhuloko o tentara manga baluhu womatengo ima kinïka ainyawa ya moritoa yöiki iwi tagoko o Elia. O tentara manga baluhu gënanga wöiki daha wimake o Elia magogiria wogogeruku o doporono moioka. ”Hei, ma Jou Madutu Ai gilaongo,” o tentara manga baluhu gënanga wato, ”ma koano woni pareta ngona nouti!”

¹⁰ ”Nako ngohi nënanga igoungu ma Jou Madutu Ai gilaongo,” o Elia wohaluhu, ”kokiani o uku iuti o dihanguku deʼ inï uku ini mata ngona ikali ani nyawa mata-mata!” Oraha gënanga dika iuti o uku deʼ yatuhuku o tentara manga baluhu gënanga de ainyawa yamoritoa.

¹¹Daha ma koano wihuloko o tentara manga baluhu mahomoa ima kinïki ainyawa yamoritoali. Önanga yäiki deʼ iwitemo o Eliaika, ”Hei, ma Jou Madutu Ai gilaongo, ma koano woni pareta ngona öraha nënanga dika nouti!”

¹²”Nako ngohi igoungu ma Jou Madutu Ai gilaongo,” o Elia wohaluhu, ”tanu o uku iuti o dihanguku deʼ ini uku ini mata ngona ikali ani nyawa!” Öraha gënanga dika iuti o uku ma Jou Madutuino de yauku yamata o tentara manga baluhu gënanga de ainyawa yamoritoa.

¹³Wohi galioli ma koano wihuloko o tentara manga baluhu ima kinïki ainyawa yamoritoa. O tentara manga baluhu gënanga wodoa o doporonil̄e deʼ womahiädonoka o Elia ai himangoka ünanga watilabukuku deʼ wotemo, ”Nomihi apongo ngomi, ya, ma Jou Madutu Ai gilaongo! Nohi dora ngohi deʼ ahi nyawa mata-mata nënanga. Uha ngomi nomï toma!

¹⁴O tentara manga baluhu yahinoto mahomoa ima kinïki manga nyawa, önanga yohonenge yä ol̄omo o uku o dihanguku, ma’ ngohi togahoko, nohï dora ngohi!”

¹⁵Öraha gënanga dika ma Jou Ai malaekat iwi temo o Eliaika, ”Uha nohawana! Ninïki ünanga nouti o doporonoka nënanga.” Karana gënanga o Elia wöiki ima kinïki o tentara manga baluhu gënanga ma koanoika.

¹⁶Daha o Elia wato ma koanoika, ”Ma Jou wotemo, ’Ngona nähuloko o nyawa yogahoko o hidumutu o Baal-Zebubika o Ekron makota manga gikiri matero-tero o Israeloka koiwa manga Jou Madutu yakunu noleha. Karana gënanga ngona aha notogumua, ngona aha nohonenge!ʼ ”

¹⁷Daha o Ahazia wohonenge hokä ma Jou wotemo-temoka itilakuru o Elia. Karana o Ahazia toünanga aingohaka o nauru koiwa, daha o Yoram, ai dodoto wodadi o koano witagali ünanga. Genanga idadi o taongo mahinotoka aipareta o Yehoram o Yosafat aingohaka, o Yehuda manga koano.

¹⁸Ma jarita mahomoa ima korona okia ma Koano Ahazia wadodiai itulihi o Israeloka manga Kokoano manga Sejarah mabuku magoronaka.