Read Tobelo O KOKOANO MAHINOTOKA 10 Bible Online

O KOKOANO MAHINOTOKA 10 - Tobelo bible

O KOKOANO MAHINOTOKA 10

¹Ma Koano Ahab to ünanga aingohaka deʼ ai danongo yamori tumidi o Samaria makotaoka. Hababu gënanga o Yehu wohi dingoto o hurata o Samariaika, o Ahab aingohaka de ai danongo de ya popaliaraika de yokö kokuahaika ikali o kawaha yahibö balu-baluhu o kotaoka gënanga. O hurata gënanga mademo hoko nënanga,

²”O Ahab aingohaka de ai danongo naga tingini nia gogoana magoronaka, de ngini de nia kureta nihi poparangi, o kuda, o daë de o kota mabebeno o mehele. Hababu gënanga, ngini nia tarima iböto o hurata nënanga itaiti,

³nia iriki duru ma oa-oa o Ahab aingohaka de ai danongo manga hidogoronaino gënanga, de niwi goraka ünanga wodadi o koano, daha niparangi niwi riwo ünanga.”

⁴Yakö kokuaha o Samaria idadi yohawana. Önanga yato, ”Ma Koano Yoram de ma Koano Ahaziaö mayakunua iwi lawani o Yehu, okia hongoli ngone!”

⁵Karana gënanga o kadatoka manga baluhu de mawali kota ima kinïki o kawaha manga balu-baluhu de o Ahab aingohaka de ai danongo manga wakili gënanga ihi dingoto o abari nënanga o Yehuika, ”Ngomi mi ihene Tuangika de mima sadia mia diai okia dika Tuanga nomï hipareta ngomiino. Ngomi aha mia gorakua o nagonaö yodadi o koano. Nadiai okia yaoa imamoteke ani lolegaka Tuanga.”

⁶Daha o Yehu wohi dingotoli o hurata onangika, mademo, ”Nako ngini naga ngohino niböa, ikali nima sadia nia moteke ahi pareta-pareta, nia toma o Ahab aingohaka de ai danongo gënanga, deʼ iyarehe maöraha hoko nënanga niao toönanga manga hae-haeke ngohino o Yizreeloka.” Ma Koano Ahab aingohaka de ai danongo yamori tumidi gënanga yogogere o kawaha manga balu-baluhoka o Samaria makotaka de yägoana önanga.

⁷Yatarima iböto o Yehu ai hurata, o kawaha manga balu-baluhu o Samaria makotaka gënanga yätoma o Ahab aingohaka de ai danongo gënanga daha toönanga manga hae-haeke yonoauku o karaja ma goronauku de ihi dingoto o Yehuika o Yizreelika.

⁸O hali gënanga ihi ngahu iböto o Yehuika, ünanga wohi pareta hupaya o haëke-o haëke gënanga ihi kalape idadi o doomu hinoto o kota mangorana ma mo-amokoka, de yamal̄aika genangoka hiädono o ngorumino.

⁹O ngoru-ngorumino o Yehu wohupu o ngorana ma amo-amokika, daha wätemo hagala o nyawaika ima totoomuino genangoka, ”Ngohila mima ketemoka miwi lawani ma Koano Yoram de miwi toma ünanga; ngini nia howonua o hali nënanga magoronaka. Mä o nyawa mata-mata nënanga ngohiua tä toma.

¹⁰Nënanga ma nyonyata hagala wotö temo-temoka ma Jou mangale o Ahab aingohaka de ai danongo aha idadi. Ma Jou wadiaioka okia waheto-hetongo itilakuru Ai gilaongo o Elia.”

¹¹ Ipaha o Yehu wätoma mata-mata ai roriadodoto o Ahab mahomoa yogö gogere o Yizreeloka, de mata-mata o pegawe, ai dodiawo ito tigi-tigi, ai imam-imam; moiua ö wa mal̄aika yo wango.

¹²O Yehu wamal̄a o Yizreel daha wöiki o Samariaika. O ngekomo mahi dogoronaka, o ngï yahö heto-hetongo ”O gogoana manga Kapongo”,

¹³ünanga imaka make de yamuruono naga ai roriadodoto o Ahazia o Yehuda manga koano. Unanga wä leha, ”Ngini o nagona?” ”Ngomi o Ahazia,” ai roriadodotoönanga yohaluhu. ”Ngomi mimau mi öiki o Yizreelika mangale mia’ lega ma koano ai tau manyawa yo ngodumu de ma Jou Boki o ngo Izebel ami ngohaka de ami danongo.”

¹⁴”Nia tagoko önanga kayo wango-wango!” wapareta o Yehu ai nyawaika. Daha hagala o nyawa gënanga yätagoko, daha yä toma itigioka moi o humu madududungu, mata-mata ya 40. Kaima tëngo maya mal̄aikaua yowango.

¹⁵O Yehu wohi gila-gila ai dodagi. O dodagimahi dogoronaka, ünanga wïbuhuku o Yonadab o Rekhab aingohaka. O Yehu witabea unangika deʼ wïtemo, ”Koigoungua ngone hohininga moi? Kanö modeke ngona nohi riwo ngohi?” ”Iya,” o Yonadab wohaluhu. ”Nako hoko gënanga, naino ngone homa dahi,” o Yehu wabalahi. Onanga ima dahi, de o Yehu wiriwo o Yonadab wodoa ai kureta magoronail̄e,

¹⁶daha wotemo, ”Naino nohi nïki de nahakihi mahirete sarakia ahi buturungu ngohi mangale ma Jou.” Daha önanga ima kutuono yobarene o kureta o Samariaika.

