Read Tobelo O KOKOANO MAHINOTOKA 5 Bible Online

O KOKOANO MAHINOTOKA 5 - Tobelo bible

O KOKOANO MAHINOTOKA 5

¹ O Naaman ganga o Siria manga tentara yoparangi manga kapita duru wï igo de wï horomati ma koano Siria. Hababu, itilakuru o Naaman, ma Jou wi hi döakoka o utumu o Siria manga tentaraika. O Naaman ganga o kapita womatengo wonö nau-nauru, ma’ ünanga wopanyake o pado hobö borohono.

²O öraha moi uku o Siria manyawa yaparangi o Israeloka manga berera. O parangi gënanga magoronaka o Israeloka manga ngohaka o ngoheka momatëngo imi tagoko de imi ao hokä o dagokino, ipaha modadi o Naaman ngoi hekata momilö leleani.

³O wange moiuku molö leleani gënanga momitemo ngomi nyonyaika, ”Nyonya, hokä nako matuanga wöiki ima make ma nabi wogogogere o Samariaoka, maraioka ma nabi gënanga aha wihi togumu matuanga.”

⁴Maöraha o Naaman woihene o hali gënanga, ünanga wöiki makoanoika de wohi ade-ade okia o ngohaka o ngoheka mahö heto-hetongoka gënanga.

⁵Ma koano wïtemo, ”Kayaoa, nöiki o Israel manga koanoika. Ngohi aha totulihi o hurata unangika.” Daha o Naaman woma jobo de womä gao o tiwi o haaka o 30.000, o tiwi o gurasi o 6.000, de o pakeanga marorahai o pasangi ngimoi.

⁶O hurata waö ao-ao gënanga mademo hoko nënanga: ”De o hurata nënanga ngohi tihi nako ahi kapita, o Naaman, ngonaika Tuanga, hupaya Tuanga nihi togumu to ünanga ai panyake.”

⁷Maöraha ma koano Israel wabasa o hurata gënanga, ünanga wakakihi ai pakeanga ai hininga ihuha, ikali wotemo, ”O bodito, okia mahababu ma koano Siria gënanga wogahoko ngohi tihi togumu o nyawa nënanga? Ngohi ma Jou Madutua de ahi kuaha mangale tahi wango de tahohonenge o nyawa! Maraioka ma koano Siria gënanga wolingiri o huru-hara dede ngohi!”

⁸Ma nabi Elisa woihene mangale o hali gënanga, de wohidingoto o behehongo nënanga ma koano Israelika, ”Yadodoa ani hininga ihuha? Niwi huloko o nyawa gënanga waino ngohiino hupaya ünanga wohi öriki o Israeloka nënanga naga o nabi womatengo!”

⁹Karana gënanga o Naaman woma jobo de ai kureta de makuda o Elisa ai tauika, deʼ woma togumu ai ngorana mahimangoka.

¹⁰O Elisa wihuloko womatengo wilö leleani mangale witemo hoko nënanga o Naamanika, ”Noiki Tuanga noma öhiki nohigali matumidi o Yordan ma Ngairuku, marai Tuanga notogumu kamamoiuku.”

¹¹Woihene gënanga, o Naaman wongamo de wato, ”Ngohi tapikiri ünanga mahirete aha wohupu wohi make ngohi, de woma niata ma Jouika, ai Jou Madutu, ikali wakelu ai giama tongohi ahi roëhe ipopanyake ma l̄okuoka nënanga daha ngohi idadi totogumu.

¹²O Abana de o Parpar ma ngairi o Damsyikoka iholoi yaoa ngaro o ngairi okiainoö dika o Israeloka! Ngohi yakunu toma öhiki dokengoka de idadi totogumu!”

¹³Mä iwilö leleani imahitigi unangika de iwi temo, ”Tuanga, hohi ade woni huloko Tuanga nadiai okianaga moi mahü huha, maraioka Tuanga aha nadiai. Okia hongoli ünanga duga-duga woni huloko Tuanga noma öhiki hupaya notogumu!”

¹⁴Hababu gënanga o Naaman wöiki o Yordan ma Ngairika, daha wouti de wotumunu o ngairi magoronauku gënanga wohi gali ma tumidi hokä o Elisa wïhuloko. Daha o Naaman wotogumu. Ai roëhe idadi tumuloa okali hokä o ngohaka o goduru manga roëhe.

