Read Tobelo O KOKOANO MAHINOTOKA 19 Bible Online

O KOKOANO MAHINOTOKA 19 - Tobelo bible

O KOKOANO MAHINOTOKA 19

¹Maöraha ma Koano Hizkia woihene o hingahu o nyawa ya ruangeino gënanga, ünanga wakakihi ai pakeanga deʼ womahipake o ngoëre o karongo manonako o hininga mahuha, ipaha wöiki ma Jou Ai Tauika.

²Ipaha ünanga wähuloko o Elyakim, o kadatoka manga baluhu, o Sebna o negaraoka wotö tuli-tulihi deʼ o imam-imam yatotimonoka, mangale iwi ädono ma Nabi Yesaya o Amos aingohaka. Onangö imahi pake o pakeanga o karongo.

³Nenanga o Hizkia ai behehongo önanga ihiädono o Yesayaika, ”O wange nënanga o duka mawange; ngone inä hukumu de inä hikauku. Ngone hokä o ngoheka momauoka moma gilianga mä ami kuata imataka.

⁴O Asyur ma koano wihulokoka womatengo o tentara manga baluhu wokokurutil̄e mangale wihi kauku ma Jou Madutu wowö wango-wango. O nagona ihi öriki ma Jou Madutu woihenoka o hikauku gënanga, de aha wähukumu önanga yotö temo-temo! Karana gënanga nomä niata ma Jou Madutuika mangale tongone nanga nyawa kayowö wango-wangohi.”

⁵Watarima iböto o behehongo ma Koano Hizkiaino gënanga,

⁶o Yesaya wähuloko o huhuloko-o huhuloko gënanga ihiädono o bobaluhu nënanga, ”Ma Jou wotemo, Jou Koano ngarouha nohawana noihene manga hinyonyata o Asyur manga koano ai gogilaongo gënanga ma Jou wakunua wonä hilapahi ngone.

⁷Ma Jou aha wi diai o Asyur manga koano wo hininga moi o abari o hidal̄oko kahiädono ünanga wolio ai bereraika mahirete, de dokengoka ünanga aha iwi toma.”

⁸O Asyur manga tentara manga baluhu gënanga wamake o abari ai koano wamal̄aka o Lakhis de magogiria woparangi walawani o Libna makota, genangoka de ikurutikaua. Daha wöiki o tentara manga baluhu gënanga dokengika mangale ima make ai koano gënanga.

⁹O Asyur ma koano watarimaka o abari o Mesir manga duduono watö tuda-tuda o Tirhaka o Sudan de ma koano magogiria waino mangale wäparangi önanga. Karana gënanga, o Asyur manga koano wohidingoto o hurata o Hizkiaika o Yehuda ma koano.

¹⁰Hoko nënanga mademo o hurata gënanga, ”Uha ini tipu mangale ai jaji ani Jou Madutu ningaku-ngaku gënanga ngona aha no otakua ahi giama ma hoatika.

¹¹Ngona noihenoka o berera yogetongo yaparangi o Asyur ma kokoano, yawedere kamamoiuku. Uha nato bote ngona yakunu noma hirehene!

¹²Maöraha ahi ete de ahi tohora yawedere o kota Gozan, o Haran, de o Rezef, ikali yätoma o Eden manyawa yogogogere o Telasaroka, koiwa moi o toönanga manga giki-gikirino yakunu yahihalamati önanga.

¹³Kiaka honanga o kokoano o Hamat makota, o Arpat, o Sefarwaim, o Hena, de o Iwa?”

¹⁴O Hizkia watarima o hurata gënanga o huhulokino, daha ünanga wabasa. Ipaha ünanga wöiki ma Jou Ai Tauika, de wa hoheika o hurata gënanga ma Jou Ai himangoka,

¹⁵ daha womä niata, wato, ”Jou, o Israeloka manga Jou Madutu, nogogere o dodadi o horogaka de mago gahuhuoka ma l̄okuoka, Ngona kanoma tengo-tengoka o Jou Madutu Nakuaha hagala o pareta o dunia mal̄okuoka. Ngona Nohidö dadadadi o dihanga de o dunia.

¹⁶Jou tanu noihene okia magogiria idadi de de ngomi. Noihene mata-mata Sanherib woni hikauku Ngonaika, o Jou Madutu nowo wango-wango!

¹⁷Ngomi mata-mata mihi öriki, Jou, o Asyur ma kokoano yabinahaka mangoë o hoana deʼ yawedere toönanga manga berera-berera.

¹⁸Toönanga manga giki-gikirö maya tuhuku deʼ yawedere, hababu o gikiri-o gikiri gënanga ka utu o de koiwa ma kuaha. Enanga duga-duga o dulada o gotaino de o helewo o nyawa manga manarama.

