Read Tobelo O KOKOANO MAHINOTOKA 14 Bible Online

O KOKOANO MAHINOTOKA 14 - Tobelo bible

O KOKOANO MAHINOTOKA 14

¹Mataongo hinotoka aipareta o Yoas o Yoahas aingohaka mangale o Israel, o Amazia o Yoas aingohaka wodadi o Yehuda manga koano.

²Öraha gënanga ünanga ai umuru o taongo monaoko de motoa, deʼ ünanga wo pareta o Yerusalemoka o taongo monaoko de hiwo madekana. Ngoi ayo enagënanga o ngo Yoadan o Yerusalemino.

³O Amazia wodiai ma Jou Ai hininga yasanangi, maʼ ünanga hokä o Daudua, ai tohora. Hokä ai ama,

⁴unangö wakiliangua o gikiri yahuba-huba mangï, hiädono o kawaha hoko genangika dika ihihuba o huhuba deʼ yotuhuku o dupa dokengoka.

⁵De majapati ai kuaha ikuatoka, o Amazia wähukumu yohonenge o pegawe-pegawe iwito toma-toma ai ama.

⁶ Mä o pegawe-o pegawe manga ngoha-ngohaka gënanga yatomaua, karana ünanga wamoteke ma Jou Ai pareta o Musa ai Buku magoronaka mademo, ”Uha niä hukumu yohonenge o dimono karana o dorou yadodiai toönanga manga ngoha-ngohaka, deʼ uha nia hukumu yohonenge o ngoha-ngohaka, karana o dorou yadodiai toönanga manga dimono. O nyawa moi-moi duga-duga yakunu yähukumu yohonenge karana o dorou yadodiai mahirete.”

⁷O parangi moi magoronaka, o Amazia wätoma o Edom manga tentara ya 10.000 o Asin ma Waioka, waora o Sela ma kota. O kota gënanga ihi romanga o Yokteel. Hiadono öraha nënanga o kota gënanga ma romangaka o Yokteelohi.

⁸Ipaha o Amazia wahi dingoto ai huhuloko o Yoasika o Israeloka manga koano mangale wihigaro ünanga ima teke parangi.

⁹Mä ma Koano Yoas wohi dingoto o bobaluhu nënanga, ”Oraha moiuku o momo mahohihika o Libanon mal̄okuoka ihi dingoto o abari nënanga o Liwewuru mautuika, ’Hei Liwewuru mautu, nihi döaka ani ngohaka o moholehe ahi ngohakika mangale modadi ngoi hekata.’ Mä ipaha yakaino genangino o aiwani o honganika o dutu moi yadoko-doko o momo mahohihika gënanga.

¹⁰Ngona Amazia, idadioka ani hininga ikurutil̄e, karana ngona nä hohihangoka o Edom manyawa. Aa, koigoungua o utumu gënanga iyaoaka? Kayaoa nogogogere dika o tauoka! Mangale okia nolingi-lingiri o hali duga-duga aha ihi bodito ani diri de ani kawaha?”

¹¹Mä o Amazia o Yehuda manga koano wolegaikaua ai demo-demo o Yoas o Israeloka manga koano. Karana gënanga, ma Koano Yoas deʼ ainyawa imä jobo o Bet-Semesika o Yehudaka deʼ ima teke parangi deʼ o Amazia dokengoka.

¹²O Yehuda manga tentara yahihangoka de mata-mata aitentara yo piringana yolio manga tauika moi-moi.

¹³O Yoas witagoko o Amazia, daha wöiki o Yerusalemika deʼ wakilianga o kota mabebeno o mehele gënanga magurutika o metere o ratuhu hinoto yadodagika, mulaenge o Efraim mangorana ma amo-amoko hiädono o Sudut o ngorana ma Amo-amokika.

¹⁴Mata-mata o gurasi deʼ o haaka ikali mata-mata o pakakaha wamö make-make ma Jou Ai Tauoka, mata-mataö o arata o kadatoka, ima kinïki o nyawa yamuruono naga yätumu-tumunguku wähidotao o Yoas o Samariaika.

¹⁵Majarita mahomoa yakorona ma Koano Yoas, yongohamika ai barani wilawani o Amazia o Yehuda manga koano itulihi o Israeloka manga Kokoano manga Sejarah ma Buku magoronaka.

¹⁶O Yoas wohonenge deʼ iwi lungunu o kokoano manga jere o Samariaka. O Yerobeam mahinotoka aingohaka wodadi o koano witagali ünanga.

¹⁷O Yoas o Israeloka manga koano wohonengoka, o Amazia o Yehuda manga koano, kawowangohi o taongo ngimoi de motoaoli.

¹⁸O Yerusalemoka naga o doomu yododiai o dorou yomau iwi toma o Amazia. Karana gënanga ünanga woara o Lakhisika, maʼ ai haturu-haturu iwi ginïki ünanga dokengika deʼ iwi toma. Ai mayeti yao de o kuda o Yerusalemika, daha yalungunu o kokoano manga jereoka o Daud ai Kotaoka. Daha o Yehuda makawaha iwi tede o Uzia, o Amazia aingohaka o nauru wodadi toönanga manga koano. Öraha gënanga o Uzia ai umuru daha o taongo ngimoi de butanga. Ma jarita mahomoa yakorona ma Koano Amazia itulihi o Yehuda manga Kokoano manga Sejarah mabuku magoronaka.

²²Ai ama wohonengoka, o Uzia waora okali o Elat makota deʼ wohi goko okali.

²³O taongo mangimoi de mamotoaoka o Amazia wopareta, o Yoas aingohaka mangale o Yehuda, o Yerobeam mahinotoka o Yoas aingohaka wodadi o Israeloka manga koano, deʼ wopareta o Samariaoka o taongo moruata deʼ moi madekana.

²⁴Unanga wobaradoha ma Jouika, karana wanïki ai dorou ma Koano Yerobeam madodihiraka yadiaioka o hababu o Israel manyawa yobaradoha.

²⁵ O Yerobeam mahinotoka nenangala waora okali o Israeloka manga daera ingodumu, o Hamatika mangekomo o koremieuku de yaino hiädono o Honenge ma Ngöto o koreharail̄e. Genanga imamoteke deʼ ma Jou Ai jaji, o Israeloka manga Jou Madutu, itilakuru Ai gilaongo ma Nabi Yunus o Amitai aingohaka o Gat-Hefer manyawa.

²⁶Ma Jou wamake hokokia manga hangihara o Israeloka ma nyawa, de o nyawa moiuaö yariwo önanga.

²⁷Ma Jou Ai dungutua wä wedere o Israeloka mangale kahi ado-adonika, karana gënanga ünanga wäriwo önanga itilakuru ma Koano Yerobeam mahinotoka.

²⁸Ma jarita mahomoa yakorona ma Koano Yerobeam mahinotoka, yakorona ai barani hagala o parangi magoronaka deʼ sarakia ünanga waora okali o Damsyik deʼ o Hamat o Yehudaino mangale o Israel, mata-mata itulihi o Israeloka manga Kokoano manga Sejarah ma Buku magoronaka.

²⁹O Yerobeam mahinotoka wo honenge deʼ iwi lungunu o kokoano manga jereoka. Aingohaka o Zakharia wodadi o koano witagali ünanga.