Read Tobelo O TAWARIKH MADODIHIRAKA 13 Bible Online

O TAWARIKH MADODIHIRAKA 13 - Tobelo bible

O TAWARIKH MADODIHIRAKA 13

¹Ma Koano Daud imakatatoro de mata-mata aitentara manga baluhu yatötuda-tuda o doomu-o doomu ya 1.000 de o doomu-o doomu ya 100.

²Daha ünanga watemo o nyawa mata-mataika gënanga, ”Nako roriadodoto nirimoi de ma Jou Ai hininga yadaene, tongone nanga Jou Madutu, kayaoa ngone hahidingoto nanga huhuloko o imam-imamika deʼ o Lewi manyawa toönanga manga kapo-kapongoka, ikali tongone nanga hoana mahomoa yongodumu mangale haahoko önanga yoboa imatoomu dede ngone nenangokadau.

³Ipaha ngone hoiki hal̄ë ma Jou Madutu Ai Jaji ma Peti, imal̄aika ipaliaraokaua madekanino ma Koano Saul aipareta.”

⁴Mata-mata o Israeloka manyawa imatotoomu gënanga yosanangi de o gogahoko gënanga de ihigoungu.

⁵ Daha o Daud watoomu o Israeloka makawaha o berera ingodumu, mahiribatingö o Mesir o koreharail̄e hiädono o Hamat ma Ngekomika o koremieuku, mangale yal̄ë o Jaji ma Peti gënanga o Kiryat-Yearim de yaino de yao o Yerusalemika.

⁶ Daha o Daud woiki imakinïki dede önanga o Baala makotaika, enagënanga o Kiryat-Yearim, o Yehuda aihöana madaeraoka mangale yal̄ë ma Jou Madutu Ai Jaji ma Peti. O Peti gënanga ihi romanga ”Ma Jou womakadato o dodadi o horogaino de magögahuhuoka mal̄okuoka.”

⁷Imahiadonika o Baalaoka, önanga yal̄ë o Jaji ma Peti gënanga o Abinadab aitauoka, daha ihidoa moi o goroba mahungiil̄e. O Uza deʼ o Ahyo yatomoteke o goroba gënanga,

⁸o Daud deʼ o Israeloka manyawa yongodumu magogiria yoselo-selo de yonyä nyanyi de manga morene itötotomo, mangale i wihoromati ma Jou Madutu ihinïki o kecapi, o rebana, o simbal, deʼ o trompet.

⁹Maöraha önanga imahiädono to Kidon ai gandum wobido-bidoro mangïoka, o hapi yatötau-tauru o goroba gënanga ipeleke, daha o Uza wodoaka de wasö o Jaji ma Peti gënanga la uha itifa.

¹⁰Oraha gënanga dika ma Jou wingamo o Uzaika karana aimanarama gënanga marupa o hikauku ma Jouika. Daha o Uza Witoma genangoka. Mulaenge o öraha gënanga o ngï gënanga yahetongo ”O Peres-Uza”. O Daud wongamo karana ma Jou wihibinaha o Uza.

¹²Mä o Daudö wimodongo ma Jou Madutuika de wotemo, ”Oraha nënanga sarakia o Jaji ma Peti gënanga yakunu tao?”

¹³Hababu gënanga o Daud idadiua wao o Peti gënanga o Yerusalemika, mä wagogono o Obed-Edom o Gat manyawa aitauoka.

¹⁴ O Peti gënanga igogere genangoka o mede hange madekana de ma Jou wahibarakati o Obed-Edom ai tau manyawa ikali mata-mata wapoparetaino.