Read Tobelo O KOKOANO MAHINOTOKA 25 Bible Online

O KOKOANO MAHINOTOKA 25 - Tobelo bible

O KOKOANO MAHINOTOKA 25

¹ Ipaha o Zedekia woma lawani o Nebukadnezarika o Babil manga koano. Karana gënanga o Nebukadnezar de aitentara yopoparangi yongodumu yoböa de yaparangi o Yerusalem o wange ma ngimoioka o mede ma ngimoiuku o taongo mahiwo magoronaka o Zedekia aipareta. Onanga ihi goko o tentara manga baluhu ai ngï o kota maporetoka, ihi goko o bebeno o mehele ihi giloliti,

²deʼ gila-gila ihi giloliti o kota gënanga hiädono o taongo mangimoi de moi o Zedekia aipareta.

³Mawange hiwooka o mede ma iata mataongo genangoli maöraha o balä o habirokata duru hoko gënanga magiria hiädono o kawaha ka utu o de koiwaka toönanga manga inomo,

⁴ o kota mabebeno o mehele manga haturu ya kilianga. O hutu gënanga, ngaroka o Babil manyawa magogiria yakiloliti o kota gënanga, mata-mata o Yehuda manga tentara ihi oara manga diri yameta o Yordan ma Waiika. Onanga ya l̄ë o ngekomo yatilakuru o kadato ma dumule, daha yohupu yanonu o ngorana ma amo-amoko ima dohanga o bebeno o mehele hinoto o ngïoka gënanga.

⁵Mä o Babil manga tentara iwi ginïki ma Koano Zedekia, de iwi tagoko o Yerikho matonaka irata-rataoka. Mata-mata ainyawa yoara iwi dogumal̄aika ünanga.

⁶Ipaha ma Koano Zedekia iwi ao ma Koano Nebukadnezar o Ribla makotaka, daha iwi gelenga o hukumanga.

⁷ Ai ngoha-ngohaka yatoma ai lako mahimangoka. Iboto gënanga o Zedekia yatubalenge ai lako, daha iwi rante de iwi ao o Babilika.

⁸Mawange matumidoka o mede motoa o taongo ngimoi de hiwo magoronaka o Nebukadnezar o Babil manga koano aipareta woboa o Yerusalemika womatengo ai romanga o Nebuzaradan. Unanga ganga wi nonasihati de o Nebukadnezar aitentara manga kapita.

⁹ O Nebuzaradan watuhuku ma Jou Ai Tau, ma koano ai kadato, de manga tau o nyawa mata-mata ihibö balu-baluhu o Yerusalemoka.

¹⁰Daha mata-mata ainyawa yakilianga o kota mabebeno-bebeno o mehele gënanga.

¹¹Ipaha o kawaha kanagahi o kotaoka, enagënanga yotö tuka-tukangi mahou-houohi, hagala o nyawa mihikini de hagala o nyawa yoa-oaroka o Babil ma nyawaika, mata-mata wa ao o Nebuzaradan o Babilika.

¹²Mä utu o kawahaino duru yomö mihikini de koiwa toönanga manga arata yamal̄aika o Yehudaoka de yahuloko yo manarama o angguru madumule de o dumule-dumule.

¹³ O liate-o liate o tabaga de o kureta-o kureta ma Jou Ai Tauoka ihi kinïki de marube o tabaga yapooteke o Babil ma nyawa, daha mata-mata matababaga yao toönanga manga bereraika.

¹⁴ Onangö yao o bara-baranga nënanga: o sikop-sikop, o huhuba makafo mangï, o hilo mapakakaha-pakakaha, o mangko-mangko mangale ihidö daku-dakunu o aiwani ma awunu yatö toa-toaka mangale o huhuba, o mangko-mangko mangale ihi tuhu-tuhuku o dupa, de mata-mata o baranga mahomoa o tabaga yapö pake-pake mangale o puji madodagi.

¹⁵O bara-baranga o gurasi de o haaka, idogoika o mangko-mangko mai teteke de hagala o dodai mangale o uku ma ngaboho wa l̄ë o Nebuzaradan mahirete.

