Read Tobelo O KOKOANO MAHINOTOKA 4 Bible Online

O KOKOANO MAHINOTOKA 4 - Tobelo bible

O KOKOANO MAHINOTOKA 4

¹O wange moiuku ma nabi womatëngo ngoi fao möiki o Elisaika de motemo, ”Bapa, tongohi ahi rokata wohonengoka! De Bapa nohiöriki unangö o nyawa wihi ngou-ngounu ma Jou Madutuika, maʼ ünanga wonagimi womatengoika. Oraha nënanga ünanga woböa mangale wä l̄ë tongohi ahi ngohaka yahinoto de wahidadi önanga o gilaongo, hokä ai nagimi mabobangu tongohi ahi rokata wohö hone-honenge.”

²O Elisa womi leha, ”Sarakia ngohi täkunu to nï riwo Ayo?” ”Ayo to ngona okia ani tauoka?” ”To ngohi ahi kia-kia ua,” mo häluhu o ngoheka gënanga, ”Sowaliua o zaitun ma minya o boto ma i tetekuku moi.”

³O Elisa womitemo, ”Noiki nobau o boto mahomoa hatoli iwoë nima koka datekika Ayo.

⁴Iböto gënanga kokiani Ayo ikali ani ngoha-ngohaka Ayo ni wöhama o tau ma goronaika de nia beno nia ngorana. No guhe o minya o boto ma itetekoka gënanga o boto-o boto gënanga ma goronauku, de na tingaka iö oma-omangoka gënanga.”

⁵Daha mo lio o ngoheka gënanga ami tauika. Munanga de ami ngoha-ngohaka yo wohamoka de ma beno ami tau ma ngorana, münanga ma l̄ë o boto mai teteke madol̄a o zaitun ma minya gënanga, daha mo guhe o minya gënanga o boto-o botouku ami ngoha-ngohaka ihi dö döa-döaka munangika.

⁶O boto-o boto gënanga mata-mata iomangoka, munanga mo gähoko o boto moioli. ”I mataka,” mo häluhu ami ngoha-ngohakino mo ma tëngo. Daha o minya gënanga iuihokauaoli.

⁷Ipaha o Ayo gënanga moikoli ma nabi Elisaika, de o Elisa womitëmo, ”Na hükunu o minya gënanga mangale nohi fangu Ayo ani nagimi mata-mata, de ma boloi ya oaka mangale nia wowango Ayo de ani ngoha-ngohaka.”

⁸O Sunemoka mo gögere moma tëngo o ngoheka mo kaya. O wange moiuku maöraha o Elisa wöiki o Sunemika, o ngoheka gënanga mi ahoko wol̄omo. Öraha gënanga ma hi geto-getongo o Elisa wo tulu o Sunemoka ünanga wol̄omo o ngoheka gënanga ami tauoka.

⁹Ipaha mi tëmo o ngoheka gënanga ami rokatika, ”Ngohi tongaku ma Bapa ma moi-moi wo tulu nenangoka, gënanga i gou-goungu ma Jou Madutu Ai gilaongo moi.

¹⁰Kayaoa ngone hodiai moi o kamari mai teteke tongone nanga tau malape il̄oku-l̄oku il̄eoka, de hogelenga de o dangiri, o meja, o kuruhi, de o hilo hupaya ünanga yakunu woma hidodogumu genangoka maöraha magetongo ünanga wonä lega ngone.”

¹¹O wange moiuku o Elisa woböali o Sunemika. Unanga wodöa il̄eoka ai kamaroka mangale womahi batongo,

¹²ünanga wihuloko o Gehazi, wilö leleani, wöiki womi ahoko o ngoheka gënanga. O ngoheka gënanga moböa inoka, o

¹³Elisa witemo o Gehaziika, ”Nomi leha munangika sarakia ngohi yakunu tabalahi ami kangela mangale ngone. Mudukua munanga moigo ngohi töiki ma koanoika ekola o tentara yoparangi manga kapitaika de tohi ade-ade mangale ami paralu.” O ngoheka gënanga mohaluhu, ”Ngohi togogere tongohi ahi roriadodoto manga hidogoronaka de okia-kiaua ahi kuranga.”