¹⁹Ya Jou, tongomi mia Jou Madutu, Nomi hilapahi ngomi hagala o Asyur manyawaino gënanga, hupaya hagala o hoana de o berera o duniaoka ihi öriki duga-duga Ngona o Jou Madutu noma tengo-tengooka.”

²⁰Ipaha o Yesaya wohi dingoto o behehongo ma Koano Hizkiaika hokä mabobaluhu mangale ma koano ai niata,

²¹ma Jou wotemo, ”O Yerusalem makota ini gogiete deʼ ini hohedu ngona, Sanherib.

²²Nohi öriki ngona o nagona nadoa-doana deʼ nahikauku gënanga? Ngohi, o Israeloka manga Jou Madutu, o Jou Madutu Totebi-tebini! Duru noedenge ani jako Ngohino.

²³Ngona nohidingoto ani huhuloko mangale yotemo madiaiua deʼ mangöe ani kurete ihi poparangi yautumoka ol̄oku ma gogurutil̄e o Libanonoka. Ngona noma edenge ngona nätol̄anga o Liwewuru mautu-mautu duru mago gurutil̄e deʼ duru mahohailoa ikali yatotara o hongana-o hongana duru irö rubu-rubu.

²⁴Ngonaö nomahil̄e ngona nomä baiti o humu deʼ nokere o akere o berera-o berera ma homoaoka, deʼ ani tentara ya doko-doko o Nil ma Ngairi hiädono iowaha.

²⁵Komaiwahi ngona noihene mata-mata gënanga Tohi datoroka kakahuruonikahi? De öraha nënanga Ngohi tadiai. Ngohi la toni hidöaka ngonaika o kuaha mangale nawedere o kota-o kota ma bebeno o mehele idadi ka manga ngede-ngedere.

²⁶Hagala o nyawa yogogogere dokengoka imasikaua; önanga yatodokana deʼ yo hawana. Onanga hokä o momo o tonaka ma lua-luasoka ekola o momo iwango o tau makatuoka, yatoolenge nako yawuwu o wange mahiwara ma hidal̄oko ihö hau-hauku.

²⁷Mä Ngohi tohi öriki hagala moi-moi mangale ani diri. Ngohi tohi öriki okia nadiai de okiaika ngona nöiki.

²⁸Ngohi tohi öriki ngona duru nohi ngamo Ngohino, deʼ Ngohi to ihenoka mangale ani edenge gënanga. Öraha nënanga To hi pake o lalakete ani ngunungika deʼ o dudumungu ani uruoka, hupaya ngona Toni tauru toni higilio natilakuru o ngekomo nanö nonu maöraha naino.”

²⁹O Yesaya ö wohidingoto o behehongo nënanga ma koano Hizkiaika, ”Nenangala aha idadi o nonako ngonaika. O taongo nënanga deʼ o taongo nanga himangoka o nyawa aha yol̄omo o gandum iwö wango-wango mahirete. Mä iböto gënanga önanga yakunu yodatomo o gandum deʼ o angguru ikali yajame mahasili.

³⁰O Yehuda manyawa kayo wango-wangohi aha manga hasili iwoë hokä idö dato-datomo mangutuku duru iluku uku de ihi hasili o hohoko.

³¹O Yerusalemoka deʼ o Sion mal̄oku matubuoka aha naga hagala o nyawa yohalamati, karana ma Jou wohi tantuoka o hali gënanga aha idadi.

³²Nenangala ma Jou wotö temo-temo mangale o Asyur manga koano: ’Unanga aha wongohamua o Yerusalem ekola wohi toimi o toimi mameta o kotaika gënanga. Hagala o tentara manga dodadatokoka koiwa aha yatigika o kota gënanga, deʼ yakilolitino aha ihi gokoua o tonaka itotoporono ihi gogiloliti.

³³O Asyur manga koano aha wolio watilakuru o ngekomo wanö nononu maöraha waino, wongohamua o kota gënanga. Ngohi, o Jou, totö temo-temooka.

³⁴O Yerusalem makota aha Tapaliara deʼ Tahohongino mangale Ahi horomati mahirete deʼ mangale Ahi jaji deʼ Ahi gilaongo o Daud.’ ”

³⁵O hutu gënanga dika ma Jou Ai Malaekat iböa o Asyur manyawa manga tau-tauika, de yätoma o tentara ya 185.000. Iyarehino mawange o ngoru-ngorumino toönanga manga mayeti-mayeti imahi bari-barihika.

³⁶Daha woma dohuku o Sanherib o Asyur ma koano de wolio o Niniweika.

³⁷O wange moiuku, maöraha ünanga magogiria wopuji o Gikiri o Nisrokh, matau magoronaka, ünanga iwi toma de o oworo o Adramelekh deʼ o Sareze, ai ngoha-ngohaka o nau-nauru. Iböto gënanga önanga yoara o Ararat mabeberaika. Daha o Esarhadon, aingohaka mahomoa, wodadi o koano witagali ünanga.