Read Tobelo O KOKOANO MAHINOTOKA 23 Bible Online

O KOKOANO MAHINOTOKA 23 - Tobelo bible

O KOKOANO MAHINOTOKA 23

¹Ma Koano Yosia wäahoko mata-mata o tutuda o Yehuda deʼ o Yerusalem.

²Daha ünanga wöiki dede önanga ma Jou Ai Tauika, iwi nïki o imam-imam, o nabi-nabi deʼ o kawaha yongodumu, yaoa yomo mihikini yaoa yokö kaya-kaya, Toönanga manga himangoka mata-mata, itigioka o liate mabuturungu ihi tingakoka mangale ma koano, ma koano woma oko deʼ wabasa deʼ ai ilingi makuatil̄e o jaji mabuku madol̄a ingodumu yamö make-makeoka ma Jou Ai Tau magoronaka. Ipaha ma koano wodiai o jaji de ma Jou mangale wihi ngounu Unangika, deʼ wadiai ai hininga magahumu de ai jiwa magahumu, mata-mata aipareta de Ai tita-tita. Ma koano wojaji mangale wohi totomo madodagi ma Jou Ai jaji deʼ Ai umati ima noaika o buku gënanga magoronaka. O kawaha mata-mata yamoteke yojaji mangale ihi ngounu o jajiika gënanga.

⁴ Iböto gënanga ma koano wä hipareta ma Imam wo Mo mulia o Hilkia, o imam-imam yorö riwo-riwo deʼ yogö goa-goana yomomanarama ma Jou Ai Tau mangoranoka, hupaya ihi hupu o Tauino gënanga mata-mata o pakakaha yapö pake-pake mangale yahuba o Baal, o Dewi Asyera, deʼ o murumu-o murumu. Mata-mata okia honanga gënanga watuhuku ma Koano Yosia o kota maporetoka imahi tigi-tigika o Kidron ma Wai, daha makafo yao o Betelika.

⁵Unanga wä aiki o imam-imam yagora-gorakoka o Yehuda ma kokoano mangale yomanarama o gikiri yahuba-huba mangïoka o Yehuda makota-kotaoka deʼ o Yerusalem magilolitino; o imam-imamö ihihö huba-huba o huhuba o Baalika, o wange, o mede, o planit de hagala o murumu.

⁶O Dewi Asyera madulada ihi hupu ma Jou Ai Tauoka, deʼ yao o kota maporetika o Kidron ma Waiika. Dokengoka o dulada gënanga yatuhuku, daha makuru yatutuku yaalu-aluhuku, dë makafo ihi barihi o nyawa yowöe-wöe manga lungunu ma l̄okuika.

⁷O kamari-o kamari ma Jou Ai Tauoka yapake-pake o gomanga ma tauoka ima huku-hukunu manga röehe mangale yadiai yahukunu manga roöehe hokä o huhuba o gikirika, yawedere. (O kamari-kamarioka gënanga o ngongoheka yadodiai o pakeanga mangale yapake yahuba o Dewi Asyera magoronaka.)

⁸Mata-mata o imam yogö gogere o Yehuda makota-kotaoka wähuloko o Yosia yaika o Yerusalemika, daha kiaka honanga o Yehuda maberera ingodumu ënanga yapëseke o gikiri hagala ma huhuba mangï kiaka o imam-imam gënanga ihihö huba-hubaoka o huhuba. O imam-imam gënanga yahigumal̄aua yadiai o puji ma Jou ai Tauoka. Mä önanga yakunu yaol̄omo o roti iragi-ragiua ya sö sadia mangale toönanga manga dodiawo. O huhuba mangï-o huhuba mangï ihi tinga-tingakoka mangale yahuba o gikirika itigi o ngorana ma Amo-amoko o Yosua, o popareta manga häeke o bereraka gënanga, yakiliangoka. O ngorana ma amo-amoko gënanga magogere o higiloka o Ngorana ma amo-amoko duru Ma l̄okuoka o kotaika howoha-wohama mangekomoka.

⁹

¹⁰ O Tofet, enagënanga o gikirika yahuba-huba mangï o Hinom ma Waioka, yapeseke. De hoko gënanga moiokauaoli o nyawa yakunu ihihuba manga ngohaka hokä o huhuba ituhu-tuhuku mangale o Gikiri o Molokh.

