Read Tobelo O KOKOANO MAHINOTOKA 13 Bible Online

O KOKOANO MAHINOTOKA 13 - Tobelo bible

O KOKOANO MAHINOTOKA 13

¹Ma taongo monaoko de hangeoka aipareta o Yoas o Ahazia ai ngohaka mangale o Yehuda, o Yoahas o Yehu aingohaka wodadi o Israeloka manga koano, deʼ ünanga wopareta o Samariaka o taongo ngimoi de tumidi madekana.

²Hokä ma Koano Yerobeam wopareta kowahi de ünanga, o Yoahas wobaradoha ma Jouika de idadi hababu o Israel ma nyawaö yobaradoha. Unanga komaiwahi wamal̄a ai manarama-manarama itotorou.

³Karana gënanga ma Jou wä ngamo o Israelika hiädono ünanga wamal̄aika o Hazael o Siria ma koano de aingohaka o Benhadad, ihi geto-getongo yähihanga o Israeloka.

⁴Daha o Yoahas womä niata ma Jouika, de ma Jou woihene ai niata gënanga, karana ma Jou wamake hokokia de mahayanga koiwa o Siria manga koano wätuku o Israeloka manyawa.

⁵Ma Jou wahi döaka o Israel manyawaika womatengo o tutuda wahilapahi önanga o Siria manga kuahaino hiädono önanga yowango yorïdoli hokä mahira.

⁶Ngaro hoko gënanga o Israeloka manyawa ima togumua yodiai o baradoha-o baradoha wamomulaenge ma Koano Yerobeam. Önanga hoko genangika yodiai o baradoha-o baradoha gënanga, de yamal̄aika o Dewi Asyera madulada kahirahi naga o Samariaka.

⁷O Israeloka manga tentara yopoparangi wabinahaka o Siria manga koano, hiädono ma Koano Yoahas duga-duga toünanga aitentara o kudauku yobare-barene yamoritoa, o kureta ihipo parangi ngimoi, de o tentaraoka yaribu ngimoi.

⁸Majarita mahomoa yakorona ma Koano Yoahas de mata-mata ai oa-oa ai barani itulihi o Israeloka manga Kokoano manga Sejarah ma buku magoronaka.

⁹Unanga wohonenge de iwi jere o Samariaoka. Aingohaka o Yoas wodadi o koano witagali ünanga.

¹⁰Ma taongo moruange de tumidioka aipareta ma Koano Yoas mangale o Yehuda, o Yoas o Yoahas aingohaka wodadi o Israeloka manga koano deʼ wopareta o Samariaka o taongo ngimoi de butanga madekana.

¹¹Unangö wobaradoha ma Jouika karana wanïki ma Koano Yerobeam ai dorou idadioka o hababu o Israel manyawa yodiai o baradoha.

¹²Ma jarita mahomoa yakorona ma Koano Yoas, yongohamika ai barani o parangi magoronaka wilawani o Amazia o Yehuda manga koano, itulihi o Israeloka manga Kokoano manga Sejarah mabuku magoronaka.

¹³O Yoas wohonenge deʼ iwi lungunu o kokoano manga jereoka o Samariaka. Aingohaka o Yerobeam mahinotoka wodadi o koano witagali ünanga.

¹⁴ O öraha moiuku ma Nabi Elisa wopanyake kai hiri, deʼ ma Koano Yoas woböa wï lega ünanga. Maöraha wïmake o Elisa tigi-tigi wohonenge, ma koano gënanga woari deʼ wotemo, ”Ahi ama, Ahi ama, o Israeloka manga gogoana wolamo-amoko!”

¹⁵”Na l̄ë o toimi ma l̄eha deʼ o toimi madoto!” o Elisa wipareta unangika. O Yoas wal̄ë,

¹⁶daha o Elisa wïhuloko ünanga woma hidiai mangale wotoimi. Ma Koanö woma hidiai, deʼ o Elisa wakelenga ai giama ma koano ai giama mal̄okuoka.

¹⁷Ipaha imamöteke de ma nabi gënanga aipareta, ma koano wa helenga o jangela o Siriaika yohima-himangika. ”Nohi toimi ani toimi!” o Elisa wipareta. De majapatioka ma koano wohi toimi o toimi gënanga iböto, ma nabi gënanga wopöaka, ”Ngona ma Jou Ai toimi. De o toimi gënanga ma Jou aha wa hihanga o Siria. Ngona aha nimateke parangi nalawani o Siria manyawa o Afekoka hiädono ngona nä hihanga önanga.”

¹⁸O Elisa wïhuloko ma Koano Yoas wal̄ë ai toimi-toimi mahomoa de wohi gohara o tonakuku. Ma koano wagohara o tonaka wohigali mahange, daha woma togumu.

¹⁹O Elisa wongamo, deʼ wotemo, ”Kokiani ngona nagohara hiädono nohigali mamotoa ekola mabutanga, done ngona yakunu nawedere o Siria mahoana. Maöraha nënanga ngona aha na hihanga duga-duga higali mahange.”

²⁰Itedekanua ipahaika o Elisa wohonenge deʼ iwi lungunu. O öraha gënanga o Moab manga doomu-doomu yororuaë mabiaha yaparangi o Israeloka manga berera o taongo moi mamoi.

²¹O wange moiuku maöraha o nyawa yamuruono naga magogiria yalungunu o nyawa yohone-honenge, itodokanino önanga yä mäke o Moab manga doomu yo roruaë yo böa. Gila-gila önanga i hikawelika dika o mayeti gënanga o Elisa ai lungunu ma goronaika daha imä oara. Hoko gënanga o mayeti gënanga yatigi o Elisa ai kobongika, o mayeti gënanga iwango okali daha ima oko.

²²O Yoas aipareta madekana, o Hazael o Siria manga koano wätuku o Israel manyawa.

²³Mä ma Jou wä dora Ai umatika de wahi apongo önanga. Unanga wöluku wä mal̄aika önanga yahohihanga maʼ wariwo önanga, mangale Ai jaji de o Abraham, o Ishak de o Yakub. Hiädono öraha nënanga komaiwahi Unanga wä wohanga Ai umati.

²⁴Ipaha o Hazael o Siria manga koano wohonenge, deʼ ai ngohaka o Benhadad wodadi o koano.

²⁵Daha o Yoas o Israeloka manga koano wihohihangoka o Benhadad higali mahange deʼ wa l̄ë okali o kota-kota wa l̄ë-l̄ëoka o Benhadad maöraha wopareta ma Koano Yoahas o Yoas ai ama.