Read Tobelo O KOKOANO MAHINOTOKA 2 Bible Online

O KOKOANO MAHINOTOKA 2 - Tobelo bible

O KOKOANO MAHINOTOKA 2

¹Maöraha yadonoka ma Jou womau wïgoraka o Elia de o rato iwi ao o horogail̄e. Oraha gënanga o Elia de o Elisa yoikoka o Gilgal de yaino,

²deʼ o ngekomo mahi dogoronaka o Elia wïtemo o Elisaika, ”No gogogere nenangokadau. Ma Jou wohi huloko ngohi toiki o Betelika.” Mä o Elisa wohaluhu, ”De ma Jou wowango-wango dede ani nyawa Bapa, ngohi aha toni mal̄aua Bapa.” Hoʼ, önanga ima nïki ihi gila-gila manga dodagi hiädono o Betelika.

³O nabi o doomu moi yogö gogogere genangoka yöiki iwi ädono o Elisa deʼ yoleha, ”Nohi öriki ngona o wange nënanga ani tuanga aha woni mal̄a ngona karana ma Jou wïgoraka?” ”Iya, ngohi tohi öriki,” o Elisa wohaluhu. ”Mä iböto, ngaro uha ngone hohi ade-ade o hali gënanga.”

⁴Ipaha o Elia wïtemo o Elisaika, ”Nogogogere nenangokadau, ma Jou wohi huloko ngohi töiki o Yerikhoika.” Mä o Elisa wohaluhu, ”De ma Jou wowango-wango dede ani nyawa Bapa, ngohi aha toni mal̄aua Bapa.” Hoʼ, önanga yahinoto ihi gila-gila manga dodagi hiädono o Yerikhoika.

⁵O nabi o doomu moi yogö gogogere genangoka yöiki iwi ädono o Elisa deʼ iwi leha, ”No hi öriki ngona o wange nënanga ani tuanga ma Jou Madutu aha wïgoraka deʼ woni mal̄a ngona?” ”Iya, ngohi tohi öriki,” o Elisa wohaluhu. ”Mä iböto, ngaro uha ngone hohi ade-ade o hali gënanga.”

⁶Ipaha o Elia wïtemo o Elisaika, ”No gogogere nenangokadau. Ma Jou wohi huloko ngohi töiki o Yordan ma Ngairika.” Mä o Elisa wohaluhu, ”De ma Jou wowango-wango dede ani nyawa Bapa, ngohi aha toni mal̄aua Bapa.” Daha önanga ihi gila-gila manga dodagi hiädono o Yordan ma Ngairika,

⁷deʼ o nabi yamoritoa yanïki önanga. Daha o Elia deʼ o Elisa ima togumu o ngairi madatekoka, deʼ o nabi yamoritoa gënanga ima okoino genangoka de hoko kiaua magurutika.

⁸O Elia waiki ai juba daha walulu deʼ wagohara o ngairi ma l̄okuuku gënanga. Daha o ngairi ma akere gënanga iregu hinoto, hiädono ünanga deʼ o Elisa yakunu ima dagi matore-toreika.

⁹ Ima hiadonikaoka mahonongaka, o Elia witemo o Elisaika, ”Nogahoko ngohiino okia noigo-igo. Ma Jou wohi gorakuaohi ngohi de toni mal̄a ngona!” O Elisa wohaluhu, ”Nohihi puhaka ani kuaha Bapa ngohino, hupaya ngohi takunu todadi ani dagali Bapa.”

¹⁰”Uwe, gënanga duru ihuha,” o Elia wohaluhu. ”Mä nako ngona nohi make ngohi maöraha ma Jou wohi goraka ngohi, ani gogahoko aha natarima. Mä nako ngona nohi makeua, ani gogahoko aha natarimaua.”