¹⁴Daha o Elisa wïleha o Gehaziika, ”Nako hoko gënanga, okia yakunu ngohi tadiai mangale munangika?” O Gehazi wohaluhu, ”Munanga koiwa ami ngohaka, Bapa, de ami rokata iwi perekioka.”

¹⁵”Nomi ähoko o ngoheka gënanga,” o Elisa wato. O ngoheka gënanga maino de moma okoil̄e o ngoranoka.

¹⁶ Daha o Elisa womitemo munangika, ”O taongo nanga himangoka, maöraha hoko nenangoli, Ayo nomä daioka o ngohaka magil̄au o nauru womatengo.” ”Bapa, uha noeluku!” o ngoheka gënanga mato. ”Bapala ma Jou Madutu Ai gilaongo!”

¹⁷Mä itiai okia o Elisa wotö temo-temooka. O taongo yaino, done maöraha ima tero hoko genangoli o ngoheka gënanga mihi ngohaka o ngohaka o nauru womatengo.

¹⁸O ngohaka gënanga wolamokoka, o wange moiuku maöraha o gugutuku, o ngohaka gënanga wöiki ai amaika naga o dumuleoka ima kinïki yoö utu-utuku.

¹⁹Itodokanino o ngohaka gënanga womahiböaka ai amaika, ”Adede! Ahi häeke yohiri!” ”Niwi ao o ngohaka gënanga ngoi ayoika,” ai ama wïtemo womatengo wolö leleanika.

²⁰O ngohaka gënanga wiao ngoi ayoika, daha ngoi ayo mi totiri ünanga. Mawange o bobimaoa o ngohaka gënanga wohonenge.

²¹Ngoi ayo miao ünanga daku il̄e, o Elisa ai kamaril̄e de mirubaiha o dangiri ma l̄okuoka. Iböto gënanga munanga mohupu de mabeno o ngorana,

²²daha möiki mi ähoko ami rokata. Munanga mato, ”Nihuloko womatengo wolö leleani waino nenangino de o keledai o dutu moi. Ngohi kiani toma tai-taiti töiki ma Nabi Elisaika, de aha itaiti toma idulu.”

²³”Yadodoa kiani noiki öraha nënanga?” womi leha ami rokata. ”O wange nënanga o puji mawangeua de o Mede ma Hungi mawange ma ago-agomuaö.” ”Yadodoaua,” mohaluhu.

²⁴Munanga mohi noa iböto magogogere o keledaiika gënanga, munanga mitemo womilö leleaniika, ”Nagohara o kuda nënanga hupaya ima popäta duru itaiti; uha nakuranga majapati nako toni hulokua.”

²⁵Daha moma jobo o ngoheka gënanga o Karmel mal̄okuika o Elisa ai ngï ika. Magurutikahi o Elisa womi makeoka o ngoheka gënanga moboa. O Elisa witemo o Gehaziika, ”Nomi lega, o ngo ayo o Sunemino gënanga moböaino!

²⁶Itaiti nöiki nomï buhuku munanga de nomi leha sarakia madodagi ami tau manyawa.” ”Mata-mata kayaoa-oa,” o ngoheka gënanga mato o Gehaziika.

²⁷Mä maöraha moma hiädono o Elisa ai himangoka, munanga momahi tudukuku de makö o Elisa ai l̄ou. O Gehazi womau wo mihi rehene munanga genangoka, ma’ o Elisa wato, ”Mal̄aika dika! Homi pulo-pulono munanga duru ami hininga ihuha. Mä ma Jou wo hihi ngahu okia-kia ua ngohino!”

²⁸O ngoheka motemo, ”Bapa, ngohi togahokua o ngohaka Bapaika. Mä ngohi totemokaö Bapaika hupaya uha nohihi döaka o ngonganono kama homoa ngohino.”

²⁹O Elisa widokangidulu o Gehaziika daha witemo, ”Itaiti! Na l̄ë tongohi ahi diki-diki de nöiki gila-gila o Ayo nënanga ami tauika. Uha noma togumu mangale natabea o nagonaikaö dika ngona ni maka make o ngekomoka. Nako o nyawa ini tabea ngonaika, uha naumo o öraha mangale nabalahi manga tabea. Noma hiadonoka itaiti, nakelenga tongohi ahi diki-diki o ngohaka gënanga ai roëhuku.”