¹¹Mata-mata o kuda yodinga-dingakoka o Yehuda ma kokoano mangale yahuba o wangeika yaumo, de o kureta-o kureta yapö pake-pake yohuba magoronaka gënanga yatuhuku. (O kureta-o kureta gënanga naga ma Jou Ai Tau ma löaoka — itigi o ngorana ma amo-amoko — ikurutikaua de ai kamari-kamari ma amo-amoko o Natan Melekh ai ngï wo gö gogere, womatengo o pegawe ma gögurutil̄e.)

¹² O huhuba mangï-o huhuba mangï ihi goko-goko o Yehuda ma kokoano makatu mal̄okuoka ma Koano Ahas ai kamari-kamari yawedere. O huhuba mangï-huhuba mangï o o wohigö goko-goko ma Koano Manasye ma Jou Ai Tau malöa hinoto, wawede-wederuku o Yosia daha ya umo o Kidron ma Wai ika.

¹³ O huhuba-o hu huba mangïö o Yerusalem o wange ma hiwaroko idaduoka, o Dorou ma Doporono o korehara il̄e i daduoka yapesekoka. O huhuba-o huhuba mangï gënanga wohi goko-goko ma Koano Salomo mangale yahuba o gikiri-o gikiri haö emo-emono — enagënanga o Asytoret o Sidon manyawa manga ogikiri ongo heka, o Kamos o Moab manyawa manga gikiri, de o Milkom o Amon manyawa manga gikiri.

¹⁴O gikiri matugu-tugu de o Dewi Asyera madulada yakilianga, daha o tonaka kiaka otugu-otugu deʼ o dulada o dulada gënanga ihi goko, wopohuku o Yosia deʼ o nyawa manga kobo-kobongo.

¹⁵ Unangö wakilianga yahuba-huba mangï o Beteloka wohigö goko-goko ma Koano Yerobeam o Nebat aingohaka — ma koano wodiaioka o hababu o Israeloka manyawa yodiai o baradoha. Daha o Yosia wapooteke o huba mangï yahö huba-huba mangïoka gënanga, deʼ watuhuku wohi kinïki o Dewi Asyera madulada genangoka.

¹⁶ Ipaha o Yosia womakilioro, de wamake o lungunu muruono naga ol̄oku mal̄okuoka. Daha ünanga wähuloko o nyawa ya kilianga o lungunu gënanga, deʼ ihi hupu ma kobo-kobongo daha yatuhuku o huhuba mangïoka magogiria youku gënanga. Hoko gënanga madodagi ünanga wapeseke o huba mangï gënanga. Daha idadi okia wohidö demoka mahira ma Jou Ai nabi maöraha ma Koano Yerobeam magogiria woma okoino o huba mangï womahi tigi-tigika gënanga ma moiuku o rameangoka. Iböto gënanga ma Koano Yosia wamake moi o lungunu mahomoaoli.

¹⁷ Daha ünanga woleha, ”Tonagona manga lungunu nënanga?” Hagala o Betel manyawa yohaluhu, ”Genanga ai lungunu womatengo ma Jou Ai nabi mamoi iböto waino nenangino o Yehuda de waino, deʼ wohi dodemoka o hali-o hali dahao ipahaino Jou Koano nadiai o huhuba mangïika nënanga.”

¹⁸”Uha nia dodoa ikani o lungunu gënanga,” ma koano wä pareta. ”Nia mal̄aika ai kobo-kobongo genangoka, uha nia tururu!” Daha ai kobo-kobongo ma nabi o Yehudaino gënanga yadodoaikaua; hoko gënangö manga kobo-kobongo o nabi o Samariaino yalö lungu-lungunu genangoka.

¹⁹O Israeloka manga kota yogetongo, ma Koano Yosia wakilianga mata-mata o ngï yohuba-huba o gikiri ihigö goko-goko o Israeloka manga kokoano, deʼ idadioka o hababu ma Jou idadi wongamo. Okia wadodiaioka ma Koano Yosia o Beteloka, gënanga wadiaiö o huba mangï-ohuba mangïika o Israeloka ingodumu.

²⁰Mata-mata o imam yomomanarama yahuba-huba o gikiri mangï-mangïoka wä toma o huhuba-o huhuba mangï ma l̄okuoka kiaka önanga yomomanarama. De o huba mangï yogetongo gënanga o Yosia watuhuku o nyawa manga kobo-kobongo. Iböto gënanga ünanga wolio o Yerusalemika.

²¹Ipaha ma Koano Yosia wahipareta o kawaha mangale ihi rame o Paskah hokä itö tuli-tulihi o Jaji De ma Jou mabuku magoronaka. De hoko gënanga önanga iwi horomati ma Jou, toönanga manga Jou Madutu.

