Read Tobelo O KOKOANO MAHINOTOKA 22 Bible Online

O KOKOANO MAHINOTOKA 22 - Tobelo bible

O KOKOANO MAHINOTOKA 22

¹ O Yosia ai umuru o taongo tufange maöraha ünanga wodadi o Yehuda manga koano, de ünanga wopareta o Yehudaoka o taongo moruange de moi madekana. Ngoi ayo ami romanga o ngo Yedida o Adaya ngoi ora, o Bozkatino.

²O Yosia ai manarama yasanangi ma Jou Ai hininga. Unanga wa nïki ai dulada ma Koano Daud ai ete deʼ ai tohora, de wohi ngounu ma Jou Madutu Ai tita ingodumu de itö totomo.

³Ma Koano Yosia to ünanga womatengo o negaraoka wotö tuli-tulihi ai romanga o Safan o Azalya aingohaka, o Mesulam ai danongo. Mataongo ngimoi deʼ tufangeoka aipareta ma Koano Yosia, ma koano wohi doaka o pareta nënanga wotö tuli-tulihika gënanga, ”Noiki ma Imam wo Momulia ika o Hilkia ma Jou Ai Tauoka, de nogahoko ünanga wohidöaka o hingahu mangale ma amoko o tiwi yatotoomuoka o imam-imam yomomanarama ma Jou Ai Tau mangorana howoha-wohamikaoka.

⁵Nihuloko ünanga wohi döaka o tiwi gënanga yo goa-goanika o manarama yatiai ma Jou Ai Tauoka. Onanga kiani ya pake o tiwi gënanga mangale ihi fangu manga hewa,

⁶o gota yoboberehi, o tau yododiai, deʼ yomehe-mehele, ikali yoija o gota de o helewo yopoparalu.

⁷ O manarama yogö goa-goana gënanga duru yorikoto, ho, iparalu ua yogahoko o hingahu o tiwi onangino.”

⁸O Safan wohiädono ma koano aipareta o Hilkiaika, daha o Hilkia wohi ade-ade o Safanika ünanga wa makeoka ma Jou Ai tita-ai tita mabuku ma Jou Ai Tauoka. O Hilkia wohi döaka o buku gënanga o Safanika, de o Safan wabasa.

⁹Iböto gënanga o Safan woma idulu ma koanoika de wohi ngahu o tiwi igö gogonika ma Jou Ai Tauoka ya l̄ëoka deʼ ihi lapahi mangale ma koano ai gogilaongo yogoa-goanika o manarama yatiai ma Jou Ai Tauoka.

¹⁰Ipaha o Safan wato, ”Hilkia nohi döaka o buku nënanga ngohino.” Daha o Safan wida basa o buku gënanga ma koanoika.

¹¹Woihene madol̄a o buku gënanga, ma koano wakä kakihi ai pakeanga karana ai hininga ihuha.

¹²Daha ma koano wohi döaka o pareta nënanga ma Imam Hilkiaika, o Ahikam o Safan aingohaka, o Akhbor o Mikha aingohaka, o Safan o negaraka wo tö tuli-tulihi, deʼ o Asaya ma koano wirö riwo-riwo:

¹³”Ni öiki nileha ma Jouika mangale ngohi de mangale o Yehuda makawaha yongodumu yakorona o buku madol̄a gënanga. Ma Jou wona ngamo ngoneino karana tongone nanga ete de nanga tohora yadiaiua o pareta-pareta itö tuli-tulihi magoronaka.”

¹⁴Daha yöiki o Hilkia, o Ahikam, o Akhbor, o Safan de o Asaya yogahoko ohi dumutu o ngoheka moma tengoika ami romanga o ngo Hulda. Munanga o nabi moi mogogere o kapongo ma hungioka o Yerusalemoka. Ami rokata ai romanga o Salum o Tikwa aingohaka, o Harhas ai danongo; ünanga wohido dailako o puji mapakeanga ma Jou Ai Tauoka. O ngo Hulda moihene iböto toönanga manga hitararono,

¹⁵munanga mähuloko önanga yolio ma koano ika deʼ ihiädono

¹⁶ma Jou Ai demo nënanga: ”Ngohi aha Ta hukumu o Yerusalem de manyawa yongodumu hokä itulihi o buku magoronaka daha ipahaino ma koano wabasa.

¹⁷Önanga ihi mal̄aka Ngohi deʼ ihihuba o huhuba o gikiri-o gikiri mahomoaika. Mata-mata önanga yadodiai yamomiki Ahi dohata. Ngohi tängamo o Yerusalemika, de Ahi dohata yakunua ikuranga.

¹⁸Mä yakorona ma Koano Yosia, nënanga Ahi behehongo, ma Jou o Israeloka manga Jou Madutu, ’Ngona noihene iböto okia itö tuli-tulihi o buku gënanga magoronaka,

¹⁹ngona noma toduba deʼ noma hitipokouku ani diri Ahi himangoka. Ngohi deʼ mahayangua mangale Tahukumu o Yerusalem de manyawa. Ngohi aha tohidadi o kota gënanga o lolega moi hö boborohono, deʼ o Yerusalem maromanga aha Tohidadi o lolai ma romanga. Mä maöraha ngona noihene mangale Tohibodito gënanga ngona noari de nakakihi ani pakeanga manonako ani hininga ihuha. Ngohi toihenoka ani niata,

²⁰karana gënanga o hukumanga mangale o Yerusalem aha Togelengaokaua madekana ngona kanowangohi. Ngona aha nohonenge deʼ madame.’ ” Daha yolio o huhuloko-o huhuloko gënanga ma koanoika deʼ i hiadono o behehongo gënanga.