Read Tobelo O KOKOANO MAHINOTOKA 12 Bible Online

O KOKOANO MAHINOTOKA 12 - Tobelo bible

O KOKOANO MAHINOTOKA 12

¹O taongo matumidoka o Yehu aipareta mangale Israel, o Yoas wodadi o koano o Yehudaoka. Unanga wopareta o Yerusalemoka o taongo moruata ma dekana. Ngoi Ayo ami romanga ongo Zibya o Bersyeba makotaino.

²Ma imam Yoyada ai dodotoko mabarakati, o Yoas ai wowango magurutu wadiai yasanangi ma Jou Ai hininga.

³Duga-duga hö dora, o gikiri yahuba-huba mangï ya kiliangua, hi ädono o kawaha kaihi hubahi o huhuba de yo duhuku o manyanyi genangoka.

⁴ O wange moiuku o Yoas wä ahoko o imam-imam de wähuloko önanga yagogono o tiwi yamö make-make o huhuba-o huhubaino ma Jou Ai Tauoka, yaoa o tiwi ihi fangu ihi paliara o huhuba, yaoa o tiwi ihi döaka de manga hininga mahuka.

⁵Moi-moi o Imam kiani yatagongo mabobaluhu mangale o tiwi ihihö huba-huba hagala o nyawa yalö leleani. O tiwi gënanga aha yapake mangale ihi diai ma Jou Ai Tauoka ikö kokilianga.

⁶Hiädono mataongo monaoko de hangeoka o Yoas aipareta, o imam-imam kowahi ohiö yadiai ikokilianga ma Jou Ai Tauoka.

⁷Karana gënanga o Yoas wï ahoko ma Imam Yoyada ima kinïki o imam-imam mahomoa, de wätemo, ”Yadodoa nia diaiuahi ma Jou ai Tau? Mulaenge o wange nënanga ngini tinï higumal̄aokaua nia gogono o tiwi ngini nia totarima. Mata-mata kiani ngini nihilapahi mangale ihi diai ma Jou Ai Tau.”

⁸O Imam-imam yorimoi mangale yotoomuokaua o tiwi o kawahaino, de kowalioka imahi tagongo mabobäluhu mangale ihi diai ma Jou Ai Tau.

⁹Daha o Yoyada wa l̄ë moi o peti de wodiai mapidaha ma dadamunuku, daha wakelengauku o huba mangï madatekoka ma Jou ai Tau mangorana howoha-wohama manirakoka. Mata-mata o tiwi ihihö huba-huba ma Jou Ai Tauoka yonoa o peti gënanga ma goronauku o imam-imam yomö manarama o ngorana howö woha-wohamoka.

¹⁰Mahi geto-getongo nako o tiwi o peti magoronaka gënanga iwoëoka, ma koano ai juru tulihi ima kinïki ma Imam wo Lamo-amoko yoböa deʼ yaetongo o tiwi gënanga, daha yahawo.

¹¹Magegetongo yatulihi iböto, o tiwi gënanga ihi lapahi yomomanarama ihidiai ma Jou Ai Tauoka, manga gogoanika. Gila-gila yagö goa-goana gënanga yabangu yotö tuka-tukanga o gota, ihitö tuka-tukanga o tau,

¹²yomö mehe-mehele de yohohonotoko o helewo. Yogö goa-goana gënanga yoijaö o gota deʼ o helewo, ikali ya tatoro mata-mata ihihö hupu-hupu mangale ihi diai gënanga.

¹³Mä o tiwi gënanga mahuhutulö maya pakeua mangale yadiai o udo-udomo o haaka, o mangko, o trompet, o hilo ma pakakaha, ekola o pakakaha ma homoa o gurasino ekola o haaka.

¹⁴Mata-mata yofangu o tuka-tukangika deʼ ihi ija o tau mapakakaha-mapakakaha yopoparalu.

¹⁵ Yogö goa-goana o manarama gënanga duru manga hininga irïkoto, hö iparaluua yogahoko o tiwi ihi ngahu onangino.

¹⁶ O tiwi o rugi madagali mahuhubaino deʼ o baradoha ma apongo mahuhubaino yonoaua o peti gënanga magoronauku. O tiwi gënanga yahi döaka o imam-imamika.

¹⁷Oraha gënanga o Hazael o Siria manga koano wä parangi deʼ wogogere o Gat makota. Daha ünanga ai dungutu wäparangi o Yerusalem ö.

¹⁸Daha o Yoas wohi dingoto unangika o duduhuhu matiwi. O tiwi gënanga wamake o huhubaino mata-mata mahira wohi lolapahioka ma Jouika mangale o Yoas mahirete, deʼ mangale o Yosafat, o Yoram ikali o Ahazia, enagënanga o kokoano yopopareta kowahi de ünanga. Hoko genangoli o gurasiino mata-mata ma Jou Ai Tau mabuku magoronaka deʼ ma koano ai kadato. Daha o Hazael idadiokaua wäparangi o Yerusalem.

¹⁹Ipaha o Yehuda mapareta mapegawe-pegawe yodiai o doomu madorou iwi lawani ma Koano Yoas. O nyawa yahinoto toönanga manga hidogoronaino, enagënanga o Yozakar o Simeat aingohaka, deʼ o Yozabat o Somer aingohaka, iwi toma o Yoas o tau moioka i higö goko-goko o tonaka ito toporono ma l̄okuoka o Yerusalem o wange ma hiwaroko idaduoka, mangekomoka iö uti-uti o Silaika. O Yoas iwi lungunu o kokoano manga jere o Daud ai kotaoka. O Amazia aingohaka wodadi o koano witagali ünanga. Majarita mahomoa yakorona ma Koano Yoas itulihi o Yehuda manga Kokoano ma Sejarah mabuku magoronaka.