Read Tobelo O KOKOANO MAHINOTOKA 17 Bible Online

O KOKOANO MAHINOTOKA 17 - Tobelo bible

O KOKOANO MAHINOTOKA 17

¹Mataongo ngimoi de hinotoka aipareta ma Koano Ahas mangale o Yehuda, o Hosea o Ela aingohaka wodadi o Israeloka manga koano, deʼ ünanga wopareta o Samariaoka o taongo hiwo madekana.

²Unanga wobaradoha ma Jouika, maʼ ai baradoha ima daenua ma amoko de o Israeloka manga kokoano manga baradoha yopopareta kowahi de ünanga.

³Unanga iwi parangi de iwi hihanga o Salmaneser o Asyur manga koano, hiädono o taongo higetongo ünanga kiani wofangu o soungu unangika.

⁴Maöraha moiuku, o Hosea wahidingoto ai huhuloko o So ika o Mesir manga koano mangale wogahoko o roriwo. Daha o Hosea womatogumu wofangu o soungu o taongo higetongo o Asyurika. Maöraha o Salmanesar wohi öriki mangale o Hosea ai manarama gënanga, ünanga wïtagoko o Hosea de wihi ngohama o bui magoronaika.

⁵Ipaha o Salmaneser o Asyur manga koano wä parangi o Israeloka de ya kilolitino o Samaria. O taongo mahangeoka ihi gogilolitino gënanga —

⁶ma rupa o taongo mahiwoka o Hosea aipareta — o Salmaneser wa ora o Samaria. Daha o Israeloka manyawa ya ao hokä o dagokino o Asyurika. O hidoku moi onangino wahi gogere o Halah makotaka, o hidoku moi o Habor ma Ngairi madatekoka o Gozan madaeraoka, deʼ o hidoku moioli o kota-kotaoka o Madai mabereraka.

⁷O Samaria itifa karana o Israeloka manyawa yobaradoha ma Jouika, toönanga manga Jou Madutu, wa hihalamatoka önanga o Mesir ma koanoino, de waao önanga wahi hupu o bereraino gënanga. Önanga yahuba o gikiri-o gikiri mahomoa,

⁸de yanïki o hoana de o berera manga biaha waduhu-duhuoka ma Jou maöraha o Israeloka manyawa yangika yaparangi o hoana de o berera gënanga. O Israeloka manyawa ya nïki manga adati de manga atoranga ihitö tatapuoka o Israeloka manga ko koano,

⁹de yadiai o hali-o hali ma Jou Ai hininga yadö dae-daenua, toönanga manga Jou Madutu. Önanga ihi goko o gikiri yahuba-huba mangï-mangï toönanga manga kota mata-mataika, yaoa o kota mai tetekoka yaoa o kota ma ago-agomoka.

¹⁰ O doporono yogetongo ma l̄okuoka, deʼ o gota yogetongo mahoka irö rubu-rubu matimioka, önanga ihi goko o tugu-o tugu de o Dewi Asyera madulada-dulada.

¹¹Onangö yoduhuku o dupa o huba mangi mata-mataika mangale o gikiri, hokä o hoana de o berera manga biaha ma Jou wa do duhu-duhuoka o Kanaan mabereraka. Onanga yahuba o gomanga, ngaroka ma Jou waduhunoka. Hagala toönanga manga manarama itotorou yamomiki ma Jou Ai gangamo.

¹²

¹³Ma Jou wahi dingoto Ai huhuloko-huhuloko de Ai nabi-nabi o Israel ma nyawaika deʼ o Yehuda, mangale ihi ädono o hohininga nënanga: ”Nima togumu nidiai o dorou deʼ nihi ngounu hagala o pareta de o tita tohidö doa-doakoka nia ete de nia tohoraika deʼ nginiika itilakuru o nabi-nabi, Ahi go gilaongo gënanga.”

