Read Tobelo O TAWARIKH MADODIHIRAKA 11 Bible Online

O TAWARIKH MADODIHIRAKA 11 - Tobelo bible

O TAWARIKH MADODIHIRAKA 11

¹Mata-mata o Israel manyawa manga tutuda yaika o Daudika o Hebronika de yato, ”Ngomi nënanga Jou Koano anidutu.

²Mamulaenge mahira, maöraha o Saul kawomi paretahi ngomi, Jou Koano natuda o Israeloka manga tentara ihigeto-getongo önanga yoiki yoparangi. Ikali ma Jou Madutu Jou Koano wojajioka Jou Koano aha nätuda Ai umati de nodadi toönanga manga koano.”

³Daha o Daud wodiai o jaji de o Israeloka manga tutuda-tutuda gënanga. Daha önanga iwitede ünanga wodadi o Israeloka manga koano hokä ma Jou wojajioka itilakuru o Samuel.

⁴ Oraha moiuku ma Koano Daud deʼ o Israeloka manga tentara yongodumu yoiki yaparangi o Yerusalem makota. Oraha gënanga o kota gënanga maromanga o Yebus, deʼ yogogere o Yebus manyawa, o kota manyawa madutu gënanga.

⁵Hagala o Yebus manyawa yotemoka o Daudika, ünanga wakunua wongohama toönanga manga kota gënanga. Mä o Daud wohasili waora toönanga manga bebeno o mehele maromanga o Sion. Oraha gënanga o Daud wohingahuoka ainyawaika o nyawa madodihiraka wätoma o Yebus manyawa imatengoani aha yodadi o kapita. Daha karana o Yoab madodihiraka waparangi o Yebus manyawa, iwigoraka wodadi o kapita. (O Yoab ngoiayo amiromanga o ngo Seruya.) O Sion mabebeno o mehele yaora ibötino, o Daud wogogere genangoka. Genanga hababu mulaenge oraha gënanga o bebeno o mehele gënanga yahetongo ”O Daud ai Kota”.

⁸O Daud wohigokookali o kota gënanga mulaenge mangïoka yodoporono de o tonaka o doporono o wange mahiwaroko idaduoka; ipaha o tau ma ago-agomo bangunan gënanga wohi gila-gila o Yoab hiädono iböto.

⁹O Daud iholoi itedekana iholoi wokuata, karana ma Jou wo Kokuaha wiriwo ünanga.

¹⁰Nenanga manga roma-romanga o Daud aitentara manga balu-baluhu yanönako-nako kiakahonanga. Imakinïki o Israeloka makawaha yongodumu, ihidailakoka hupaya o Daud wodadi o koano hokä ma Jou wojöjäjajioka. De önanga gila-gila yöriwo aipareta.

¹¹O tentara manga baluhu madodihiraka enagënanga o Yasobam o Hakhmoni manyawa, ünanga o ”O duduono Hange yo bobai uni Triwira” matutuda. Ma moi iböto moi o parangi magoronaka ünanga walawani o nyawa ya 300 de wätoma önanga mata-mata de aikuama.

¹²O nyawa mahinotoka o ”O duduono Hange yo bobai uni Triwira” gënanga magoronaka enagënanga o Eleazar o Dodo aingohaka o Ahohi aiahalino.

¹³O parangi magoronaka o Pas-Damimoka ünanga woparangi o Daudino woboa walawani o Filistin manyawa. Maöraha o Israeloka manga tentara mulaenge ihioara manga diri, ünanga de ainyawa imatumunguku o gandum madumuleoka moi mahidödogoronaka de imateke parangi yalawani hagala o Filistin manyawa gënanga. Daha ma Jou wihidoaka o utumu maamo-amoko unangika.

¹⁵O wange moiuku o nyawa yaruange o Daud aitentara manga baluhu yamoruangeino yobö balu-baluhu, yoiki imaka make o Daud o ngï moioka de mabebeno o meheloka ol̄oku o helewo moioka o Adulam maaruku madatekoka. Oraha gënanga o Filistin manyawa ima tau o Refaim ma Waioka, de o duduono moi onangino yogogere o Betlehem.

