Read Tobelo O TAWARIKH MADODIHIRAKA 15 Bible Online

O TAWARIKH MADODIHIRAKA 15 - Tobelo bible

O TAWARIKH MADODIHIRAKA 15

¹O Daud wohigoko o tau-o tau mangale aidiri o Daud ai Kotaka, de wohidiai o ngï mangale ma Jou Madutu Ai Jaji ma Peti daha wohigoko o tau-tau mangale o Peti gënanga.

² O Daud wato, ”Duga-duga o Lewi manyawa yakunu yagoraka ma Jou Ai Jaji ma Peti, hababu önanga ma Jou wairikoka mangale yamoku o Peti gënanga de imahigilaongo Unangika mangale kahiado-adonika.”

³Daha o Daud wäahoko o Israel manyawa mata-mata yoboa o Yerusalemika mangale yatururu ma Jou Ai Jaji ma Peti mangïika ihidödodiaioka.

⁴Daha o Daud wähuloko o Harun aidifauku de o Lewi manyawa imatoomu.

⁵Daha o Kehat aiahalino, o Lewi aihöana, o Uriel wohihira wätuda aiahali yaratuhu moi de yamonaoko.

⁶O Merari aihoanino o Asaya wohihira wätuda yaratuhu hinoto de yamonaoko.

⁷O Gerson aiahalino o Yoel wohihira wätuda yaratuhu moi de yamoruange.

⁸O Elsafan aiahalino o Semaya wohihira watuda ya 200.

⁹O Hebron aiahalino o Eliel wohihira wätuda ya 80.

¹⁰O Uziel aiahalino o Aminadab wohihira wätuda ya 112.

¹¹Daha o Daud wiahoko ma Imam Zadok de ma Imam Abyatar ikali o Lewi manyawa yabutanga gënanga, enagënanga: o Uriel, o Asaya, o Yoel, o Semaya, o Eliel deʼ o Aminadab.

¹²O Daud wätemo onangika, ”Ngini ganga o ahali matutuda o Lewi aihöana magoronaka. Karana gënanga, kokiani ngini de hagala o Lewi manyawa mahomoa niatebini niadiri hupaya yakunu niatururu ma Jou Ai Jaji ma Peti, o Israeloka manga Jou Madutu, mangïika tasösadia ukuoka.

¹³Maöraha o Peti gënanga mangale itururu madodihiraka, ngini koinïiwa genangoka mangale niao. Karana gënanga ma Jou, tongone nanga Jou Madutu, wonahukumu ngone hababu ngone hihuba Unanga imamotekua de Ai mau.”

¹⁴Hö, o imam-imam de o Lewi manyawa ihitebini manga diri hupaya yakunu yatururu ma Jou Ai Jaji ma Peti, o Israeloka manga Jou Madutu.

¹⁵ De öraha gënanga o Peti gënanga yatururu, önanga imägoraka toönanga manga belekail̄e dema gota mamomoku, ima moteke o datoro ma Jou wohidödöa-döakoka o Musaika.

¹⁶O Daudö wähuloko o tutuda-o tutuda o Lewi manyawa gënanga hupaya yahimanarama yamuruono naga toönanga manga hoanino mangale yonyanyi de ihigogule o morene manyanyi o kecapiika deʼ o simbal.

¹⁷O tau manyawa-o tau manyawa yonyönyanyanyi manga hidogoronaino, önanga yäiriki o nyawa hokä hokonënanga mangale ihigogule o simbal o tabaga: o Heman o Yoel aingohaka kamamoi airoriadodoto manga romanga o Asaf o Berekhya aingohaka, deʼ o Etan o Kusaya aingohaka o Merari aiahalino. Mangale yanïki önanga ikali ihigogogule o kecapi mailingi maitetekil̄e yairiki o Lewi manyawa hokä hoko nënanga: o Zakaria, o Yaaziel, o Semiramot, o Yehiel, o Uni, o Eliab, o Maaseya, deʼ o Benaya. Mangale ihigogogule o kecapi malugo marururuhu yairiki o Lewi manyawa hokä hokonënanga: o Matica, o Elifele, o Mikneya, o Azazya de yahinoto ma Jou Ai Tau yogögoa-goana, enagënanga o Obed-Edom deʼ o Yeiel.

²²O Kenanya iwiiriki mangale wahibaluhu yomomusik o Lewi aihoanino gënanga, hababu ünanga duru wosawaro o musik.

²³O Berekhya deʼ o Elkana kamamoi o Obed-Edom deʼ o Yehia yairiki yodadi ma Jou Ai Jaji ma Peti magogoana. O imam-imam yoturuino nënanga: o Sebanya, o Yosafat, o Netaneel, o Amasai, o Zakharia, o Benaya deʼ o Eliezer yairiki mangale yawöwuwuwu o trompet o Peti gënanga mahimangoka.

²⁵Daha ma Koano Daud woiki imakinïki o Israeloka manga tutuda-tutuda de o tentara manga balu-baluhu o Obed-Edom aitauika mangale yal̄ë o Jaji ma Peti gënanga de o rame maamo-amoko.

²⁶O hapi manauru tumidi de o duba tumidi ihihuba ma Jou Madutuika karana Unanga wariwoka o Lewi manyawa yagoraka o Jaji ma Peti gënanga.

²⁷O öraha gënanga o Daud womahi noauku o juba o ngoere o lenan maaluhino, hokogenangoli ihigögogogule o musik deʼ o Kenanya toönanga manga tutuda ikali hagala o Lewi manyawa yagögora-goraka o Jaji ma Peti gënanga. O Daudö womahinoauku o Efod mabaju.

²⁸O Israeloka maumati yongodumu yoiki yanïki o Jaji ma Peti hiädono o Yerusalemika de o morene maulili de mahagaga, mailingi o trompet, o nafiri, o simbal deʼ o kecapi.

²⁹Maöraha o Peti gënanga magogiria yao ihingohama o kota magoronaika, o ngo Mikhal o Saul ngoi ora momahidonga o jangelaino de mimake ma Koano Daud woselo-selo ikali womore-morene. Daha o ngo Mikhal mamao miemono mimake o Daud.