Read Tobelo O KOKOANO MAHINOTOKA 16 Bible Online

O KOKOANO MAHINOTOKA 16 - Tobelo bible

O KOKOANO MAHINOTOKA 16

¹Mataongo ngimoi de tumidoka aipareta ma Koano Pekah o ngo Remalya ami ngohaka mangale o Israeloka, o Ahas o Yotam ai ngohaka wodadi o Yehuda manga koano.

²Oraha gënanga ünanga ai umuru o taongo monaoko deʼ ünanga wopareta o Yerusalemoka o taongo ngimoi de butanga. Unanga wanïkua ma Koano Daud ai wowango maoa-oa, ai ete de ai tohora, maʼ wadiai yasanangua ma Jou Ai hininga, ai Jou Madutu.

³ Unanga wowango hokä o Israeloka manga kokoano, aingohaka o nauru mahirete wihi huba hokä o huhuba o gikirika, imamoteke manga biaha itotorou hagala o nyawa waduhu-duhuoka ma Jou o Kanaan mabereraka maöraha o Israeloka manyawa yongohama o berera gënanga.

⁴O Ahas wohihuba o huhuba de woduhuku o dupa yohuba-huba o gikirika mangï-mangïoka ol̄oku-l̄okuoka de o gota-o gota mahoka irubu-rubu matimioka.

⁵ Oraha gënanga o Edom manga koano wakuahaoli o Elat ma kota deʼ waduhu o Yehuda manyawa yogogogere genangoka. Ipaha o Edom manyawa yo böa deʼ yogogere o kotaoka gënanga hiädono o wange nënanga. Öraha genangö o Rezin o Siria manga koano deʼ o Pekah o Israeloka manga koano yaparangi de ihi giloliti o Yerusalem, maʼyakunua iwi hihanga o Ahas.

⁷O Ahas wahi dingoto ai huhuloko o Tiglat-Pileserika o Asyur manga koano de o behehongo nënanga, ”Ngohi ani gilaongo tososetia; karana gënanga, ngohi togahoko, naino deʼ no hihalamati ngohi o Siria manga koano de o Israel manga koanoino magogiria ihi parangi ngohi.”

⁸O Ahasö wa l̄ë o gurasi deʼ o haaka ma Jou Ai Tauino, ikali o kadato ma arata, daha wohi dingoto hokä o hadia o Asyur manga koanoika gënanga.

⁹Ma Koano Tiglat-Pileser watarima o Ahas ai gogahoko, daha waparangi deʼ waora o Damsyik. Ma kota manyawa wa ao hokä o dagokino o Kirika, de ma koano, enagënanga ma Koano Rezin, witoma.

¹⁰Maöraha ma Koano Ahas wöiki o Damsyikika wï ädono ma Koano Tiglat-Pileser, ünanga wa make o huhuba mangï o kotaoka gënanga. Daha ünanga wohi dingoto ma Imam Uriaika o Yerusalemoka de maduüku o huhuba mangï gënanga deʼ ma duduga yakokorana de madodagi yongai-ngai.

¹¹Daha o Uria wohi goko moi o huba mangï ima tero de ma duüku de maduduga watö tarima gënanga, de o Ahas wo liouahi, wabötoka.

¹²Womahiädono o Damsyik de waino, o Ahas wamake o huba mangï gënanga ibötoka.

¹³Daha o huhuba mangï gënanga ma l̄okuoka ünanga wohi huba o huhuba o aiwani ikali o huhuba o gandum. Unangö woguhe o huhuba o angguru de o awunu o dame mahuhubaino o huba mangï mal̄okuoka gënanga.

¹⁴ O Ahas wamake o huhuba mangï o tabaga yo dinga-dingakoka mangale ma Jou ikelenga ma Jou Ai Tau de o huhuba mangï ma hungimahi dogoronaka. Karana gënanga o huhuba mangï o tabaga gënanga yatururu ma Jou Ai Tau ma himangino o koremiëuku i daduoka ai huba mangï ma hungi gënanga.

¹⁵Iböto gënanga ünanga witemo o Uriaika, ”Na pake ahi huba mangï ma pako-pako nënanga mangale natuhuku o huhuba o ngorumino de o huhuba o hutu-hutu wohihö huba-huba ma koano deʼ o kawaha, de woguhe genangoka o huhuba o angguru o kawahaino. No guheö o huhuba gënanga mal̄okuoka mata-mata o aïwani ma awunu ihihö huba-huba. De o huhuba mangï o tabaga i hira-hira gënanga mal̄aika ngohi ta pake mangale togahoko o hidumutu hagala-o womahino.”

¹⁶O Uria wadiai ma koano aipareta.

¹⁷ Ipaha o Ahas wakilianga o kureta-kureta tabaga yapö pake-pake ma Jou Ai Tauoka, deʼ yaiki hagala-o tampayanga o kureta-o kuretaino gënanga. O rube o tabaga ma pako-pako naga o hapi o tabaga ngimoi de hinoto ma poretoka gënanga wa l̄ë oli deʼ wakelengauku ma hohol̄e o helewo ma l̄okuoka.

¹⁸Daha mangale wa l̄ë o Asyur manga koano ai hininga, o Ahas wakilianga ma koano ai balairung ma Jou Ai Tauoka, de yabeno o ngorana wo woha-wohama ihitö tinga-tingakoka mangale ma koano.

¹⁹Ma jarita mahomoa yakorona ma Koano Ahas itulihi o Yehuda manga Kokoano manga Sejarah mabuku magoronaka.

²⁰ O Ahas wohonenge de iwi lungunu o Kokoano manga jereoka o Daud ai Kotaoka. Aingohaka o Hizkia wodadi o koano witagali ünanga.