Read Tobelo O KOKOANO MAHINOTOKA 6 Bible Online

O KOKOANO MAHINOTOKA 6 - Tobelo bible

O KOKOANO MAHINOTOKA 6

¹O wange moiuku o nabi-nabi wadö doto-dotoko o Elisa, yotaiana unangika. ”Onanga yato, ”O ngï hogogogere ngone duru itehehoto!

²Nomi higumal̄a ngomi miöiki mitol̄anga o gota o Yordan ma Ngäiri madatekoka, de mihi goko tongone nanga ngï hogogere dokengoka.” ”Kayaoa,” o Elisa wohaluhu.

³Womatengo ani toönanga manga hidogoronaka wiributu hupaya o Elisa wanïki dede önanga. O Elisa womodeke,

⁴daha önanga ima goraka ima kinïki. Imahiadonikaka o Yordan ma Ngairi madatekoka, önanga mulaenge yotolanga o gota.

⁵Itodokanino ai bahuku madoto womatengo toönanga manga hidogoronaka itifa o akere magoronauku. ”Adede, Bapa!” wo pöaka o Elisaika, ”O bahuku gënangaka ibauino!”

⁶”Okiauku itifa?” o Elisa woleha. O nyawa gënanga wihi dümutu mangï, daha o Elisa watobiki o gota madobiki de wohi kaweli o ngï ika gënanga. Daha ipuda o bahuku madoto gënanga o akere mal̄okuil̄e.

⁷O Elisa wïtemo, ”Na l̄ë!” o nyawa gënanga de ai giama wodöaka daha wal̄ë o bahuku gënanga.

⁸Oraha moiuku o Siria ima teke parangi de o Israeloka. Imahi teke dailako ipahaino de aitentara manga balu-baluhu, ma koano Siria wohi gogeroka kiaka önanga kiani imä tau.

⁹Mä o Elisa wohi dingoto o abari ma koano Israelika mangale wihi döaka o hohininga ünanga hupaya uha wöiki o ngï ika gënanga, karana o Siria manyawa manga biaha ya l̄ë o ngekomo gënanga.

¹⁰Hoʼ, o Israeloka manga koano wohidöaka o hohininga hagala o nyawa yogögogere itigika genangoka hupaya imä goana imahi dodiai. Hoko gënanga o Elisa mamuruono naga wihi döaka o hohininga ma koano.

¹¹O hali gënanga duru ai hininga yoigoua ma koano Siria, hiädono ünanga wä ahoko aitentara manga balu-baluhu de wä leha, ”Maraioka tongone nanga hidogoronaka naga yosetiaokaua! O nagona manyawaika nihi ngahu!”

¹²Womatengo o tentara manga baluhino gënanga wohaluhu, ”Moiua kaima tengöma, Jou Koano. Ma nabi Elisa wodadi hababu matiti! Unanga wohi ädono o Israeloka manga koanoika okia Jou Koano nahö heto-hetongoka, ngaroka gënanga nohi demo o kamari nomä idu-idu magoronaka.”

¹³”Niwi tailako nihi dodiai kiaka ünanga,” ma koano wo pareta, ”hupaya ngohi yakunu titagoko ünanga.” O nyawa iwi hingahu unangika o Elisa naga o Dotanoka.

¹⁴Daha o Siria manga koano wahi dingoto dokengika o duduono moi ma amo-amoko ima kinïki o kuda de o kureta ihi poparangi. Maöraha o hutu-hutu önanga imahiädono o kotaoka gënanga daha ihi giloliti.

¹⁵Yarehino, duru o ngoru-ngorumino maöraha o Elisa wilö leleani womomiki de wohupu, ünanga wä make o Siria manga tentara ihi gilolitoka o kota gënanga ingodumu de toönanga manga kuda deʼ manga kureta ihi poparangi. Hoʼ, ünanga wolio o Elisaika de wato, ”Hobodito ngone, Tuanga! Okia kokiani ngone hadiai?”

¹⁶”Ngarouha nohawana,” o Elisa wohaluhu. ”Naga ngoneino inahibö boa-boa iholoi yowoë ngaro de onangino yahibö boa-boa.”

¹⁷Daha o Elisa woma niata, ”Jou, tanu Ngona nahelenga ai lako wohilö leleani hupaya ünanga wämake!” Ma Jou wä tarima o Elisa ai niata hiädono öraha gënanga wilö leleani gënanga womä bulono, wamake ol̄oku gënanga iömanga de o kuda de o kureta o uku iwi kilolitino o Elisa.

