Read Tobelo O KOKOANO MAHINOTOKA 7 Bible Online

O KOKOANO MAHINOTOKA 7 - Tobelo bible

O KOKOANO MAHINOTOKA 7

¹O Elisa wohaluhu, ”Ni ihene okia ma Jou wotö temo-temoka! Yarehe, done maöraha hoko nënanga, de o tiwi o haaka moi dika o nyawa yakunu ima ija o kilo hange o gandum duru maoa-oa ekola o kilo butanga o gandum marupa mahomoa.”

²Ma koano ai diri yogoa-goana manga baluhu wabalahi, ”Kiaka yakunu! Genanga duru ihuha, ngaroka öraha nënanga dika ma Jou wohi guti o awana irö riki-rikimi o dihanguku!” ”Damä ngona aha namake o hali gënanga idadi, ma’ ngona aha na ol̄omua o inomo gënanga kama huhutulö mä,” o Elisa wohaluhu.

³O wange gënanga yaruata yopopanyake o pado hoboborohono naga o Samaria mangorana ma amo-amoko ma poretoka. ”Onanga imä ketemo moi de moiika, ”Okia mabaraguna ngone ho ma gö gogere nenangoka hodamä o honenge?

⁴Nako ngone howohama o kotaika, ngone aha hohi honenge o hahini; de nako ngone homagö gogere dika nenangoka, ngoneö aha hohonenge. Kayaoa ngone höiki o Siria manyawa manga tau-tauika. Kaduru iholoi önanga ina toma ngone. Mä nagaö yakunu ngone ina dodoaua.”

⁵Iböto o wange imulaenge ihuhutu önanga yöiki o Siria manyawa manga tau-tauika, ma’ önanga yämakeua kaima tengö genangoka.

⁶Hababu, ma Jou wadiaioka o Siria manyawa yoihene hokä parangi mailingi o duduono moi ma amo-amoko yokö kuda-kuda de yokokureta. O Siria manyawa yato bote ma koano o Israeloka wa hewaka o Het deʼ o Mesir ma koano ima kinïki manga tentara mangale yäparangi önanga.

⁷Karana gënanga o hutu genangö önanga yopiringana ihi halamati manga diri, de yamal̄a manga tau-tau, manga kuda, ikali toönanga manga keledai hoko gënanga dika manga tau-tauoka.

⁸O nyawa yaruata yopopanyake o pado gënanga ima hiädono o tau gënanga madatekoka, de yongohama o tau-tau moioka. Önanga yol̄omo yokere genangoka deʼ yal̄ë o gurasi, o haaka ikali o pakeanga-o pakeanga daha yöiki yagogono. Iböto gënanga önanga ima iduloli deʼ yongohama o tau-tau mahomoa, daha yodiai mahali kaima tero.

⁹Önanga ima ketemo moi de moika, ”Tongone nanga manarama nënanga itorou. O abari nënanga o abari maoa-oa deʼ kokiani ngone hohi ngahu! Nako ngone hotamä hiädono iyarehe, maraioka ngone inä hukumu. Kayaoa ngone hohi ngahu o hali nënanga o kadatoika.”

¹⁰Karana gënanga önanga ima idulu o Samariaika deʼ ihi böaka o kota mangorana ma amo-amoko magogoanika, ”Ngomi mi oikoka o Siria manyawa manga tau-tauika, deʼ inyata moiua o nyawa dokengoka. Toönanga manga kuda deʼ manga keledai ngomi mia makeika kaya liko ikahi mangïoka, de o tau-tau yo dogumal̄aika hoko gënanga dika.”

¹¹Yogö goa-goana ihi böaka o abari nënanga, hiädono o nyawa ihiädono o kadatoika.

¹²Oraha gënanga o wange kaihö huhutuohi, ma’ ma koano ka wo hupu dika o kamari woma idu-iduino, deʼ wätemo ai pegawe-pegaweika, ”Ni ihene! Ngohi tohi öriki o Siria manyawa manga datoro gënanga! Önanga ihi öriki ngone magogiria ina habirokata, karana gënanga önanga yamal̄a manga tau-tau deʼ yöiki ima ngiunika o tonaka malua-luasoka mangale ina nonai ngone hohupu homä lingiri o inomo. Iböto gënanga önanga aha i na parangi ngone deʼ yö gogere nanga kota.”

¹³Womatengo ma koano wigö goa-goana wato, ”Jou Koano, ngone kanagahi o kota magoronaka nënanga, nanga wowango ka imatero dika de önanga yohone-honengoka. Karana gënanga kayaoa ngone hahuloko o nyawa yamuruono naga, yobarene o kuda o dutu motoa o kuda-o kuda kanagahimahi dogoronaka, deʼ yoiki dokengika mangale yölega okia idö dadadioka.”

¹⁴Daha önanga yairiki o nyawa yamuruono naga, daha ma koano wähuloko o nyawa gënanga yobarene o kureta ihi poparangi hinoto de yöiki ya tailako okia idö dadadioka o Siria ma tentaraika.

¹⁵Önanga yöiki hiädono o Yordan ma Ngairika. O ngekomo ma gurutu önanga yamake o pakeanga deʼ o pakakaha-o pakakaha hohi bari-barihi. Mata-mata gënanga ihi kawelika hoko gënanga dika mangale o Siria manyawa maöraha önanga ihi oara manga diri. O huhuloko-o huhuloko gënanga yolio de ihi ngahu ma koanoika.

¹⁶Daha o Samaria manyawa ima popäta yohupu o kotaoka deʼ yaora o Siria manyawa manga tau-tau. Imamöteke de okia ma Jou wotö temo-temo, idadi o gandum o kilo hange ma oa-oa ekola o gandum marupa mahomoa o kilo butanga, maija duga-duga o tiwi o haaka moi.

¹⁷Ima koronaika öraha gënanga ma koano ai diri yogö goa-goana manga baluhu womanarama wogoana o kota mangorana ma amo-amoko. Unanga wohonenge genangoka iwi doko-doko o kawaha. O hali gënanga idadi imamoteke de o Elisa wotö temo-temoka ma koanoika maöraha ma koano woboa unangika.

¹⁸O Elisa wotemoka done maöraha hokä hoko gënanga iyarehe mawange, o gandum ma oa-oa o kilo hange ekola o gandum ma rupa mahomoa aha yahukunu o Samariaoka de maija o tiwi o haaka moi.

¹⁹De öraha gënanga ma koano ai diri yogö goa-goana manga baluhu gënanga wotemoka, ”Kiaka yakunu! Genanga duru ihuha, ngaroka öraha nënangaö ma Jou wohi guti o awana iriki-rikimi o dihanguku!” Daha o Elisa wohaluhu, ”Damä ngona aha namake o hali gënanga idadi, maʼ ngona aha na ol̄omua o inomo gënanga kama huhutulö.”

²⁰Hoko gënanga idadi o nyawaika gënanga — ünanga wo honenge o kawaha iwi doko-doko o ngorana ma amo-amokoka.