Read Tobelo O KOKOANO MAHINOTOKA 18 Bible Online

O KOKOANO MAHINOTOKA 18 - Tobelo bible

O KOKOANO MAHINOTOKA 18

¹O taongo mahangeoka aipareta ma Koano Hosea o Ela aingohaka mangale o Israel, o Hizkia o Ahas aingohaka wodadi o Yehuda manga koano.

²Oraha gënanga ünanga ai umuru o taongo 25 deʼ ünanga wopareta o Yerusalemoka o taongo 29 madekana. Ngoi ayo ami romanga o ngo Abia o Zakharia ngoi ora.

³O Hizkia wadiai ma Jou Ai hininga wasanangi hokä ma Koano Daud ai tohora.

⁴ Unanga wawedere o gikiri yahuba-huba mangï-mangï, de waruba o tugu-tugu ikali wakilianga o Dewi Asyera ma dulada-dulada. Unangö wawedere o dodiha o tabaga o Musa wa dodiai ihi romanga o Nehustan. Hababu, hiädono öraha gënanga o Israeloka manyawa kayo duhukohi o dupa mangale yahoromati o dodiha tabaga gënanga.

⁵O Yehuda manga koano mata-mata manga hidogoronaka, yaoa kowahi yaoa ipahaika deʼ o Hizkia, koiwa hokä ünanga. Unanga wingaku ma Jouika, o Israeloka manga Jou Madutu,

⁶de wosetia unangika. Komaiwahi ünanga wïlawani ma Jou. Hagala ai tita ma Jou wohidö döa-döaka itilakuru o Musa, wohi ngounu o Hizkia de wagou-goungu.

⁷Genanga mahababu ma Jou kahirahi wiriwo hiädono ünanga wohasili hagala ai hidailako magoronaka. Unanga wilawana o Asyur ma koanoika, deʼ woluku wihi gihene unangika.

⁸Unanga wä hihanga o Filistin manyawa, deʼ waora toönanga manga ngï yogogogere, o kapongo duru mai tetekoka de yaino hiädono o kota duru ma ago-agomo, yongohamika o Gaza madaera magilolitino.

⁹Ma taongo ma iatoka aipareta o Hizkia, enagënanga o taongo matumidioka aipareta ma Koano Hosea mangale o Israeloka, o Salmaneser o Asyur manga koano waparangi o Israel de ihi giloliti o Samaria.

¹⁰I hi giloliti iböto o taongo hange madekana, o Samaria iotaka. Genanga idadi o taongo mabutangaka aipareta o Hizkia, de o taongo mahiwoka aipareta o Hosea.

¹¹Ipaha o Asyur ma koano wä ao o Israel manyawa o Asyurika hokä o dagokino; utu onangino yahi gogere o Halah makotaka, utu o Habor ma Ngäiri madatekoka o Gozan madaeraoka, deʼ utuoli o Madai maberera makota-kotaoka.

¹²O Samaria iotaka karana o Israeloka manyawa iwi hingounua ma Jouika, toönanga manga Jou Madutu. Onanga ya motekokaua o jaji ma Jou wadodiai dede önanga, de önanga yatilakuru mata-mata o Musa ai tita, Ai gilaongo. Onanga yoluku yoihene de yoluku yamoteke.

¹³O taongo ngimoi de iatoka aipareta o Hizkia o Yehuda manga koano, o Yehuda ma kota-kota mabebeno o mehele wiparangi de wi hihangoka o Sanherib, o Asyur manga koano.

¹⁴Daha o Sanheribika naga o Lakhisoka, o Hizkia wohi dingoto o abari nënanga, ”Ngohi tahowonoka. Hababu gënanga, ngohi togahoko nomodeke Tuanga natogumu o parangi ngomino. Mata-mata ani gogahoko Tuanga aha ngohi tohi totomo.” O Sanherib wohaluhu o Hizkia kokiani wohidingoto unangika o haaka o kilo o ribuhu ngimoi, deʼ o gurasi o kilo o ribuhu moi.

¹⁵Karana gënanga, mata-mata o haaka naga ma Jou Ai Tau magoronaka deʼ o kadato makas magoronaka o Hizkia wohidingoto o Sanheribika.

¹⁶O gurasi ma Jou Ai Tau mangora-ngoranoka deʼ o Hizkia mahirete wohi pake-pakeoka o ngorana mahitaoka, wa l̄e de wohidingoto o Sanheribika.

¹⁷Mä o Asyur manga koano gënanga wahidingoto o Lakhis deʼ yaino o duduono moi ma amo-amoko mangale yaparangi o Yerusalem. O duduono gënanga yätuda o tentara manga baluhu magogurutil̄e yaruange enagënanga woma tengo makapita, woma tengo wohi dodailako o ngokere, de woma tengo ma koano iwigö goa-goana manga haëke. Ima hiadonoka o kotaoka gënanga önanga ima l̄e o ngï o dumuleoka, yahetongo o Penatu ma Dumule itigi o baiti ihö hahuru o akere o baiti daku mal̄okuino.

¹⁸Daha önanga ima pöaka iwi ahoko ma Koano Hizkia. Daha o Hizkia ai pegawe yaruange yohupu imakamake de önanga. O pegawe yaruange enagënanga o Elyakim o Hilkia aingohaka o kadatoka ma tau manyawa manga baluhu, o Sebna o negaraoka wotö tuli-tulihi, o Yoah o Asaf aingohaka o kadatoka wotö tuli-tulihi.