¹⁷Imahi adonika dokengoka o Yehu wätoma mata-mata o Ahab ai roriadodoto, kaima tengö mayo gogogerua. O hali gënanga idadi imamoteke de okia wotö temo-temo ma Jou o Eliaika.

¹⁸O Yehu wähuloko o Samaria manyawa ima toomu daha ünanga wätemo, ”Ma Koano Ahab wokuatua woma higilaongo o Baalika; ngohi aha iholoi tokuata ngaro de ünanga.

¹⁹Hababu gënanga nia toomu mata-mata o Baal manabi deʼ yahö huba-huba ikali ma imam-imam; kaima tengö mauha ni mal̄a. Ngohi aha tohihuba o huhuba ma amo-amoko mangale o Baal. O nagona yoböaua aha tähukumu yohonenge.” Mä gënanga duga-duga o akali moi o Yehuino mangale wätoma mata-mata yahuba-huba o Baal.

²⁰O Yehu wohi döaka o pareta nënanga: ”Nihi gogere o wange moi niodingakoka mangale nia huba o Baal!” Daha o nyawa ihi gogere o wange gënanga,

²¹deʼ o Yehu wahi ngahu o Israeloka yongodumu. O wange gënanga mata-mata yoböa yahuba-huba o Baal, kamoiö de yogogogerua. Önanga yowohama o Baal matauika deʼ yaomanga o tau gënanga mahimangoka hiädono maporetoka.

²²O Yehu wahi pareta hupaya ihi dodailako o puji mapakeanga o gomanga ma puji ma tauoka gënanga ya hi döaka o pakeanga-o pakeanga gënanga hagala o nyawaika yobö böa-böa mangale yopuji o Baalika. O pareta gënanga yadiai iböto,

²³o Yehu wowohama o Baal matau gënanga ima nïki o Yonadab o Rekhab aingohaka, de wätemo hagala o nyawaika dokengoka, ”Niä tailako de madiai boteka mata-mata yo böa-böa nënanga duga-duga yahuba-huba o Baal. Uha hi ädono naga nenangoka o nyawa iwihö huba-huba ma Jou.”

²⁴Daha o Yehu de o Yonadab ihi huba o huhuba o Baalika. O tau maporetoka, o Yehu wahi gogeroka yamori tufange yo goa-goana de o tentara manga baluhu. Unangö wohi döakoka o pareta nënanga onangika, ”Ngini kiani nia toma o nyawa gënanga mata-mata. O nagona yamal̄aika ima tengo onangino ihi oara manga diri, aha yätoma!”

²⁵De ma japatioka o Yehu wohihuba o huhuba ibötino, ünanga wohupu de watemo yogoa-goanika de o tentara manga balu-baluhika gënanga, ”Niwohama deʼ nia toma önanga mata-mata. Uha nia mal̄a ika kaima tengö yo otana!” Daha önanga yowohama de manga oworo ima rahukil̄e, de yätoma o nyawa mata-mata genangoka, daha yatauru o mayeti-o mayeti gënanga ihi hupu. Ipaha önanga yowohama o gomanga matau doka mago goronaika,

²⁶deʼ ihi hupu o Baal madulada daha yatuhuku.

²⁷O dulada gënanga yakilianga ima kinïki ma tau daha o ngï gënanga yadiai manga kakusu hiädono o wange nënanga.

²⁸Hoko gënanga o Yehu wabinaha wamata-mataka yahö huba-huba o Baal o Israelokaka mabereraka.

²⁹ Hababu gënanga ma Jou wotemo hoko nënanga o Yehuika, ”Hagala Tohi poparetaka ngonaika mangale nadiai o Ahab ai difa ukuika ngona nadiaioka. Karana gënanga Ngohi tojaji ani ngohaka de ani danongo hi ädono ani difauku o lape iata aha yodadi o koano mangale o Israeloka.” Mä o Yehu de ai hininga ma gahumua wo hi ngounu ma Jou Ai tita, o Israeloka manga Jou Madutu. Unanga wanïki o Yerobeam ai manarama ya diai o Israeloka manyawa yobaradoha de yahuba o hapi o gurasi wohigö goko-goko o Beteloka de o Danoka.

³²Öraha gënanga ma Jou womulaenge wa eteke o Israel madaera. O Hazael o Siria manga koano waora o Israel madaera ingodumu

³³o Yordan ma Ngäiri o wange ma hiwaroko i daduoka hiädono o korehara il̄e magurutika o Aroer ma kota itigi o Arnon ma Ngairi, iwohamaika o Gilead de o Basan madaera, o ngï yo gogögere o höana o Gad, o Ruben de o Manasye o wange ma hiwaroko.

³⁴Majarita ma homoa ima korona o Yehu, yo ngohamika ai oa-oa ai barani, i tulihi o Israeloka manga Kokoano manga Sejarah ma buku magoronaka.

³⁵O Yehu wo pareta hokä o Israeloka manga koano o taongo monaoko de tufange ma dëkana. Unanga wo honenge de i wi jere o Samariaoka. Daha aingohaka o Yoahas wo dadi o koano wi tagali ünanga.