Read Tobelo O KOKOANO MAHINOTOKA 9 Bible Online

O KOKOANO MAHINOTOKA 9 - Tobelo bible

O KOKOANO MAHINOTOKA 9

¹O öraha gënanga ma Nabi Elisa wï ahoko womatengo ani o nabi-nabi manga hidogoronaino widoto-dotoko deʼ wïtemo, ”Noma hidiai mangale nöiki o Ramotika o Gileadoka, deʼ nao o boto madol̄a o zaitun ma minya nënanga.

²No ma hiädonika ngona dokengoka, nilingiri o Yehu o Yosafat aingohaka o Nimsi ai danongo. Nihigaro ünanga woma tengo o kamari moika,

³deʼ nihituagi o minya nënanga ai haëke mal̄okuku, daha no temo, ’Ma Jou wotemo, Unanga woni goraka ngona nodadi o Israeloka manga koano.’ Iböto nadiai o hali gënanga, tai-taiti namal̄a o ngï gënanga.”

⁴Ma nabi o goduru gënanga womä jobo o Ramot mabereraika,

⁵daha wïmake o Yehu de o tentara manga kapita mahomoa ma gogiria ima katatoro dokengoka. Ma nabi wotemo, ”Tuanga, ngohi toao o abari mangale Tuanga.” O Yehu wohaluhu, ”Mangale o nagona?” ”Mangale Tuanga mahirete,” wabalahi ma nabi gënanga.

⁶ Ipaha önanga yahinoto yowohama o tau magoronaika, deʼ ma nabi o goduru gënanga wihituagi o zaitun maminya gënanga o Yehu ai haëke mal̄oku uku daha witemo, ”Ma Jou o Israeloka manga Jou Madutu wotëmo, ’Ngohi toni tede ngona nodadi o koano mangale Ahi umati o Israeloka.

⁷Ngona aha nabinaha ani tuanga o Ahab ai tau manyawa. De hoko gënanga Ngohi tomi hukumu o ngo Izebel matoma-tomaka Ahi nabi-nabi deʼ Ahi gogilaongo mahomoa.

⁸O Ahab ai tau manyawa yongodumu de aingohaka de ai danongo kiani yohonenge. O nyawa o nau-nauru magetongo yaoa yatotimono yaoa yogö gö aha Tabinaha.

⁹Ai tau manyawa aha Tahidiai hokä Tahidiai o Yerobeam ai tau manyawa deʼ o Baesa ai tau manyawa, o Israeloka manga kokoano.

¹⁰ O ngo Izebel aha imi lungunua. Ami mayeti aha o kaho ya ol̄omo o Yizreel madaeraoka.’ ” Wohi demo iböto mata-mata gënanga, ma nabi o goduru gënanga wohupu daha woara.

¹¹O Yehu wolio ai dodiawoika, daha önanga iwi leha, ”Naga o abari okia? O nyawa iwi togohanga gënanga womau okia dede ngona?” ”Ee, ngini nihi orikoka,” o Yehu wohaluhu.

¹²”Kowali, ngomi mihi orikua!” önanga yohaluhu. ”Ika nohingahu!” O Yehu wohaluhu, ”Unanga wohiädono ma Jou Ai behehongo ngohi wohi goraka ma Jou todadi o Israeloka manga koano.”

¹³De majapatioka o Yehu ai dodiawo yaiki toönanga manga juba de ihi hohe o ngute-nguteoka o Yehu ai himangoka. Daha önanga yawuwu o trompet de yopöaka, ”O Yehu wokoano!”

¹⁴Ipaha o Yehu wodiai o doomu madorou iwi lawani ma Koano Yoram öraha gënanga naga o Yizreeloka. O Yoram wöiki dokengika mangale wa make o paliara ai nabo-nabo wamö make-make o parangi magoronaka o Ramot mebereraka wilawani o Hazael o Siria manga koano. O Yehu wätemo ai dodiawoika o kokapita, ”Nako ngini nirimoi ngohi todadi o koano, nio goana hupaya uha naga ima tengo uha yohupu o Ramotino mangale ihi ngahu hagala o nyawaika o Yizreeloka.”

¹⁶Iböto gënanga ünanga wodöa ai kureta wohi poparangi daha woma jobo o Yizreelika. Öraha gënanga o Yoram wo togumuahi, deʼ o Ahazia o Yehuda manga koano naga dokengoka wilega ünanga.

¹⁷Maöraha o Yizreel makota macandi wogö goa-goana wimake o Yehu deʼ hagala o nyawa yoböa, ünanga wopöaka, ”Naga o duduono moi o nyawa yameta nenangino!” O Yoram wohaluhu, ”Nihuloko o tentaraoka womatengo wo kuda wöiki watailako boteka önanga gënanga nanga dodiawo ekola nanga lawani.”

¹⁸De wobarene o kuda, o tentaraoka gënanga wöiki wibuhukika o Yehu deʼ wotemo, ”Ma koano woigo wohi öriki boteka Tuanga noböa hokä ai dodiawo.” O Yehu wohaluhu, ”Genanga ani manaramua!” ”Ika nomahi dogo dede ngohi.” O candi wogoa-goana gënanga wimake o tentaraoka woma hiädono o dududuonika gënanga, ma’ woma idulokaua. Daha ünanga wohi ngahu o hali gënanga,

¹⁹daha iwihi dingoto womatengo o tentaraoka mahomoa. O tentaraoka nenangö wo leha hoko genangö o Yehuika, deʼ mamoi oli o Yehu wohaluhu, ”Genanga ani manaramua! Ika nomahi dogo dede ngohi!”