¹⁹Womatengo o Asyur manga tentara manga baluhu gënanga watemo onangika, ”Nihiädono o Hizkiaika o Asyur manga koano ai demo nënanga: ’Yadodoa ngona nomamao ani diri ikuata?

²⁰Ngona natobote ani demo dika yakunu nohi tagali ani akali de ani tentara manga kuata? O nagona na ngaku, hiädono ngona nobarani nä lawani o Asyur?

²¹Ngona igoungu nonganono o Mesir manga roriwo, ma’ gënanga kaimatero hokä napake o nguhumu maroëhe mangale ani diki-diki; damä o diki-diki gënanga i tobiki deʼ yatohoko ani giama. Hoko gënanga o Mesir manga koano mangale o nyawa mata-mata imahi ngano-nganono unangika.’ ”

²²Wohi gila-gila wotemo o Asyur manga tentara manga baluhu gënanga, ”Ekola mudukua ngini nitemo ngini niwï nganono ma Jouika, nia Jou Madutu? Maöraha o Hizkia wohi pareta hupaya o Yehuda manyawa deʼ o Yerusalem duga-duga yopuji o huhuba mangï mahimangoka o Yerusalemoka, koigoungua yahohihangoka gënanga o huba mangï de o huhuba mangï-mangï ma Jouika mahirete?

²³Öraha nënanga de ma koano Asyur ai romanga, ngohi tobarani tobataru nako ngini inihi döaka o kuda o dutu o 2.000, maraioka aha moiua tingini nia nyawa manga ngoë gënanga mangale yobarene!

²⁴Mangale yalawani tongomi mia tentara manga baluhu duru yototipokoukuö ma, ngini nia torihimangua. Mä ngini nio nganono ö o Mesir i nihidingoto o roriwo o kureta ihi poparangi de o duduono o kuda uku yo bare-barene!

²⁵Ngini niatobote ngomi mini parangi de mia hihanga nia berera ma Jou Ai roriwoua? Ma Jou mahirete womï huloko ngomi mia parangi de mia wedere enanga.”

²⁶Daha yotemo o Elyakim, o Sebna, de o Yoah o tentara manga baluhika gënanga, ”Tuanga, notemo dika de o Aramoka manga demo dede ngomi, ngomi mimangarati. Uha napake o Ibranioka manga demo done imangarati o kawaha o kota mabebeno o mehele mal̄okuoka gënanga.”

²⁷Wohaluhu o tentara manga baluhu gënanga, ”Boteka nginika de nia koano dika ngohi wohi huloko o Asyur ma koano mangale tohiädono mata-mata nënanga? Kowali! Ngohiö totemo o kawahaika yogogogeruku o bebeno o meheloka gënanga nima kinïki dede ngini aha nia ol̄omo ai ioko mahirete de nia okere ai ihihi mahirete.”

²⁸Ipaha o tentara manga baluhu gënanga womaoko de wopöaka de o Ibrani, oka manga demo, ”Ni ihene okia wotö temo-temoka o Asyur manga koano:

²⁹’Uha nio modeke winï tipu o Hizkia; ünanga wakunua wini hihalamati ngini.

³⁰Uha nihi gihenika ai bobaja mangale niwï nganono ma Jouika. Uha niatobote ma Jou aha wini hihalamati ngini ekola wa tatoko o Asyur manga tentara yaora nia kota.

³¹Uha niwihigihene o Hizkia. Ngohi, o Asyur manga koano totemo hupaya ngini nihupu o kotaino deʼ nima ike. Dahao ngini yakunu nia ol̄omo o angguru mahohoko nia dumuleino mahirete, deʼ nia jame o ara mahohoko nia gota mautuino mahirete, ikali nia okere o akere nia humuino mahirete,

³²hiädono ngini ti nï tururu o berera moika ngade ima tero nia berera mahirete. Dokengoka naga o angguru madumule ihi hasili o angguru nginika, deʼ nia gandum madumule ihi hasili o gopuno mangale nia inomo. O bereraka gënanga naga mangoë o zaitun mautu, o zaitun maminya de o madu. Nako ngini nia moteke okia totö temo-temo nginika, ngini aha niwango, ni honengua. Uha niwi higihene o Hizkia! Unanga duga-duga wini tipu ngini deʼ wotemo ma Jou aha wini hihalamati ngini.

³³Mamoi iböto o hoana mahomoa manga gikiri ihihalamati maberera ahi kuahaino?

³⁴Kiaka o Hamat deʼ o Arpad maberera manga gikiri-gikiri? Kiaka manga giki-gikiri o Sefarwaim, o Hena, de o Iwa? Nagaka yoböa ihihalamati o Samaria?

³⁵O gikiri hoko kiaka mamoi iböto ihi lapahi maberera ahi kuahaino? Kiaka yakunu ma Jou wohihalamati o Yerusalem?ʼ ”

³⁶Yoihene gënanga, o Yerusalem manyawa yohaluhua, hababu ma Koano Hizkia wohi paretaka hupaya önanga ima rirïdoka dika.

³⁷Daha o Elyakim, o Sebna, deʼ o Yoah yakakihi toönanga manga pakeanga manonako manga hininga ihuha, daha yöiki ihi ngahu ma koanoika okia wotö temo-temooka o Asyur manga tentara manga baluhu gënanga.