³⁰O ngoheka gënanga motemo, ”Bapa Elisa! De ma Jou wo wango-wango dede ani nyawa Bapa, ngohi aha toni mal̄aua Bapa!” Hababu gënanga o Elisa womä jobo ima nïki o ngoheka gënanga ami tauika.

³¹O Gehazi wahihiraika önanga mangale wakelenga o Elisa ai diki-diki o ngohaka ai roëhuku gënanga, ma’ koiwa o ilingi ekola o nonako-o nonako mahomoa o ngohaka gënanga wowango. Daha o Gehazi wöiki ima make o Elisa de wotemo, ”O ngohaka gënanga womomikua.”

³²Woma hiadonikaka o ngoheka gënanga ami tauoka, o Elisa wo wohama womatengo ami kamari magoronaika de wamake o ngohaka ai mayeti gënanga irubaiha o dangiri ma l̄okuoka.

³³O Elisa wabeno o ngorana daha woma niata ma Jouika.

³⁴ Iböto gënanga ünanga widomotumuku o ngohaka gënanga ai l̄okuoka de wohi tigi-tigiuku ai uru, ai lako de ai giama ai uruku, ai lako de ai giama o ngohaka gënanga. Karana ünanga wo diai hoko gënanga, done ai roëhe o ngohaka gënanga idadi ihauku.

³⁵O Elisa womomiki de woma dagi waika waino o kamari gënanga magoronaka, ipaha widomotumukuoli o ngohaka gënanga ai roëhe ma l̄okuoka. Mabaha o ngohaka gënanga wohorene wohi gali matumidi, de wahelenga ai lako.

³⁶O Elisa wïhuloko o Gehazi womi ahoko o ngohaka gënanga ngoi ayo, de o ayo gënanga mowohaminoka, o Elisa womi temo munangika, ”Nenanga Ayo ani ngohaka.”

³⁷O ayo gënanga matilabukuku o Elisa ai himangoka daha mi ao mihi hupu ami ngohaka gënanga.

³⁸Oraha moiuku idadi o balä o habirokata o berera ingodumu. Daha o Elisa wolio o Gilgalika. Maöraha ünanga magogiria wädotoko o nabi o doomu moi, ünanga wï huloko wilö leleani wa l̄ë o bohoko mapako-pako deʼ wahakai o inomo mangale önanga.

³⁹Womatengo ani o nabi-nabi ino gënanga wohupu o dumuleika mangale wolingiri o gau-gauku, daha ünanga wamake ma rupa ido dato-datomo o hambiki o honganika. Unanga wapagele mahohoko idö dato-datomo gënanga kohä ngoë, deʼ wao wohigilio. Wohi örikua o hohoko okia gënanga, ünanga wa tobi-tobiki de wönoauku o bohoko magoronauku gënanga.

⁴⁰Iohakoka, ünanga wahi kodoku o nabi-nabiika gënanga. Mä önanga dahaö yataili o inomo gënanga, önanga yopöaka o Elisaika, ”Bapa, nënanga o padoha!” Önanga yoluku yä ol̄omo.

⁴¹Daha o Elisa wahuloko yo l̄ë o gopunu mahuhutulu, daha ünanga woderero o bohoko magoronauku gënanga. Iböto gënanga ünanga wotemo, ”Nihi kodokuoli o hakai gënanga.” Inyata o inomo gënanga ipadohaoka ua.

⁴²Öraha mahomoa mamoiuku, o nauru womatengo woböa o Baal-Salisa ino. Unanga wigao mangale o Elisa o gandum daha i utukino de o rotiohi o gahumu monaoko yadiai o gandumino ma hasili o gugutuku madodi hiraka o taongo gënanga. O Elisa wähuloko iwilö leleani ihi kodoku o roti gënanga o nabi-nabi ika gënanga,

⁴³ma yolö leleani gënanga yato, ”Yakunua imake wedonua o nyawa yaratuhu moi!” O Elisa wohaluhu, ”Nia hidoku dika hupaya önanga yol̄omo, hababu ma Jou wotemo önanga aha yol̄omo iböto kanagahi mahou.”

⁴⁴Yolö leleani gënanga ihi kodoku o inomo gënanga onangika, de önanga mata-mata yol̄omo iböto kanagahi mahou hokä ma Jou wotö temo-temoka.