Read Tobelo O KOKOANO MAHINOTOKA 8 Bible Online

O KOKOANO MAHINOTOKA 8 - Tobelo bible

O KOKOANO MAHINOTOKA 8

¹ Öraha moiuku ma Jou wodotagao o balä o habirokata o Israel mabereraka idadi o taongo tumidino madekana. Kowahi gënanga o Elisa wohi ngahuoka o hali gënanga o Sunemino ma ngohekaika ami ngohaka wohiwö wango-wangookaoli. O Elisaö womi huloko munanga moma tururu de ami tau manyawa o berera ma homoaika.

²O ngoheka gënanga madiai okia wotö temo-temo o Elisa, deʼ moma jobo o Filistin manga bereraika mangale mogogere dokengoka.

³Maöraha o taongo tumidi gënanga ipaha munanga molio o Israelika. Daha munanga möiki de ami ngohaka ma koanoika mangale mogahoko hupaya ami tau deʼ ami dumule wohi gilio munangika.

⁴Öraha gënanga o Gehazi o Elisa wilö leleani ma koano wi gahokoka mangale wohi ade-ade mangale ihö hera-heranga wo dodiai o Elisa.

⁵De ima kokoranaika maöraha o Sunemino ma ngoheka gënanga moböa mï himanga ma koano mangale mohiädono ami gogahoko, o Gehazi magogiria wohi ade-ade mangale sarakia o ngohaka womatengo wohonengoka o Elisa wihi wangookali. Daha o Gehazi wato, ”Jou Koano nomomulia, nemunanga mangoheka gënanga, deʼ nënanga mangohaka wihi wangookaoli o Elisa!”

⁶Daha ma koano womi leha deʼ o ngoheka gënanga mohi ade-ade mangale o ngohaka gënanga. Iböto gënanga ma koano wï ahoko womatengo ai pegawe deʼ wipareta hupaya hagala madutu to ngoheka gënanga ihï gilio munangika, yongohamika ami dumule-ami dumule mahasili ma ija ingodumu o taongo tumidi madekana munanga o berera mahomoaka.

⁷Oraha moiuku o Elisa wöiki o Damsyikika. Ima daenika ma Koano Benhadad magogiria wopanyake. Maöraha ma koano woihene o Elisa naga o Damsyikoka,

⁸ünanga wïtemo o Hazaelika, womatengo ai pegawe, ”Nao o hadia manabi ika gënanga, deʼ nogahoko hupaya ünanga wo leha ma Jouika boteka ngohi nënanga aha totogumu ekola kowali.”

⁹O Hazael wa l̄ë o unta moruata de wohi barene de hagala rupa o Damsyik makota mahasili, daha wöiki o Elisaika. Maöraha woma hiädono o Elisa ai ngïoka, o Hazael wato, ”Ani gilaongo ma Koano Benhadad, wohi huloko ngohi mangale toni leha boteka ünanga aha wotogumu ekola kowali.”

¹⁰O Elisa wohaluhu, ”Ma Jou wotemoka ngohino ünanga aha wohonenge. Mä nato dika unangika, ünanga aha wotogumu.”

¹¹Ipaha o Elisa wipulono o Hazael de ai lolega idoto hiädono o Hazael idadi ai hininga ihuha. Itodokanino o Elisa woari.

¹²”Yadodoa Tuanga noari?” o Hazael wï leha. ”Hababu ngohi tohi öriki o dorou aha nadiai o Israel manyawaika,” o Elisa wato. ”Ngona aha natuhuku ma kota-ma kota mabebeno o mehele, nä toma manga o gogoduru maoa-oa, de nagoodongo o ngoha-ngohaka magil̄au ikali nabelaka manga mamata o ngongoheka magogiriaoka o ngohaka ihi ao.”

¹³ ”Ah, ngohi nënanga o nyawa tobaragunaua,” o Hazael wohaluhu, ”kiaka yakunu tongohi ahi kuaha hoko gënanga ma giria!” ”Mä Jou wohi hidumutoka ngohino ngona aha nodadi o Siria ma koano,” o Elisa wohaluhu.

¹⁴Maöraha o Hazael wolio o kadatoika, o Benhadad woleha, ”Wato okia o Elisa?” ”Unanga wato Jou Koano maraioka aha notogumu,” o Hazael wo haluhu.

¹⁵Mä iyarehino mawange o Hazael wa l̄ë moi o gal̄oko, deʼ watonooka o akeruku daha wihï dutukü uku ma koano ai bionuku hiädono ünanga wohonenge iwi lutu. Deʼ o Hazael wodadi o Siria ma koano witagali o Benhadad.

¹⁶O Yehoram o Yosafat aingohaka wodadi o Yehuda manga Koano maöraha ma Koano Yoram o Ahab aingohaka wä paretaka o Israeloka o taongo motoa.

¹⁷Oraha gënanga o Yehoram ai umuru o taongo moruange de hinoto, deʼ ünanga wopareta o Yerusalemoka o taongo tufange madekana.

¹⁸Unanga wokawingi de o Ahab ngoi ora, deʼ hokä yadodiai o Ahab ai tau manyawa, unangö wobaradoha ma Jouika hokä o Israeloka manga kokoano.

¹⁹ Mä ma Jou wöluku wohibinaha o Yehuda karana ünanga wojajioka o Daudika Ai gilaongo, aidifauku aha ka hirahi yodadi o koano.

²⁰ O Yehoram aipareta magoronaka, o Edom ima lawani o Yehudaika deʼ imahi goko manga pareta mahirete.

²¹Dokengoka ünanga iwi higilolitoka o Edom manga duduono, mä mahutuuku ünanga de aitentara manga duduono manga baluhu yokokureta yangohama manga haturu yahi gogilolitino, deʼ toönanga manga tentara ihi oara manga diri yolio manga tauika moi-moi.

²²Oraha gënanga o Edom yolukoka yahi gihenoli o Yehudaika. Oraha genangö o Libna makota ima lawani.

²³O jarita mahomoa yakorona o Yehoram, itulihi o Yehuda ma Kokoano ma Sejarah mabuku magoronaka.

²⁴Unanga wohonenge deʼ iwi lungunu o kokoano manga jereoka o Daud ai kotaoka. Aingohaka o Ahazia wodadi o koano witagali ünanga.

²⁵O Ahazia o Yehoram aingohaka wodadi o Yehuda manga koano maöraha ma Koano Yoram o Ahab aingohaka wä paretaka o Israeloka o taongo ngimoi de hinoto.

²⁶Oraha gënanga o Ahazia ai umuru o taongo monaoko deʼ hinoto, deʼ ünanga wopareta o Yerusalemoka o taongo moi madekana. Ngoi ayo ami romanga o ngo Atalya, ma Koano Ahab ngoi ora de ngoi hanongo o Omri o Israeloka manga koano.

²⁷Karana ai kawingi, o Ahazia naga manga dutu itigi de ma Koano Ahab ai tau manyawa. O Ahazia wobaradoha ma Jouika hokä ima tero yadodiai o Ahab ai tau manyawa.

²⁸Ma Koano Ahazia wonïki woparangi ima kinïki o Yoram o Israeloka manga koano iwi lawani o Hazael o Siria manga koano. Önanga ima teke parangi o Ramot mabereraka, o Gilead madaeraoka. O Yoram iwi l̄abo o parangi magoronaka gënanga,

²⁹daha ünanga wolio o Yizreel makotaika mangale iwi houru, deʼ o Ahazia wöiki wilega ünanga dokengoka.