Read Tobelo O KOKOANO MAHINOTOKA 15 Bible Online

O KOKOANO MAHINOTOKA 15 - Tobelo bible

O KOKOANO MAHINOTOKA 15

¹Ma taongo monaoko de tumidoka ma Koano Yerobeam mahinotoka wapareta o Israeloka, o Uzia o Amazia aingohaka wodadi o Yehuda manga koano.

²Öraha gënanga ünanga ai umuru o taongo ngimoi deʼ butanga deʼ wopareta o Yerusalemoka o taongo moritoa deʼ hinoto madekana. Ngoi ayo ami romanga o ngo Yekholya, o Yerusalem ma ngoheka.

³Hokä ai ama, o Uziaö wadiai ma Jou Ai hininga wasanangi.

⁴Mä duga-duga moi, ünanga wakiliangua o gikiri yahuba-huba mangï, hiädono o kawaha kahirahi ihihuba o huhuba de yotuhuku o dupa genangoka.

⁵Ma Jou widiai ünanga watagongo o panyake o pado hobö borohono, dë hiädono ünanga wohonenge, o panyake gënanga itogu-togumua. Unanga iwi tingakika o tau moioka deʼ iwi hibebasi hagala ai manaramoka. Aingohaka o Yotam wapareta o kawaha hokä ai wakili.

⁶O jarita mahomoa ima korona ma Koano Uzia itulihi o Yehuda manga Kokoano manga Sejarah ma Buku magoronaka.

⁷ O Uzia wohonenge deʼ iwi lungunu o Kokoano manga jereoka o Daud ai kotaoka. Aingohaka o nauru o Yotam wodadi o koano witagali ünanga.

⁸Ma taongo moruange deʼ tufangeoka ma Koano Uzia wapareta mangale o Yehuda, o Zakaria o Yerobeam mahinotoka aingohaka wodadi o Israeloka manga koano deʼ wopareta o Samariaoka o mede butanga madekana.

⁹Hokä ima tero o kokoano yopö popareta kowahi deʼ ünanga, unangö wobaradoha ma Jouika. Unanga wanïki ai dorou ma Koano Yerobeam madodihiraka, yadiaioka o hababu o Israeloka yobaradoha.

¹⁰O Salum o Yabes aingohaka wodiai o doomu madorou iwi lawani ma Koano Zakharia, deʼ iwi toma ünanga o Yibleamoka, daha wodadi o koano witagali ünanga.

¹¹ De hoko gënanga idadi okia ma Jou wojä jajioka ma Koano Yehuika aingohaka deʼ ai danongo hiädono aidifauku o lape iata yodadi o koano mangale o Israeloka. Majarita mahomoa ima korona ma Koano Zakharia, itulihi o Israeloka manga Kokoano manga Sejarah ma Buku magoronaka.

¹³Mataongo moruange deʼ hiwo ma Koano Uzia aipareta mangale o Yehuda, o Salum o Yabes aingohaka wodadi o Israeloka manga koano. Unanga wopareta o Samariaka duga-duga o mede moi,

¹⁴karana o Menahem o Gadi aingohaka wöiki o Tirza de waino o Samariaika, daha witoma o Salum, de wodadi o koano witagali ünanga.

¹⁵Ai dodagi magoronaka o Tirza de waino, o Menahem wawedere kama moiuku o Tifsah makota deʼ madaera-daera magilolitino ikali wäbinaha manyawa yongodumu. Karana o kota gënanga yoluku imahi döaka unangika, daha ünanga wabelaka manga mamata o ngongoheka o ngohaka ihiö ao-ao o kotaoka gënanga. Majarita mahomoa yakorona ma Koano Salum, yongohamika wododiai o doomu madorou, itulihi o Israeloka manga Kokoano manga Sejarah ma Buku magoronaka.

¹⁷Mataongo moruange de hiwo aipareta ma Koano Uzia mangale o Yehuda, o Menahem o Gadi aingohaka wodadi o Israeloka manga koano, deʼ wopareta o Samaria makotaoka o taongo ngimoi madekana.

¹⁸Ai wowango magurutu ünanga wobaradoha ma Jouika karana wanïki ai dorou ma Koano Yerobeam madodihiraka, yadiai o Israeloka yobaradoha.

¹⁹Maöraha o Pul o Asyur manga koano waparangi o Israeloka, o Menahem wihidöaka unangika o haaka o kilo ribuhu moruange de iata hupaya ünanga wiriwo wäkuata ai kuaha o Menahem mangale o Israel.

