Read Tobelo O KOKOANO MAHINOTOKA 21 Bible Online

O KOKOANO MAHINOTOKA 21 - Tobelo bible

O KOKOANO MAHINOTOKA 21

¹O Manasye ai umuru o taongo ngimoi de hinoto maöraha ünanga wodadi o Yehuda manga koano, de ünanga wopareta o Yerusalemoka o taongo moritoa de motoa madekana. Ngoi ayo ami romanga o ngo Hefzibah.

² O Manasye wobaradoha ma Jouika, karana wanïki manga biaha-biaha madorou o hoana de o berera wadö duhu-duhu ma Jou o Kanaanoka maöraha o Israeloka manyawa yöngohama o berera gënanga.

³O gikiri yapuji mangï-mangï ai ama o Hizkia wahö hohihangoka wohi goko okali. Unanga wohi goko o huba mangï-mangï mangale yahuba o Baalika, de wadiai o Dewi Asyera ma dulada, hokä wadodiai o Ahab o Israeloka manga koano. O Manasyeö wahuba hagala o murumu.

⁴ Ma Jou wotemooka, o Yerusalem ganga Ai böa mangï de puji-puji mangï Unangika, madokengoka ma Jou Ai Tauoka, o Manasye wohi gokoka o huhuba mangï-mangï mangale o giki-gikiri.

⁵Ma Jou Ai Tau malöaka hinoto gënanga ünanga wohi goko o huhuba mangï-mangï mangale wahuba hagala murumika.

⁶Aingohaka wihihuba hokä o huhuba ituhu-tuhuku. O Manasyeö wadiai manga manarama yohou-houru, yomai-maihi, ima popipidoro, de yogähoko o hidumutu hagala o womahika. Unanga duru wobaradoha ma Jouika hiädono yamomiki Ai dohata.

⁷ O Dewi Asyera madulada wakelenga ma Jou Ai Tau magoronaka, ena hioko yakorona o ngï gënanga ma Jou wotemoka o Daudika de o Salomo aingohaka o nauruika, ”Ahi Tau de o Yerusalem makota nënanga, Taö iri-irikoka o Israeloka manga hoana ngimoi deʼ hinoto madaera mahi dogoronaino, ganga o ngï Tohi tatantuoka hokä o puji mangï Ngohino.

⁸De nako o Israeloka ma umati ihi ngounu mata-mata Ahi pareta yamoteke o tita-o tita ahi gilaongo o Musa wahidö döa-döakoka onangika, done Ngohi aha tamal̄aiakua önanga ya duhu o bereraino Tahidö döa-doakoka toönanga manga ete deʼ manga tohoraika.”

⁹Mä o Yehuda manyawa iwihi ngounua ma Jouika, deʼ o Manasye wodadi o hababu önanga yodiai o baradoha-o baradoha iholoi i torou de o baradoha yadodiai o hoana de o berera wadö duhu-duhu ma Jou o Kanaanoka maöraha o Israeloka ma umati yongohama o berera gënanga.

¹⁰Hababu gënanga itilakuru o nabi-nabi, ma Jou Ai gogilaongo, ma Jou wotemo,

¹¹”Ma Koano Manasye duru itorou. Ai manarama iholoi ikurutika itorou ngaro de o Kanaan manyawa manga manarama. De o gomanga-o gomanga wadodiai, ünanga wodiai o hababu o Yehuda manyawa yobaradoha.

¹²Karana gënanga, Ngohi, o Jou, o Jou Madutu ihihö huba-huba o Israeloka manyawa, aha todotagao o huha duru kohä amoko o Yerusalemuku de o Yehuda, hiädono o nyawa moi-moi yo ihene mangale o hali gënanga aha yatodokana.

¹³O Yerusalem aha Tahukumu, hokä Ngohi tahukumu o Samaria de o Ahab o Israeloka manga koano ikali aidifauku. O Yerusalem aha Ta ehe Tatebini hokä o dodai yäihoroka deʼ i motumuku.

¹⁴Manyawa kayo gogogerohi aha Tamal̄aika yodadi mangale manga haturu-haturu manga inomo, aha ya l̄ë toönanga manga daë de yaora toönanga manga berera.

¹⁵Mata-mata gënanga aha Tadiai Ahi umatika karana önanga yobaradoha Ngohino deʼ yamomiki Ahi dohata mamulaenge toönanga manga ete de manga tohora yohupu o Mesirino hiädono o wange nënanga.”

¹⁶Mahomoa de o baradoha yodiai o Yehuda manyawa ma Jouika de yahuba o gomanga, o Manasyeö wätoma o nyawa duru komanga ngöe koya howo-howonua hiädono o awunu ihahuru okiaika honanga o Yerusalemoka.

¹⁷Majarita mahomoa yakorona ma Koano Manasye deʼ yakorona hagala o baradoha wadodiai, itulihi o Yehuda manga Kokoano manga Jarita mabuku magoronaka.

¹⁸O Manasye wohonenge deʼ iwi lungunu o kadato ma dumuleoka, enagënanga o Uza ai dumule. Aingohaka o nauru o Amon wodadi o koano witagali ünanga.

¹⁹O Amon ai umuru o taongo monaoko de hinoto maöraha ünanga wodadi o Yehuda manga koano deʼ wopareta o Yerusalemoka o taongo hinoto madekana. Ngoi ayo ami romanga o ngo Mesulemet o Harus ngoi ora, o Yotba manyawa.

²⁰Hokä ai ama, unangö wobaradoha ma Jouika.

²¹Unanga womä duru ai ama ai manarama-ai manarama, deʼ wahuba hagala gomanga wahö huba-huba ai ama.

²²Unanga wowango imamotekua ma Jou Ai mau, igoungu wï mal̄a ma Jou, ma Jou Madutu iwihö huba-huba ai ete de ai tohora.

²³Ai pegawe-pegawe ma Koano Amon ima toomu iwi lawani ünanga de iwi toma o kadatoka.

²⁴Mä o Yehuda makawaha yätoma iwitö toma-toma ma Koano Amon gënanga, daha aingohaka o Yosia iwi goraka, wodadi o koano.

²⁵Majarita mahomoa yakorona o Amon itulihi o Yehuda ma Kokoano manga Jarita mabuku magoronaka.

²⁶O Amon iwi lungunu o jere o Uza ai dumuleoka. Aingohaka o Yosia wodadi o koano witagali ünanga.