Read Tobelo O TAWARIKH MADODIHIRAKA 14 Bible Online

O TAWARIKH MADODIHIRAKA 14 - Tobelo bible

O TAWARIKH MADODIHIRAKA 14

¹Ma Koano Hiram o Tirus mabereraino wahidingoto aihuhuloko-aihuhuloko o Daudika, o Libanon maliwewuru magotaö de yobas-bas ikali yomehe-mehele mangale ihigoko o kadato.

²Karana gënanga o Daud wamao wongaku ma Jou wihikuatoka ünanga hokä o Israeloka manga koano de wohikuata aipareta mangale ma Jou Ai umati manga paralu.

³O Yerusalemoka o Daud woma l̄ëoli o hekata yamuruono naga, de womamakeoli o ngoha-ngohaka.

⁴Aingohaka o nau-nauru imakil̄au o Yerusalemoka enagënanga: o Syamua, o Sobab, o Natan, o Salomo,

⁵o Yibhar, o Elisua, o Elpelet,

⁶o Nogah, o Nefeg, o Yafia,

⁷o Elisama, o Beelyada deʼ o Elifelet.

⁸Maöraha o Filistin manyawa yoihene o Israeloka yongodumu iwigorakoka o Daud wodadi o koano, önanga yoboa yomau iwitagoko ünanga. Karana gënanga o Daud wohupu mangale imateke parangi dede önanga.

⁹Jai-jaino gënanga o Filistin manyawa yoboaka o Refaim ma Waioka de yaora o wai gënanga.

¹⁰Woihene gënanga o Daud woleha ma Jou Madutuika, ”Jou, kokiani ngohi taparangi o Filistinoka manyawa gënanga? Boteka Jou, aha nohihi döaka o utumu ngohino?” ”Ia, naparangi!” ma Jou wohaluhu. ”Ngohi aha tonihi döaka o utumu ngonaika!”

¹¹Daha o Daud de aiduduono yaparangi o Filistin manyawa gënanga o Baal-Perasimoka de yahohihangoka önanga. O Daud wotemo, ”Ma Jou Madutu wohipakeoka ngohi mangale tongohama ahi haturu manga bebeno o mehele hokä o nguihi yängali hagala moi-moi o öraha moi magoronaka.” Genanga hababu o ngï gënanga yahetongo o Baal-Perasim.

¹²Maöraha o Filistinoka manga duduono yopiringana, önanga imahidaënua yao toönanga manga gomanga madulada-dulada. O Daud wahipareta hupaya o dulada-o dulada gënanga yatuhuku.

¹³Itedekanua ipahaika o Filistin manyawa yoboa de yaoraoli o Refaim ma Wai.

¹⁴Mamoioli o Daud wogahoko o hidumutu ma Jou Madutuino, de ma Jou o Madutu wibaluhu, ”Uha naparangi önanga nenangoka denaino, mä nomadagi nagiloliti denaparangi mahonongaka denaino, o murbei mautu-mautu madatekoka.

¹⁵Nako ngona noihene o ilingi madibingi hokä o nyawa yobarisi o gota-o gota madekarika gënanga, notagi anihimangika, hababu Ngohi aha tomadagi anihimangoka mangale tahohihanga o Filistinoka manga tentara.”

¹⁶O Daud wadiai okia ma Jou Madutu wihipoparetaka unangika. Unanga de aiduduono yahidodohuku o Filistinoka manga tentara mulaenge o Gibeon de yaino hiädono o Gezerika.

¹⁷Daha o Daud airomanga kiaikahonanga kaya heto-hetongo, de ma Jou wadiai hagala o hoana iwi modongo o Daudika.