¹⁴Mä o Israel deʼ o Yehuda yoluku yoihene. Onanga manga haëke itogowini hokä toönanga manga ete de manga tohora yo ngö ngaku-ngakua ma Jouika, toönanga manga Jou Madutu.

¹⁵O Israeloka deʼ o Yehuda yoluku ihi ngounu ma Jou Ai tita-ai tita deʼ yosetiaua Ai jajiika wadodiaioka de toönanga manga ete de manga tohora. Önanga yolega ikaua Ai hi daaere-hidaaere, maʼ yopuji o goma-gomangika ibö baragunaua, hi ädono önanga mahireteö idadi yobaragunaua, Önanga yanïki manga manarama o hoana de o berera yahi gogilolitino önanga, ngaroka ma Jou waduhunoka.

¹⁶ Önanga yatilakuru ma Jou Ai tita mata-mata, toönanga manga Jou Madutu, de yadiai hinoto o hapi o tabagaino mangale yahuba. Onanga yadiai o Dewi Asyera madulada, yahuba o murumu-o murumu de yahuba o Baal magomangika.

¹⁷ Önanga ihihuba toönanga manga ngoha-ngohaka hokä o huhuba ituhu-tuhuku o gikirika. Önanga yapake yosawaro ima pipidoro de yogähoko o hidumutu-o hidumutu yohou-hourika yakunu imako dohanga de o womaha-o womaha. Önanga hoko gënanga manga kuata yodiai o hali-o hali yasanangiua ma Jou ai hininga,

¹⁸hiädono Unanga duru wängamo onangika deʼ wahaduliokaua önanga. Unanga wa umo önanga o tonaka wahidö döa-döakoka onangika; igogogere duga-duga o Yehuda mapareta.

¹⁹Hagala o Yehuda ma nyawaö ihi ngounua ma Jou Ai tita-Ai tita, toönanga manga Jou Madutu. Önanga yanïki o Israeloka manyawa manga biaha-biaha,

²⁰daha ma Jou wohi goungokauaoli o Israeloka ma umati yongodumu. Unanga wa hükumu de wa hilapahi önanga toönanga manga haturuika ko ö iwa-iwa manga hayanga. Unanga wahaduliokaua önanga, maʼ wa umo önanga de o tonaka wahidö döa-döakoka onangika.

²¹Ma Jou wahikitingaka iböto o Israeloka deʼ o Yehuda, o Israeloka manyawa iwi goraka o Yerobeam o Nebat aingohaka wodadi toönanga manga koano. Daha o Yerobeam wadiai önanga iwi mal̄a ma Jou deʼ yadiai o baradoha ma ago-agomo.

²²Önanga yanïki o Yerobeam ai manarama deʼ kahirahi yadiai mata-mata o baradoha wadodiai,

²³hiädono mabaha ma Jou wahaduliokauaoli önanga, maʼ wa umo önanga de o tonaka wahidö döa-döakoka önanga. Genanga idadi imamoteke deʼ o hohininga ma Jou wohi döakoka onangika itilakuru Ai gogilaongo, o nabi-nabi. Hoko gënanga o Israeloka manyawa yä ao yaumo o Asyurika, deʼ genangoka önanga yogogere hiädono o wange nënanga.

²⁴Hokä o Israeloka manyawa manga dagali yao ao-ao yä umo gënanga, ma Koano Asyur wahi gogere o Samaria ma kota-kotaoka, hagala o nyawa o Babilino, o Kuta, o Awa, o Hamat, de o Sefarwaim. Hagala o nyawa gënanga yogogere o kota-o kota gënanga de yo ridi genangoka.

²⁵Maöraha madodihiraka önanga yo gögere genangoka önanga iwi horomatiua ma Jou; gënanga hababu ma Jou wado tagao o singa-o singa mangale yagoli utu onangino.

²⁶Daha o nyawa ihi ngahu o Asyur manga koanoika, hagala o nyawa wahi gogogere o kota-o kotaoka o Samariaoka yanakoua o berera gënanga magïkiri matita-matita. Genanga mahababu o gikiri gënanga yadotagao o singa mangale yagoli önanga.

