Read Tobelo O KOKOANO MAHINOTOKA 20 Bible Online

O KOKOANO MAHINOTOKA 20 - Tobelo bible

O KOKOANO MAHINOTOKA 20

¹Oraha gënanga magoronaka ma Koano Hizkia wopanyake o boroho ma ago-agomo hiädono ngadeke dika wohonenge. Ma nabi Yesaya o Amos aingohaka wilega ünanga de wïtemo, ”Ma Jou wobehehongo hupaya Jou Koano natiai mata-mata ani hidailako, hababu Jou Koano aha notogumua. Itedekanoka uaoli Jou Koano aha nohonenge.”

²O Hizkia woma idulu o bebeno o mehelika daha woma niata,

³”Jou, Nohininga ngohi nënanga toma higilaongoka Ngonaika deʼ ahi hininga iriko-rikoto, Ngohi hoko genangika tohidailako tamoteke Ani mau.” Daha o Hizkia woari de duru ai hininga ihuha.

⁴O Yesaya wi mal̄a o Hizkia, maʼ ünanga wohupuuahi o löaino o kadato mahi dogoronaka, ma Jou wïhuloko ünanga

⁵woma idulu o Hizkiaika, ma Jou Ai umati manga koano, de wohiädono o behehongo nënanga, ”Ngohi, o Jou, ma Jou Madutu wohihö huba-huba o Daud ani tohora, Toihenoka ani niata deʼ Ta make ani köngo. Ngohi aha tonihitogumu ngona; midiringi ngona aha nöiki ahi Tauika.

⁶Ngohi aha todogo ani umuru deʼ o taongo 15 oli. Ngona de o Yerusalem ma kota aha Ti nihipidili o Asyur ma koanoino. O kota nënanga aha Tahohongino mangale Ahi horomati mahirete de mangale Ahi jaji de Ahi gilaongo o Daud.”

⁷Daha o Yesaya wähuloko o nyawa yatutuku, ya alu-aluhuku, o ara ma hohoko de ihi nauhu ma koano ai borohika hupaya ünanga wotogumu.

⁸Ma Koano Hizkia woleha, ”Okia manonako ma Jou aha wohi hitogumu ngohi de midiringi ngohi aha yakunu toikoli ma Jou Ai Tauika?”

⁹O Yesaya wohaluhu, ”Ma Jou aha wohi döaka o nonako Jou Koanoika Unanga wohi ganapu Ai jaji. Oraha nënanga, kiaka jou Koano noigo: o wange maduduga mahohongo mahi dumutu ma Koano Ahas wadodiai itagi mahimangiha o garisi ngimoi ekola idohuku o garisi ngimoi?”

¹⁰O Hizkia wato, ”Mangale idiai o hohongo gënanga itagi mahimangiha, igapanga dika. Karana gënanga nadiai ënanga idohuku o garisi ngimoi.”

¹¹O Yesaya woma niata ma Jouika, daha ma Jou wadiai o hohongo gënanga i dohuku o garisi ngimoioko o öraha o wange ma lako oka genanga.

¹²Oraha gënanga magoronaka o Babil ma koano, enagënanga o Merodakh-Baladan o Baladan aingohaka, woihene ma Koano Hizkia wopanyake daha wotogumino. Daha ünanga wä huloko o nyawa mangale yao o hurata deʼ o hadia o Hizkiaika.

¹³O Hizkia wätarima o huhuloko-o huhuloko gënanga deʼ wahi dumutu onangika hegala ai kaya, enagënanga o gurasi deʼ o haaka, o rampa-rampa de o minya mabou-bounu de aitentara manga daë ingodumu. Kamoiö de koiwa ai kadatoka de aipareta ingodumu lakowahi matokua onangika.

¹⁴Ipaha ma Nabi Yesaya wihimanga ma Koano Hizkia de wileha, ”Okiaino hagala o nyawa gënanga? Önanga yato okia?’ ” O Hizkia wohaluhu, ”Onanga o Babilino, o berera ma gogurutino.”

¹⁵”Önanga yolega okia o kadatoka?” o Yesaya woleha oli. ”Hagala okia honanga!” wohaluhu o Hizkia. ”Koiwa moiö o kadato magoronaka matiwi magogogono lakotahimatokua onangika.”

¹⁶Daha o Yesaya wïtemo ma koanoika, ”Ma Jou wotemo,

¹⁷ aha iböa maöraha hagala o kaya ani kadato magoronaka deʼ yatotoomuoka ani ete de ani tohora hiädono o wange nënanga, yao o Babilika. Koiwa naga aha igogogere.

¹⁸ Ani ngohaka de ani danongino naga aha yä l̄ë deʼ yahidadi o kadato mapegawe mangale iwi leleani o Babil manga koano.”

¹⁹Ma Koano Hizkia wohaluhu, ”Kayaoaö Ai behehongo ma Jou nohiädono ngohino.” Unanga wohaluhu hoko gënanga karana ünanga wapikiri: ”Iti ahi pareta kahirahi irïdi deʼ idame madekana ngohi towango.”

²⁰Ma jarita mahomoa yakorona ma Koano Hizkia, yakorona ai oa-oa ai barani, deʼ sarakia ünanga wodiai o kolam de o akere ma heli-heli mangale yaheli o akere o kotaika, mata-mata itulihi o Yehuda manga Kokoano manga Jarita mabuku magoronaka.

²¹O Hizkia wohonenge, daha aingohaka o Manasye wodadi o koano witagali ünanga.