¹⁶O bara-baranga o tabaga wadodiai ma Koano Salomo mangale ma Jou Ai Tau, enagënanga o liate hinoto, o kureta-kureta de o rube ma pako-pako mata-mata hoko gënanga madubuho hiädono yakunua itibanga.

¹⁷O liate hinoto o tabaga gënanga ima daene; moi-moi ma gurutil̄e o metere tufange de moi o liate mahäeke o tabagaino magurutil̄e o metere moi de o senti moruange. Ya kilolitino o liate mahäeke yo getongo gënanga naga yodoriki de o poromu o delima mahohoko o tabagaino.

¹⁸Mahomoa de gënanga, o Nebuzaradan watagoko ma Imam wo Lamo-amoko o Seraya, o Sefanya ma imam wirö riwo-riwo, ya ruange yogoa-goana ma Jou Ai Tau mangorana, yamotoa ma koano ai diri yonö nasihati kanagahi o kotaoka, makapita, makapita ai wakili wohi dödailako o tentara manga buku-buku, de yamori butanga o nyawa yolago-agomo mahomoa.

²⁰Mata-mata o nyawa gënanga ya ao ma Koano Nebukadnezarika o Ribla makotaoka,

²¹o Hamat madaeraoka. Dokengoka önanga yohangihara daha yätoma. Hoko gënanga hagala o Yehuda manyawa ya ao toönanga manga bereraka de ya ao yaumo-umoika.

²² Iböto gënanga ma Koano Nebukadnezar wigoraka o Gedalya o Ahikam aingohaka de o Safan ai danongo, wodadi o Gubernur o Yehudaoka mangale wapareta mata-mata o nyawa kayogo gogerohi dokengoka.

²³Maöraha o tentara manga baluhu deʼ o Yehuda manga tentara ima ike-ikeua o Babilika yoihene mangale iwi goraka gënanga, önanga mata-mata yoböa o Gedalyaika o Mizpaoka. O tentara manga balu-baluhu gënanga enagënanga o Ismael o Netanya aingohaka, o Yohanan o Kareah aingohaka, o Seraya o Tanhumet aingohaka o Netofa makotaino, de o Yazanya o Maakha makotaino.

²⁴O Gedalya watemo onangika mata-mata, ”Ngini iparaluua niä modongo o Babil mapopareta yopangka-pangkatika. Nigö gogere dika tongone nanga bereraka nënanga de nidadi o Babil ma koano ai gilaongo. Ngohi tatagongo ngini aha ni halamati.”

²⁵ Mä o mede matumidi o taongo gënanga o Ismael o Netanya aingohaka de o Elisama ai danongo ma koano kai difaukuohi, yöiki ima kinïki o nyawa yangi moi o Mizpaika. Onanga iwi parangi de iwi toma o Gedalya yahikinïki o Yehuda manyawa deʼ o Babil manyawa naga dede o Gedalya genangoka.

²⁶ Daha o Yehuda makawaha yongodumu, yokö kaya-kaya yaoa yomö mihikini, ima kinïki de o tentara manga balu-baluhu yoara o Mesirika karana yamodongo o Babil manyawaika.

²⁷Mawange monaoko de tumidoka o mede mangimoi de hinoto o taongo moruange de tumidi magoronaka ibötino, o Yoyakhin iwi ao iwi tabuanga o Babilika, o Ewil-Merodakh wodadi o Babil manga koano. O taongo genangoli ünanga wohi dumutu ai dora de ai hayanga o Yoyakhinika de wihihupu ünanga o buino,

²⁸ikali wihidiai de kaya oa-oa. O Yoyakhin wihi döaka o pangkati iholoi ikurutil̄e ngaro de kokoano mahomoa yaö umo-umo o Babilika.

²⁹O Yoyakhin womahi noaokauaoli o bui ma pakeanga de biaha wol̄omo o kadatoka ikali iwihi döaka o tiwi mangale ai wowango maparalu.