Read Tobelo O KOKOANO MAHINOTOKA 3 Bible Online

O KOKOANO MAHINOTOKA 3 - Tobelo bible

O KOKOANO MAHINOTOKA 3

¹Ma taongo ngimoi de tufangeoka aipareta o Yosafat o Yehuda ma koano, o Yoram o Ahab aingohaka wodadi o Israeloka manga koano de wopareta o Samariaoka o taongo ngimoi de hinoto ma dekana.

²Unanga wadiai itotorou ma Jou Ai lolegaka, mä ünanga imake teroua manga dorou o Ahab de o ngo Izebel, ai dimono. O dulada ai ama wadodiai mangale wahuba o Baal wakiliangoka.

³Mä, hokä ma Koano Yerobeam o Nebat aingohaka wopareta kowahi de ünanga, unangö idadi hababu o Israeloka manyawa yobaradoha de ima togumua yadiai o hali gënanga.

⁴Ma Koano Mesa o Moabino de ai duba o gigini. Hokä ma soungu ma koano Israelika, o taongo ihi getongo ünanga wohi döaka o duba mangohaka o 100.000 moi o duba magogo o duba ma naurino 100.000 moi.

⁵Mä ipahaika ma Koano Ahab wohonenge, o Mesa woma lawani o Israelokaika.

⁶Karana gënanga ma Koano Yoram de ma japatioka wamal̄a o Samaria de wöiki wahidiai aitentara yopoparangi yongodumu.

⁷Unanga wohi dingoto o behehongo nënanga ma Koano Yosafatika o Yehudaino, ”Ma Koano Moab woma lawanoka ngohino; ka nomodeke Ngona dede ngohi hiparangi hilawani ünanga?” ”Kayaoa,” ma Koano Yosafat wohaluhu. ”Ngohi de ahi nyawa ikali manga duduono yokö kuda-kuda mini nïki dede Ngona.

⁸Hanonu o ngekomo kiaika ngone aha haparangi?” ”Ngone ha l̄ë o ngekomo yakokaika o Edom matonaka mako kakahaika,” o Yoram wohaluhu.

⁹Daha ma Koano Yoram woma jobo imakinïki o Yehuda ma koano de o Edom ma koano. Yodagi o wange tumidi madekana iböto, toönanga manga akere imataka, hiädono toönanga manga duduono de manga aiwani toönanga manga kia honanga yago gora-goraka yakunua yokere.

¹⁰”Hobodito ngone!” ma Koano Yoram wopöaka. ”Ma Jou wo hi datoroka mangale wona hilapahi ngone ina ruange ma koano Moabika!”

¹¹Ma Koano Yosafat woleha, ”Bote nenangoka koiwa o nabi yakunu yoleha ma Jouika mangale ngone?” Womatengo ani ma Koano Yoram ai tentaraino manga baluhu wohaluhu, ”Naga o Elisa o Safat aingohaka! Unanga mahira o Elia wirö riwo-riwo.”

¹²”Itiai! Ma Jou igoungu wotemo itilakuru ünanga,” ma Koano Yosafat wato. Daha o koano yaruange gënanga yöiki o Elisaika.

¹³”Yadodoa nigahoko o roriwo ngohino?” o Elisa wato ma koano Israelika. ”Niöiki dika nia dimono manga nabi-nabiika!” ”Kowali!” o Yoram wohaluhu. ”Hababu ma Jou wohi datoroka mangale womi hilapahi ngomi imi ruange ma Koano Moabika.”

¹⁴O Elisa wohaluhu, ”De ma Jou wowango-wango, ngohi tilö leleani, ngohi totemo de tohi totararonika nako karana ma Koano Yosafatua ngohi tihö horomati, ngohi toluku tohi dailako dede ngona Tuanga.

¹⁵Öraha nënanga niwi aoino womatengo wohi gogogule o kecapi.” Maöraha o nyawa gënanga wohi gogule o kecapi, o Elisa iwi kuaha ma Jou Ai Womaha,

¹⁶hiädono ünanga wotemo, ”Nenanga ma Jou woto temo-temo: ’Nia diai o goti-o goti o ngairi mario itö tore-toreoka nënanga.

¹⁷Ngaroka ngini nia makeua o awana iuti ekola o hidal̄oko iwuwu, ma’ o äkere aha de ma bo boloioka o ngäiri ma rio itore-toreoka nënanga. Ngini de nia aiwani o gigini de nia aiwani nihigö gora-goraka nia kiahonanga aha nia make o akere iyaoaoka mangale niokere nimahi gogihounika.’ ”

¹⁸Daha o Elisa wotemo wohi gila-gila, ”Mä gënanga duga-duga o perekara ma iteteke mangale ma Jou. Unanga aha wini hidöakö o utumu nginiika mangale hagala o Moab manyawa.

¹⁹Toönanga ma kota mata-mata ma bebeno o mehele de ma rorahai aha ngini nia kilianga; mata-mata o hohoko-o hohoko ma utu ngini nia tol̄onga, mata-mata o akere ma lako ngini nia tamunu, de mata-mata toönanga manga dumule iboburere aha ngini nia kaweli de o helewo hiädono ibinaha kama moiuku.”

²⁰Yarehino, maöraha o ngorumino mahuhuba ihihuba, i hahuru o akere o Edomika ihimangoka de yaino hiädono ya ömanga o ngairi mario itö tore-toreoka gënanga.

²¹Maöraha o Moab manyawa yoihene o koano yaruange gënanga yoböainoka yaparangi, daha mata-mata o nyawa — yatotimono hiädono yogö gö — yaku-akunu yamoku o daë, yatoomu de yahi gogere manga hiribatingoka.

²²Yarehino, maöraha önanga yomomiki o ngorumino, o wange yodihiwara o akere ma l̄okuino hiädono yamake mamodokara hokä o awunu,

²³önanga yopöaka, ”O awunu! Maraioka hagala o tentara manga duduono nanga haturu yaruangeino ima kangamoka de imako toma! Niaino ngone höiki häora toönanga manga tau-tau!”

²⁴Mä maöraha o Moab manyawa gënanga ima hiädono manga tau-tauika gënanga, o Israeloka manyawa yaparangi yahi dodohuku önanga gila-gila yöiki yaginïki ikali yätoma önanga,

²⁵de yakilianga toönanga manga kota. O dumule yogetongo maboburere önanga yatilakuru, önanga yakaweli de o helewo. Mabaha o dumule mata-mata yatamunu de o helewo. Hagala o Israeloka ma nyawaö yatamunu mata-mata o akere malako de yatol̄anga o hohoko-o hohoko mautu-utu. Igö gogere duga-duga o Kir-Hareset makota, o Moab makota matiti. Mabaha o kota genangö ihi giloliti yakaweli de o helewo mangale yogö gatepel.

²⁶Woma nako ibötino, wakunua woma tumunguoli, ma koano Moab waao ya 700 o tentara yososawaro yapake o oworo, daha ihi dailako yongohama ma koano Edom ai gogoana, ma’ kaidadiua dika.

²⁷Karana gënanga ünanga wil̄ë aingohaka o nauru, daha wihihuba o kota mabebeno o mehele mal̄okuoka hokä o huhuba mangale o Moab manga gikiri. Done o Israeloka manyawa yohäwana, hiädono önanga manga duduono ima dohuku o kotaino gënanga daha yolio toönanga manga bereraika.