Read Tobelo O TAWARIKH MADODIHIRAKA 10 Bible Online

O TAWARIKH MADODIHIRAKA 10 - Tobelo bible

O TAWARIKH MADODIHIRAKA 10

¹O Filistin manyawa imateke parangi de o Israel manyawa. Onanga imateke parangi o Gilboa ma Lokuoka. O Israeloka manyawa manga ngöe yohonenge genangoka, de mahou yodogoika ma Koano Saul de aingoha-ngohaka o nauru ihioara mangadiri.

²Mä önanga yanïki mangale o Filistin manyawa de yaruange o Saul ai ngoha-ngohaka manga hidogoronaka yätoma, enagënanga o Yonatan, o Abinadab deʼ o Malkisua.

³O parangi duru kohagiria o Saul iwikilolitino, de ünanga mahirete iwikorona o haturu manga toimi hiädono iwil̄abo.

⁴Daha o Saul witemo o goduruika waöao-ao aidae, ”Narahuku anioworo de nohitopoko ngohi hupaya o Filistinoka manyawa iwinako-nakoua ma Jou gënanga uha imahigogule ngohi.” Mä o goduru gënanga woluku witopoko o Saul karana ünanga duru wohawana. Hababu gënanga o Saul wal̄ë aioworo mahirete de womaruba aidiri aioworo mal̄okuku gënanga.

⁵Maöraha o goduru gënanga wimake o Saul wohonengoka, unangö womaruba aidiri aioworo mal̄okuku, daha wohonenge.

⁶Daha o Saul wohonenge imakinïki aingohaka o nauru yaruange, dede gënanga ihibobahaö aidifauku o kokoano yopareta.

⁷Maöraha o Israeloka manyawa mata-mata yogogogere o Yizreel mawaioka yoihene o Israeloka manga tentara ihioaroka manga diri, deʼ o Saul ikali aingoha-ngohaka o nauru yohonengoka, önanga yoara yamal̄a toönanga hagala manga kota. Daha o Filistin manyawa yogogere o kota-o kota gënanga.

⁸Iyarehino maöraha o Filistin manyawa yoboa mangale yaora o mayeti-o mayeti, önanga yamake o Saul de aingohaka o nauru yaruange yohonengoka o Gilboa mal̄okuoka.

⁹Onanga yaiki o Saul aibaju wohipoparangi, de yatobiki aihaeke, daha yoiki yao. Ipaha önanga yahidingoto manga huhuloko o Filistin manga berera ingodumu mangale ihiadono o abari maoa gënanga toönanga manga hoana de manga gikirika.

¹⁰O Saul aibaju wohipoparangi gënanga yagogono toönanga moi manga gomanga matau magoronaka, de ai haeke yanuneuku o Dagon matau magoronaka, toönanga manga gikiri.

¹¹Maöraha o Yabes manyawa o Gileadoka yoihene okia yadodiaioka o Filistinoka o Filistin manyawa o Saulika,

¹²hagala o nyawa duru yobobarani toönanga manga hidogoronaka yoiki yal̄ë o Saul de ai ngoha-ngohaka manga mayeti, daha yao o Yabesika. Onanga iwilungunu ünanga moi o gota ma amo-amoko matimiuku, ipaha önanga yopuaha o wange tumidi ma dekana.

¹³ O Saul wohonenge karana ünanga wosetiaua ma Jouika, de wohi ngoanua Ai tita-Ai tita. Unanga wogahokua o hidumutu ma Jouino, o nyawa yohone-honengino manga womahino. Karana gënanga ma Jou wihukumu ünanga de wohilapahi aipareta makuruhi o Daudika o Isai aingohaka.