²⁰O candi wogö goa-goana wohi ngahuoli o huhuloko gënanga womahi adonoka o doomuika gënanga mawoma idulokaua. Daha ünanga wodogo, ”Maraioka o doomu gënanga manga tutuda o Yehu, hababu ünanga wobarenuku ai kureta wohi parangi hokä o nyawa yatotogohanga.”

²¹”Ni hidiai ahi kureta,” ma Koano Yoram wapareta. O kureta ihi diaioka, daha o Yoram de ma Koano Ahazia imä jobo iwi ädono o Yehu, moi-moi manga kureta magoronaka mahirete. Onanga imakamake de o Yehu to Nabot ai dumule madutu marioka.

²²”Boteka ngona noböa hokä o dodiawo?” o Yoram woleha o Yehuika. O Yehu wohaluhu, ”Kiaka yakunu, hokä o dodiawo, nako nenangoka kai woëohi yohou-houru, de kanagahi yahuba-huba o gomanga mamulaenge o ngo Izebel ngoni Ayo gënanga?”

²³”Nenanga wosetiaokaua, o Ahazia!” wopöaka o Yoram ikali waleboto ai kureta daha wohi oara ai diri.

²⁴O Yehu wodauru de woma kua-kuata ai toimi mal̄eha, de witoimi o Yoram ai poretiha itotara ai huoika. O Yoram woruba, de wohonenge ai kureta magoronaka.

²⁵Daha o Yehu wïtemo o Bidkarika o tentara manga baluhu wirö riwo-riwo, ”Boteka ngona kano hiningahi, maöraha ngone hobarene o kuda hinïki o Ahab, o Yoram ai ama? Oraha gënanga ma Jou wïtemo o Ahabika, ’Ngohi tohi öriki o nagona iwi toma o Nabot deʼ ai ngoha-ngohaka kanugono, de ngohi tojaji aha toni hukumu ngona o dumuleokaö nënanga.’ ” ”Hababu gënanga,” o Yehu wotemo wohi gila-gila wirö riwo-riwoika gënanga, ”Nohi kaweli o Yoram ai mayeti gënanga o Nabot ai dumuleika, hupaya idadi hukumanga ma Jou Madutu mangale ünanga.”

²⁷O Ahazia wamake okia idö dadadioka, daha ünanga wohi oara ai kureta wameta o Bet-Hagan makotaika. O Yehu wiginïki ünanga deʼ waböaka o nyawaika, ”Niwi toma unangö!” Önanga iwi toimi ünanga de iwi l̄abo o ngekomoka mameta o Gurika, itigika o Yibleam makota. Mä ünanga wohasili wohi oara ai diri hiädono o Megidoika, deʼ genangoka ünanga wohonenge.

²⁸Ai pegawe-pegawe ya l̄ë ai mayeti deʼ yao de o kureta ihi gilio o Yerusalemika, daha yalungunu o kokoano manga jereoka o Daud ai kotaka.

²⁹O Ahazia wodadi o Yehuda manga koano maöraha ma Koano Yoram o Ahab aingohaka waparetaka o Israeloka o taongo ngimoi de moi.

³⁰O Yehu woma hiädono o Yizreelika. O ngo Izebel moihene iböto mangale okia idö dadadi, munanga mohi diai ami tadauru deʼ moma tatabu daha mohi hahere daukuku o kadato majangelaino.

³¹Maöraha o Yehu wowohama wanonu o ngorana ma amo-amoko, o ngo Izebel mopöaka, ”Hei Zimri, notoma-toma! Ani mau okia ngona nenangino?”

³²O Yehu womamataga wameta o jangela il̄e, deʼ wato, ”O nagona ihihi böa ngohino?” Yoihene gënanga, o kadato ma pegawe yahinoto ekola yaruange ima lega daukuku.

³³O Yehu watemo onangika, ”Nimi hikaweli munanga nenanguku!” Daha önanga imi hikaweli o ngo Izebel daukuku daha munanga imi dululu o kureta hiädono ami awunu yödohoropu o bebeno o mehelika de o kureta makuda-kudaika gënanga.

³⁴Daha o Yehu wowohama o kadato magoronaika deʼ wol̄omo. Ipaha ünanga wotemo, ”O ngoheka gënanga imi lolaioka. Ngaro hoko gënanga, nia lungunu dika ami mayeti hababu munanga ma koano ngoi ora.”

³⁵Mä maöraha hagala o nyawa yöiki ya l̄ë ami mayeti mangale yalungunu, önanga duga-duga yamakeika ami haëke ma kabelanga, de ami giama ikali ami l̄ou makobo-kobongo.

³⁶ Ihi ngahu iböto o hali gënanga o Yehuika, ünanga wotemo, ”Nenanga ma Jou wohi dodemoka, maöraha ünanga wotemo hoko nënanga itilakuru o Elia Ai gilaongo: ’O ngo Izebel ami mayeti aha o kaho yaol̄omo o Yizreel madaeraoka,

³⁷deʼ mahou-hou ami mayeti gënanga aha imahi kokabarihika hokä o aiwani ma iyoko hiädono o nyawa moiuaö yakunu yanako tonagona manga mayeti gënanga.’ ”