²⁷Karana gënanga o Asyur manga koano wohi pareta hupaya o Imam womatengo yatumu-tumunguku manga hidogoronaino ya umo-umooka o Asyurika, iwihi dingotoli o Samariaika. ”Iwi huloko ünanga wolio deʼ wogogere dokengoka hupaya ünanga yakunu wadotoko hagala o nyawa gënanga mangale o berera ma gïkiri gënanga matita-matita,” ma koano wato.

²⁸Daha womatengo o Israeloka manga imam, yahi dodotaooka o Samariaino o Asyurika, wolio deʼ wogogere o Beteloka. Dokengoka ünanga wa dotoko o kawaha sarakia kokiani iwi huba ma Jou.

²⁹Mä hagala o nyawa yogogogere o Samariaoka gënanga kahirahi yodiai toönanga mahirete manga goma-gomanga deʼ ihi ngï o gomanga matau-matau magoronaka ihigö goko-goko o Israeloka manyawa mahira yogö gogere o kotaoka gënanga. O doomu moi-moi ima diai manga gomanga mahirete o kotaoka önanga yogö gogere:

³⁰O Babil manyawa ima diai o dulada o Gikiri, o Sukot-Benot, o Kuta manyawa ima diai o dulada o Nergal, o Hamat manyawa o dulada o Asima,

³¹o Awa manyawa o dulada Nibhas de o Tartak, o Sefarwain ma nyawa ihihuba toönanga manga ngoha-ngohaka hokä o huhuba ituhu-tuhuku o Gikirika deʼ o Adramelekh de o Anamelekhika.

³²Mahomoa de o gikiri yahuba gënanga, onangö iwi huba ma Jou. Önanga yä iriki toönanga manga hidogoronaino yo rupa-rupa o nyawa mangale yomanarama hokä o imam de mangale ihihuba o huhuba o gomanga matau-tauoka.

³³Hoʼ, önanga iwi huba ma Jou, maʼ yahubaö toönanga manga gikiri-gikiri mahirete, imamoteke de manga adati deʼ manga atorangika toönanga manga berera madutu.

³⁴ Hiädono öraha nënanga önanga kayanïkohi toönanga manga adati de manga atoranga. Önanga iwi pujiua ma Jouika de ihi ngounokauaö Ai tita-ai tita de Ai pareta-pareta wohidö doa-doaka o Yakub ai difaukuika, yahi romangö o Israel.

³⁵ Ma Jou wodiaioka o jaji ituruino nënanga deʼ o umati o Israeloka, ”Uha nipuji o gikiri-o gikiri mahomoa; uha nima ruku nia huba ënanga ekola nio leleani ënanga, ekola nihi huba o huhuba enangika.

³⁶ Nihi horomati Ngohi, ma Jou, Tini aooka ngini nihupu o Mesirino de o kuaha ilamo-amoko; nihihuba Ngohi de nihi huba o huhuba Ngohiino.

³⁷Nihi ngounu o tita-o tita de o pareta-o pareta Ta tö tuli-tulihoka mangale ngini. Uha nia puji o gikiri-o gikiri ma homoaika,

³⁸de uha nia wohanga o jaji Ngohi de ngini nanga hidogoronaka.

³⁹Nihi hingounu Ngohi, ma Jou, nia Jou Madutu, daha Ngohi aha Tinihi pidili ngini nia haturu-haturuino.”

⁴⁰Mä o Samaria manyawa gënanga yoluku yoihene; önanga kahirahi ima hijojo toönanga manga adati de manga atorangika.

⁴¹Hoʼ, önanga iwi huba ma Jou, maʼ yahubaö toönanga manga gomanga-gomanga. Hiädono o wange nënangaö toönanga manga difauku kaya diaiohi o hali gënanga.