²²Ma mulaenge maöraha o Israeloka manyawa yapareta yonö nau-nauru komaiwahi naga o Israeloka manga koano ekola o Yehuda manga koano ihi rame o Paskah hoko gënanga.

²³Duga-duga mataongo ngimoi de tufangeoka aipareta o Yosia gënanga dahaö ihi rameoli o Paskah o Yerusalemoka mangale iwi horomati ma Jou.

²⁴Mangale wadiai o tita-o tita itö tuli-tulihi o buku magoronaka wamö make-make ma Imam wo Momulia o Hilkia ma Jou Ai Tauoka, mata-mata yoaho-ahoko o nyawa manga jiwa yo hone-honengoka deʼ yomai-maihi waduhu ma Koano Yosia o Yerusalemoka deʼ o Yehudaoka ingodumu, daha wa umo mata-mata o tau manyawa manga gikiri, o gomanga, de okia honanga yapö pake-pake mangale yahuba o giki-gikiri.

²⁵Komaiwahi naga o koano hokä ma Koano Yosia woma higilaongo ma Jouika de ai hininga ma gahumu, de wohidumutu gënanga ai wowango madodagi magoronaka de ai manarama, imamoteke de o tita ingodumu imö make-make o Musa ai Buku magoronaka. Ma koano Yosia ipahaika, koiwaka nagali o koano hokä unanga.

²⁶Mä ma Koano Manasye ai manarama yamomikoka ma Jou Ai dohata o Yehudaika; de Ai dohata gënanga ihonenguahi.

²⁷Ma Jou wotemo, ”Okia Tadodiaioka o Israelika, aha Tadiaiö o Yehudaika. O Yehuda manyawa aha Tä umo o berera Tahi döa-döakoka onangika. Ngohi aha tä tila o Yerusalem, o kota Taö iri-iriki, o Tauö nënanga, imamoteke Ahi demo aha idadi o puji mangï Ngohino.”

²⁸Ma Koano Yosia wohonenge o parangi magoronaka o Megidoka maöraha ünanga wöiki wïparangi o Nekho, o Mesir manga koano, magogiria wotagi ai himangika de ai duduono mangale iwi riwo o Asyur ma koano o Efrat ma Ngairi ma datekoka. Ma Koano Yosia ai mayeti yal̄ë ai pegawe-pegawe daha yao i higilio de o kureta o Yerusalemika. Dokengoka ünanga iwi lungunu o kokoano manga jereoka. Daha o Yehuda makawaha iwi iriki deʼ iwi goraka aingohaka o Yoahas wodadi o koano wi tagali ünanga. Ma jarita mahomoa yakorona ma Koano Yosia itulihi o Yehuda manga Kokoano manga Jarita mabuku magoronaka.

²⁹

³⁰

³¹O Yoahas ai umuru o taongo monaoko de hange maöraha ünanga wodadi o Yehuda manga koano, deʼ ünanga wopareta o Yerusalemoka o mede hange madekana. Ngoi ayo ami romanga o ngo Hamutal o Yeremia ngoi ora o Libna ma kotaino.

³²O Yoahas wo baradoha ma Jouika hokä ai ete de ai tohora.

³³O Yoahas aipareta ipaha maöraha o Nekho o Mesir manga koano wïtagoko ünanga o Riblaoka, o Hamat madaeraoka, deʼ wäpakisa o Yehuda yofangu o soungu unangika mangöe o haaka o kilo o ribu hange de ratuhu iata de o gurasi o kilo moruange de iata.

³⁴ Ipaha ma Koano Nekho wigoraka o Yosia aingohaka o nauru ai romanga o Elyakim wodadi o Yehuda manga koano, de watururu ai romanga o Elyakim idadi o Yoyakim. O Yoahas wiao o Mesirika deʼ ünanga wohonenge dokengoka.

³⁵Mangale yofangu o soungu wadö dotagahoko o Mesir manga koano, ma Koano Yoyakim wal̄ë o soungu o kawahaino imamoteke manga dagakunu önanga moi-moi.

³⁶ O Yoyakim ai umuru o taongo monaoko deʼ motoa maöraha ünanga wodadi o Yehuda manga koano, de ünanga wopareta o Yerusalemoka o taongo ngimoi de moi madekana. Ngoi ayo ami romanga o ngo Zebuda, o Pedaya ngoi ora o Ruma makotaino.

³⁷O Yoyakim wobaradoha ma Jouika hokä ai ete de ai tohora.