¹⁸Maöraha o Siria manyawa gënanga yoparangi, o Elisa womä niata, ”Jou, tanu näpiloko hagala o nyawa nënanga!” Ma Jou watarima o Elisa ai niata, de önanga mata-mata yo dadioka yopiloko.

¹⁹O Elisa waika onangika de wätemo, ”Ngini inï hihanga. Nenangua ma kota ngini nia lingi-lingiri. Niaino nihi nïki ngohi, damä ngohi tinï ngotaka manyawa ngini niwilö lingi-lingirika.” Daha o Elisa wangotaka önanga o Samariaika.

²⁰Maöraha önanga yongohama o kota gënanga o Elisa womä niata, ”Jou, tanu nahelenga toönanga manga lako hupaya önanga imahi öriki.” Ma Jou watarima o Elisa ai niata; Unanga wahelenga hagala o nyawa gënanga manga lako hiädono önanga yoheranga yamake önanga naga o Samaria makotaka.

²¹Maöraha o Israeloka manga koano wämake hagala o Siria manyawa gënanga, ünanga woleha, ”Elisa, kokiani ngohi tä toma hagala o nyawa nënanga?”

²²”Uha,” o Elisa wohaluhu. ”Barikua o tentara Jou Koano natagokino o parangi magoronaka o Jou Koano natomaua, okia hongoli nënanga. Nahi döaka önanga yol̄omo de yokere, daha namal̄aika önanga yolio toönanga manga koanoika.”

²³Daha o Israeloka manga koano wodiai o rameanga ma amo-amoko mangale önanga. Önanga yol̄omo de yokere iböto, ünanga wä huloko önanga yolio o Siria ma koanoika. Mulaenge gënanga hagala o Siria manyawa ima togumu yaparangi o Israeloka manga berera.

²⁴Öraha muruono naga ipahaika o Benhadad o Siria manga koano wä ao aitentara yongodumu mangale yäparangi o Israeloka. Önanga yakilolitoka o Samaria makota,

²⁵deʼ mahasili o habirokata kohagiria o kota magoronaka, hi ädono o keledai mahäeke moi ma ija o tiwi o haaka mori tufange, de o namodara maioko, o ons hinoto maija o tiwi o haaka motoa.

²⁶Ma moiuku maöraha ma koano magogiria womä dagi-dagi o kota mabebeno o mehele mal̄okuoka, o ngoheka momatengo mopöaka, ”Jou Koano, nohi riwo!”

²⁷Ma koano wohaluhu, ”Nako ma Jou wonï riwoua ngona, kiaka yakunu ngohi takunu tonï riwo? Tongohi koiwa ahi gandum ekola ahi angguru mateongo!

²⁸Okia ani huha?” O ngoheka gënanga mohaluhu, ”Ngohi dodiawo nënanga mohihi garoka ngohi hupaya ngomi mia ol̄omo ihira tongohi ahi ngohaka, daha yarehino ngomi mia ol̄omo ami ngohaka.

²⁹ Karana gënanga ngomi mia hakai tongohi ahi ngohaka daha ngomi mia ol̄omo. Yarehino mawange maöraha ngohi togahoko hupaya ngomi mia hakai ami ngohaka, munanga ma ngiunoka!”

³⁰Woihene gënanga, ma koano wakakihi ai pakeanga karana ai hininga mahuha. Hagala o nyawa imaö oko-okoino o bebeno o mehele madatekoka gënanga yakunu yamake ai baju magoronaka ganga o karongo.

³¹Ma koano wopöaka, ”O wange nënanga dika o Elisa kiani wohonenge. Mal̄aika ma Jou Madutu wohi hukumu ngohi itotubuho nako ngohi titomaua o Elisa!”

³²Daha ma koano wihuloko woma tengo wihi hiraika o Elisa ai tauika. Oraha gënanga o Elisa naga o tauoka, de o kawaha manga balu-baluhu yamuruono naga magogiria ima rekatika genangoka. Ma koano ai huhuloko gënanga womahi adonuahi, o Elisa wätemo o kawaha manga balu-baluhika gënanga, ”Nio hohininga! Wo toma-toma gënanga wähuloko o nyawa mangale ihi toma ngohi. Nako o nyawa gënanga damä womahiädono, nia beno o ngorana deʼ uha niwi higumal̄aika ünanga wowohama. Ai poretino ma koano mahirete aha woböa.”

³³O Elisa wotemo ibötuahi, ma koano womahiadonoka genangoka de wotemo, ”O huha nënanga ma Jou wonä hitapal̄u ngoneuku! Hoʼ, okiahi mabaraguna ngohi tonganono Ai roriwo?”