²⁰Madodagi o Menahem wamake o tiwi gënanga enagënanga de mapakisa hagala o kaya manyawa o Israelokaka ihi döaka o nyawa moi-moi o tiwi o haaka moritoa. Karana gënanga o Pul wamal̄a o kota gënanga deʼ wolio ai bereraika mahirete.

²¹Ma jarita mahomoa yakorona ma Koano Menahem itulihi o Israeloka manga Kokoano manga Sejarah ma buku magoronaka.

²²Unanga wohonenge deʼ iwi lungunoka, daha aingohaka o Pekahya wodadi o koano witagali ünanga.

²³Mataongo moritoaoka aipareta ma Koano Uzia mangale o Yehuda, o Pekahya o Menahem aingohaka wodadi o Israeloka manga koano deʼ wopareta o Samariaka o taongo hinoto madekana.

²⁴Unanga wobaradoha ma Jouika karana wanïki ai dorou ma Koano Yerobeam madodihiraka, yadiai o hababu o Israeloka yobaradoha.

²⁵Womatengo ai o tentara manga balu-baluhino, enagënanga o Pekah o Remalya aingohaka, yodiai o doomu madorou de o nyawa yamoritoa o Gileadino. Daha o bebeno o mehele moi magoronaka o kadatoka o Samariaka önanga iwi toma o Pekahya ya hikinïki o nyawa yahinoto mahomoa manga romanga o Agrob deʼ o Arye. Ipaha o Pekah wodadi o koano witagali o Pekahya.

²⁶Majarita mahomoa ima korona ma Koano Pekahya itulihi o Israeloka manga Kokoano manga Sejarah mabuku magoronaka.

²⁷Mataongo moritoa de hinotoka aipareta ma Koano Uzia mangale o Yehuda, o Pekah Remalya aingohaka wodadi o Israeloka manga koano. Unanga wopareta o Samariaka o taongo monaoko madekana.

²⁸Unanga wobaradoha ma Jouika karana wanïki ai dorou ma Koano Yerobeam madodihiraoka, yadiai o Israeloka yobaradoha.

²⁹Maöraha o Pekah wopareta, o Tiglat-Pileser o Asyur ma koano waora o Iyon makota, o Abel-Bet-Maakha, o Yanoah, o Kedes, o Hazor, o Gilead madaera, o Galilea deʼ o Naftali. Manyawa ö yaao hokä o dagokino o Asyurika.

³⁰Mataongo monaokoka aipareta ma Koano Yotam o Uzia aingohaka mangale o Yehuda, o Hosea o Ela aingohaka wodiai o doomu madorou wilawani ma Koano Pekah de wïtoma ünanga, daha wodadi koano witagali ünanga.

³¹Majarita mahomoa yakorona ma Koano Pekah itulihi o Israeloka manga Kokoano manga Sejarah ma buku magoronaka.

³²Mataongo mahinotoka aipareta ma Koano Pekah o Remalya ai ngohaka mangale o Israeloka, o Yotam o Uzia aingohaka wodadi o Yehuda manga koano.

³³O öraha gënanga ünanga ai umuru o taongo monaoko de motoa deʼ ünanga wopareta o Yerusalemoka o taongo ngimoi de butanga. Ngoi ayo enagënanga o ngo Yerusa o Zadok ngoi ara.

³⁴O Yotam wadiai ma Jou Ai hininga wasanangi, hokä ai ama o Uzia.

³⁵Mä duga-duga moi, o gikiri yahuba-huba mangï wakiliangua hiädono o kawaha kahirahi dika ihihuba o huhuba deʼ yotuhuku o dupa genangoka. O Yotamla wohi goko o Ngorana ma Amo-amoko o Koremieuku ma Jou Ai Tauoka.

³⁶Maöraha o Yotam wopareta, ma Jou womulaenge wihi dingoto o Rezin o Siria manga koano de o Pekah o Israel manga koano mangale yaparangi o Yehuda. Majarita mahomoa yakorona ma Koano Yotam itulihi o Yehuda ma Kokoano manga Sejarah ma buku magoronaka.

³⁸Unanga wohonenge de iwi lungunu o kokoano manga jereoka o Daud ai kotaoka. Aingohaka o Ahas wodadi o koano witagali ünanga.