¹⁵Daha ünanga de mata-mata iwinö ninïki ima idulu o Elisaika, ”Öraha nënanga ngohi tohiöriki,” o Naaman wato o Elisaika, ö dunia yamode-modekika duga-duga naga kamoi o Jou Madutu, enagënanga ma Jou Madutu iwihö huba-huba o Israeloka manyawa. Hababu gënanga, nomodeke Tuanga natarima o ngongike ngohioka.”

¹⁶O Elisa wohaluhu, ”De ma Jou wowö wango-wango, ngohi tilö leleani, ngohi aha ta tarima ua o ngongike okiaö.” O Naaman wigegoto hupaya o Elisa womau watarima ai ngongike, mä o Elisa kahirahi watila.

¹⁷Daha o Naaman wato, ”Nako Tuanga kanoluku dika natarima tongohi ahi ngongike, nohi gumal̄a tao tohigilio o tonaka ma amoko yakunu yao magurutika o bagal. Hababu, mulaenge öraha nënanga ngohi aha tohi huba o huhuba duga-duga mangale ma Jou, deʼ mangale o gikirua mahomoa.

¹⁸Dama maöraha okia ngohi kiani tidatekuku tongohi ahi koano wöiki wohubayanga o Siria manga gikiri o Rimon matauika, tanu ma Jou wohihi apongo ngohi.”

¹⁹O Elisa wato, ”Noiki de ani halamati.” Daha o Naaman wöiki. Wotedekanua o Naaman woikoka,

²⁰o Gehazi o Elisa wilö leleani, woma tibanga, ”Ah, ya dodoa ünanga wimal̄aika woiki kowo fangua? Kokiani to ngohi ahi tuanga watarima o Siria manyawa ai ngongike gënanga! De ma Jou wowango-wango, ngohi kiani tinïki ünanga deʼ tamake okianaga moi unangino!”

²¹Daha o Gehazi winïki o Naaman. Maöraha o Naaman wamake naga o nyawa yoböa, ünanga ai kuretaka de wouti de wo leha, ”Naga okia?”

²²O Gehazi wohaluhu, ”No hihi apongo Tuanga, ngohi ihi huloko totemo Tuangika, nanga daha o nabi o goduru yahinoto yoböa o Efraim madaëra de mal̄oku-l̄okuoka de yaino. Tuanga ngohi togahoko hupaya Tuanga nohi döaka o tiwi o haaka o ribuhu hange de o pakeanga mahohailoa o pasangi hinoto mangale o nabi yahinoto gënanga.”

²³”Maraioka dika!” o Naaman wato, de ünanga wiributu hupaya o Gehazi wao o tiwi o haaka o 6.000. O Naaman wa hawo o tiwi gënanga o kadu-kadu hinoto magoronaka, de wa l̄ë o pakeanga mahö hailoa o pasangi hinoto. Mata-mata gënanga wohi döaka iwilö leleani yahinotoika, wahuloko ima dagi iwi hihiraika o Gehazi.

²⁴Ima hiadonoka o doporonoka o Elisa ai ngï wogö gogere, o Gehazi wa l̄ë o tiwi de o pakeanga gënanga o Naaman iwilö leleani ino, ipaha wagogono o tau magoronaka. Yolö leleani gënanga wahuloko yolio

²⁵daha ünanga wö wohamoli o tau magoronaika. O Elisa wi leha, ”Ngona okiaka de naino?” ”Ko, kiakaua de taino Tuanga!” wohaluhu.

²⁶Mä o Elisa wïtemo, ”To ngohi ahi hininga naga dokengoka maöraha o Naaman ai kuretaka de wouti mangale woni buhuku ngona. Nenanga ma orahua mangale natarima o tiwi de nohi ija o zaitun madumule, o angguru madumule, o duba de o hapi ikali o gogilaongo!

²⁷Karana ngona natarima o ngongike gënanga, ngona aha na tarimaö o Naaman ai panyake. Igoungu mangale kahi ado-adonika ani difaukuö aha yamake o panyake gënanga!” Maöraha o Gehazi wohupu genangino, ünanga wamake o panyake o pado — ai kai idadi duru kama gare-garehe.