Read Tobelo O KOKOANO MAHINOTOKA 11 Bible Online

O KOKOANO MAHINOTOKA 11 - Tobelo bible

O KOKOANO MAHINOTOKA 11

¹Maöraha o ngo Atalya mohi öriki ma Koano Ahazia, ami ngohaka, wohonengoka, munanga mohi pareta hupaya o Ahazia ai tau manyawa yo ngodumu yätoma.

²O Yoas o Ahazia aingohaka ngadeke iwi tomaö ima kinïki ma koano ai ngoha-ngohaka o nauru mahomoa, maʼ ünanga wo otana karana mihi halamati o ngo Yoseba ngoi ayo o dodoto. O Yoas de mipopaliara yaao de yangiunika o kamari ima idu-idu moioka ma Jou Ai Tauoka.

³O taongo butanga madekana o ngo Yoseba mipaliara o ngohaka gënanga ma Jou Ai Tau magoronaka maöraha o ngo Atalya mopareta hokä o koano o ngoheka.

⁴O taongo matumidoka, o tentara manga balu-baluhu yo goa-goana ami diri ma koano de yogoa-goana o kadato wä ahoko ma Imam Yoyada mangale ima kamake dede ünanga ma Jou Ai Tauoka. Dokengoka ünanga wähuloko önanga yo koboto mangale yadiai ai datoro. Unanga wahi matoko o Yoas, ma Koano Ahazia aingohaka o nauru, onangika,

⁵deʼ wahi döaka o pareta nënanga, ”Maöraha okia ngini nimanarama o puji mawangeoka, nginino nia regu hange o regu moi kiani yogoana o kadatoka,

⁶o regu moioli o Sur mangorana ma amo-amokoka, de maboloi mangorana ma amo-amokoka maporetoka yo goa-goana mahomoa.

⁷O doomu hinoto yapö paha-pahaka manga manarama o Sabat mawangeoka, kiani ima goana ma Jou Ai Tauoka de manga oworo imä rahukil̄e mangale iwi goana ma koano Yoas. Ngini kiani niwï goana ünanga kiaika dika ünanga wöiki, deʼ moi-moi o nyawa ihi tai-taili imahi tigi nginika, kiani ngini nia toma.”

⁹O tentara manga balu-baluhu gënanga yamoteke o Yoyada aipareta deʼ yaao unangika toönanga manga nyawa kokiani yo manarama de yapaha-pahaka o manarama o Sabat mawangeoka gënanga.

¹⁰O Yoyada wahi döaka o tentara manga balu-baluhika gënanga o kuama-o kuama de o dadatoko-o dadatoko toma Koano Daud, yagö gogonika ma Jou Ai Tauoka.

¹¹Daha yogö goa-goana, moi-moi de manga oworo ima rahukil̄e, ima l̄ë toönanga manga ngï ma Jou Ai Tau mahimangiha idaduoka yakilolitino mangale iwi goana ma koano.

¹²Iböto gënanga o Yoyada wï ao o Yoas wihihupu, daha wigelenga o makota ai häekoka, de wohilapahi unangika ma Jou Madutu ai Tita mabuku. O Yoas iwi tede hokä o koano de o hali gënanga ihi ngahu o kawahaika. Mata-mata yopopoka deʼ youlili, ”No wango koano!”

¹³Ma koano o ngo Atalya moihene o ulili de o hagaga yogö goa-goana de o kawaha. Momä tai-taiti munanga möiki ma Jou Ai Tauika, kiaka o nyawa yowoë-woë ima totoomuino.

¹⁴ Munanga mimake ma koano mahungi gënanga womaokoino o ngoranoka howö woha-wohama ma Jou Ai Tauika kiaka ünanga iwitö tede-tede, iwi kilolitino o tentara manga balu-baluhu de o trompet yowuwu. De ami hininga ihuha o ngo Atalya makakihi ami pakeanga, de mopöaka, ”Nisetiaua! Nisetiaua!”

¹⁵O Yoyada wahi gumal̄aua o ngo Atalya imi toma ma Jou Ai Tau ma gilolitino, ho ünanga wätemo o tentara manga balu-baluhika, ”Nimi ao munanga nimihihupu nia tilakuru yogoa-goana manga duduono de nia toma o nagona dika ihi dailako imi hihalamati munanga.”

¹⁶Önanga imi tagoko munanga, daha imi ao o kadatoika. Dokengoka munanga imi toma o Kuda ma Ngorana ma Amo-amoko ma himangoka.

¹⁷Ma Imam Yoyada wï hüloko ma Koano Yoas de o kawaha yodiai o jaji de ma Jou önanga aha yodadi ma Jou Ai umati. Unangö wïhuloko ma koano wodiai o jaji de o kawaha.

¹⁸Iböto gënanga o kawaha yaparangi de yakilianga o Baal mapuji matau. O huhuba mangï ikali o dulada-o dulada yawedere, de o Matan, o Baal ma imam iwi toma o huhuba-o huhuba mangï gënanga mahimangoka. O Yoyada wahimanarama yogö goa-goana mangale yogoana ma Jou Ai Tau,

¹⁹daha ünanga ima kinïki o tentara manga balu-baluhu, ma koano ai diri yogoa-goana de yogoa-goana o kadato ikali o kawaha yongodumu iwihiduono ma Koano Yoas ma Jou Ai Tauoka de yaino o kadatoika. O Yoas wowohama wanonu o Gogoana ma Ngorana ma Amo-amoko, daha wogogeruku o pareta makuruhi mal̄okuoka.

²⁰O kawaha yongodumu yomorene, o kotaö o ridï de o ngo Atalya imi tomaka.

²¹O Yoas ai umuru o taongo tumidi maöraha ünanga wodadi o Yehuda manga koano.