¹⁷O Daud duru woigo aiberera madutu gënanga de wotemo, ”Uwe, hokanako ngohi ihihidöaka tokere o akere o humuino o Betlehem mangorana maamo-amoko madatekoka.”

¹⁸Yoihene gënanga, o tentara manga baluhu yaruange gënanga yongohama o Filistin manyawa manga tau-tau daha yauiti o akere o humuino gënanga, ipaha yao o Daudika. Mä o Daud woluku waokere, koaholi wakopoa hokä o huhuba ma Jouika.

¹⁹Unanga wotemo, ”De ma Jou Madutu, ngohi takunua taokere o akere nënanga! Nako ngohi taokere, matero-tero ngohi taokere hagala o nyawa manga awunu ihitötai-taioka toönanga manga nyawa!” Hö o Daud hakali-kali woluku waokere o akere gënanga. Genanga toönanga manga oa-oa yaruange yopoparangi yonönau-nauru gënanga.

²⁰O tentara manga baluhu yamoruange yanö nako-nako gënanga yahiromangoli ”O yamoruange manga doomu matutuda yobobarani Tridasawira”. Önanga wätuda o Abisai o Yoab ai dodoto. Mamoi iböto ünanga wätoma ya 300 de aikuama, de karana gënanga ünanga idadi kaiwiheto-hetongo. Mä ünanga ima daenua ai nauru o Tentera manga baluhu yaruange gënanga.

²²Womatengo o tentara manga baluhu mahomoa iwinö nako-nako enagënanga o Benaya o Yoyada aingohaka, o Kabzeel manyawa. Unanga duru wobarani. O Moabino yahinoto duru yonönau-nauru wätomaka. Mamoi iböto o wange moiuku womahidomoata ünanga wowohama o aruku moi magoronaika de wätoma o singa o dutu moi genangoka.

²³Unanga mamoiö iböto wïtoma o Mesir manyawa womatengo airöehe mapako; aigurutil̄e o metere hinoto i holoi. O nyawa gënanga womahi dae o kuama duru kohäpako, mä o Benaya wirihimanga duga-duga de o boboha o diki-diki. O kuama o Mesir manyawa naga aigiamoka gënanga waora daha mangale wihitoma o nyawa gënanga.

²⁴Genanga aioa-oa o Benaya, womatengo yamoruange manga baluhino.

²⁵O doomu gënanga magoronaka, o Benaya duru iwihoromati, mä ünanga imadaenua aibarani o Baluhu yaruange. O Daud wigoraka ünanga wodadi aidiri wogoa-goana manga baluhu.

²⁶Inoli nënanga ganga o tentara manga balu-baluhu mahomoa yanönako-nako: O Asael o Yoab aidodoto O Elhanan o Dodo aingohaka o Betlehem manyawa O Samot o Harod manyawa O Heles o Peloni manyawa O Ira o Ikes aingohaka o Tekoa manyawa O Abiezer o Anatot manyawa O Sibkhai o Husa manyawa O Ilai o Ahohi manyawa O Maharai o Netofa manyawa O Heled o Baana aingohaka o Netofa manyawa O Itai o Ribai aingohaka o Gibea manyawa o Benyamin aihoana madaeraoka, O Benaya o Piraton manyawa O Hurai o Gaas mawai-wai manyawa O Abiel o Araba manyawa O Azmawet o Bahurim manyawa O Elyahba o Saalbon manyawa O Hasyem o Gizon manyawa O Yonatan o Sege aingohaka o Harari manyawa O Ahiam o Sakhar aingohaka o Harari manyawa O Elifal o Ur aingohaka O Hefer o Mekherati manyawa O Ahia o Peloni manyawa O Hezrai o Karmel manyawa O Naarai o Ezbai aingohaka O Yoel o Natan (...)