¹¹Ika imä dagi, önanga yahinoto hoko genangika imä ade-ade. I todokanino moi o kureta o uku mangale yatauru o kuda o uku iboa yahi kitingaka önanga yahinoto daha o Elia o horoga il̄e iwi goraka mangale o hidal̄oko irato-rato.

¹² O Elisa wimake daha wo pöaka, ”Elia, ahi Ama! Ahi Ama! O Israeloka manga hohohongo wonö nau-nauru! Ama koiniwaka!” Daha o Elia wohihangoka o Elisa ai lolegaka. De ai hininga ihuha o Elisa wakakihi ai juba idadi hinoto,

¹³daha wagoraka o Elia ai juba ito tifa-tifauku. Iböto gënanga ünanga wolio de woma okoino o Yordan ma Ngairi ma datekoka,

¹⁴daha wohi gohara o Elia ai juba gënanga o akere mal̄okuuku ikali wotemo, ”Kiaka ma Jou, o Elia ai Jou Madutu gënanga?” Unanga wohi gohara iböto o juba gënanga o ngairuku gënanga, o akere gënanga iregu hinotoka de ünanga womä dagi mahonongaika.

¹⁵O nabi yamoritoa o Yerikhooka gënanga iwi make, daha yotemo, ”O Elia ai kuaha ima tagalioka o Elisaika!” Onanga yaika unangika daha yatilabukuku ai himangoka,

¹⁶de yotemo, ”Ngomi naga imi 50, mata-mata mi kua-kuata. Karana gënanga, naino ngone hoiki hilingiri ani tuanga o Elia. Maraioka ma Jou Ai Womaha iwiao oka ünanga o l̄okuika ekola o waiika, daha iwi mal̄aika dokengoka.” ”Ngaro uha!” o Elisa wohaluhu.

¹⁷Mä önanga hoko genangika dika iwi gegoto hiädono ünanga wahi moteke. Daha önanga yöiki o nabi ya 50 gënanga iwi lingiri o Elia o wange hange madekana, maʼ önanga iwi makeua.

¹⁸Daha önanga yolio o Elisaika magogiria wädamä o Yerikhooka. ”Koigoungua ngohi totemooka ngaro uha ngini ni öiki?” o Elisa wato onangika.

¹⁹O nyawa yamuruono naga o Yerikhoino yoböa o Elisaika de yotemo, ”Bapa, hokä Bapa na mäke mahirete, o kota nënanga irahai, ma’ ma äkere itorou de idadi hababu o ngoheka de manga roëhoka, yahail̄otaka.”

²⁰O Elisa wato, ”Nia l̄ë o mangko kama hungi-hungiohi,” ”de nio noauku o gahi magoronauku.” Daha önanga yao unangika wogö gaho-gahoko gënanga.

²¹Daha o Elisa wöiki o äkere mautuika, ipaha wohi kaweli o gahi gënanga o äkere magoronauku de wotemo, ”Nënanga ma Jou wa hëto-hëtongo: ’Ngohi tä dodono o äkere nënanga hupaya ibötohi idadi hababu o honenge ekola o hail̄otaka!ʼ ”

²²Öraha gënanga o äkere gënanga idodono ima möteke de o Elisa ai demo-demo.

²³Iböto gënanga o Elisa wo mä jobo o Yerikho de waino o Betelika. O ngekomo mahi dogoronaka o ngoha-ngohaka o doomu moi yo hupu o kotaino de iwi hohedu ünanga. Önanga yo pöaka, ”Hei palala, palala, noikoka nenangoka!”

²⁴O Elisa woma kilioro de wa pülono önanga daha wa hilolai önanga de ma Jou Ai romanga. Öraha gënanga dika o beruang ma beka o dutu hinoto i hupu o honganino de ya kä kakihi o ngohaka ya moruata de yahinoto o ngoha-ngohaka manga hidogoronaoka gënanga.

²⁵O Elisa wohi gila-gila ai dodagi o Karmel mal̄okuika, ipaha wo lio o Samariaika.