Read Tobelo O TAWARIKH MADODIHIRAKA 16 Bible Online

O TAWARIKH MADODIHIRAKA 16 - Tobelo bible

O TAWARIKH MADODIHIRAKA 16

¹O Jaji ma Peti gënanga yakelenga o dodoomu matau magoronaka o Daud wasosadiaka mangale o Peti gënanga. Daha önanga ihihuba ma Jou Madutuika o huhuba itötuhu-tuhuku de o dame mahuhuba.

²O Daud wohihuba o huhuba-o huhuba ibötoka ipahaino gënanga, ünanga wahibarakati o kawaha de ma Jou Ai romanga,

³daha wahikodoku o inomo onangika mata-mata. O nyawa moi-moi naga genangoka yaoa o nau-nauru yaoa o ngongoheka yamake o hiode maakeme i l̄ofo-l̄ofo o luiti moi, o roti deʼ kukisi o kismis.

⁴O Daud wägoraka o Lewi manyawa yamuruono naga mangale yatuda o puji ma Jouika maupacara, o Israeloka manga Jou Madutu, o Jaji ma Peti mahimangoka gënanga, de o nyanyi de o higiriri.

⁵O Asaf iwi iriki hokä o tutuda duru maoa-oa de ai wakili o Zakaria, o Yeriel, o Semiramot, o Yehiel, o Matica, o Eliab, o Benaya, o Obed-Edom deʼ o Yeiel yahimanarama ihigogule o simbal,

⁶deʼ o imam yahinoto, enagënanga o Benaya deʼ o Yahaziel, yahimanarama de madodagi mangale yawuwu o trompet o Jaji ma Peti mahimangoka gënanga.

⁷Genanga duru madodihiraka o Daud wahimanarama o Asaf de aidodiawo mangale ihinyanyi o higiriri ma Jouika.

⁸Sukur ma Jouika, nihiabari Ai mulia, nihiade-ade Ai manarama, o hoana de o berera manga hidogoronaka.

⁹Nihinyanyi o higiriri ma Jouika, nihingahu-ngahu hagala Ai manarama ihö hera-heranga.

¹⁰Unanga o Jou Woma Tengo-tengo; homorene, hababu ngone to Unanga madutu; mata-mata iwihöhuba-huba Unanga kiani yomorene.

¹¹Nigahoko o kuata Unangino, niwihuba Unanga hokogenangika.

¹²Hei o Yakub aidifauku, ma Jou Madutu Ai gilaongo! Hei o Israeloka manga difauku, Ai umati womä ngiri-ngirikoka! Niohininga mata-mata ihö hera-heranga wadodiaioka, uha niawohanga hagala Ai putuhu-ai putuhu.

¹⁴Ma Jou ganga tongone nanga Jou Madutu, Ai putuhu idadi o dunia ingodumu.

¹⁵Unanga hoko genangika aha wohininga Ai jaji, Ai jaji idadi kahiado-adonika.

¹⁶ O jaji gënanga Wadiai de o Abraham, deʼ ipaha de o Ishak,

¹⁷ daha wohikuata de o Yakub idadi o jaji ikokakali mangale o Israeloka maumati.

¹⁸Wotemo, ”O Kanaan matonaka aha Tinihidoäka nginika idadi niapuhaka madutu.”

¹⁹Mahira ma Jou Ai umati yowango dokengoka hokä o nyawa maporetino manga gegetongo önanga kamanga huhutulu dika.

²⁰Onanga yongika-ngino o hoana de o berera moioka, o hoana de o berera moika, o berera moiino imatururu o berera mahomoaika.

²¹ Mä ma Jou wamal̄aikaua o nagonaö dika yatuku önanga; mangale önanga, o kokoano wahidöaka o hohininga,

²²”Uha niaruaë hagala Ahi ngongiriki manyawa, uha niadiai o dorou Ahi nabi-nabiika.”

²³Ninyanyi ma Jouika, hei o dunia ingodumu, o wange ihigetongo nihingahu-ngahu o morene maabari Unanga wonahihalamatoka ngone.

²⁴Nihi ade-ade Ai mulia o hoana de o bereraika, de Ai manarama-ai manarama ikokuaha o umati o nyawaika.

²⁵Hababu ma Jou wolamoko de duruhe hihigö gogiriri; Unanga kiani himodongo iholoi de hagala o gikiri.

²⁶O hoana mahomoa manga giki-gikiri duga-duga o gomanga madulada mä ma Jou ganga o gitaowa iamo-amoko madodadi.

²⁷Unanga iwitamunuku o kuaha de o mulia, Ai tau iomanga o kuaha de o morene.

²⁸Niwihigiriri ma Jou, hei o umati o nyawa! Nihigiriri Ai mulia de Ai kuata.

²⁹Nihigiriri Ai romanga imomulia de niao o huhuba Ai tau magoronaika. Niwihuba ma Jou de nimahinoa o puji mapakeanga!

³⁰Nihahara Ai himangoka, hei o dunia ingodumu! O dunia ikuata koigiwiua.

³¹Hei dihanga de o dunia, nimorene! Nihingahu o hoana de o bereraika ma Jou genanga o Koano!

³²Nokorongo hei ngoto de madol̄a mata-mata! Nomorene hei tonaka malua-luasi de hagala madadatomo!

³³O gota-gota o honganoka aha imaulili de ihagaga hababu ma Jou woboaka wopareta o duniaka.

³⁴ Syukur ma Jouika, hababu Unanga yaoa; Ai dora ikakali kahiado-adonika.

³⁵Notemo, ”Ya Jou Madutu, nomihi hohalamati ngomi, nomihihalamati ngomi o hoana de o berera manga kuahaino deʼ nomi toomu okali ngomi hupaya ngomi miyakunu misukur deʼ mihigiriri Ani romanga itötebi-tebini!”

³⁶Niwihigiriri ma Jou, o Israeloka manga Jou Madutu, oraha nenanga de kahi ado-adonika! Ipaha o Israeloka maumati yongodumu yotemo, ”Amin,” daha önanga iwihigiriri ma Jou.

³⁷Ipaha ma Koano Daud wahimanarama o Asaf de hagala o Lewi manyawa mahomoa mangale kahirahi yögoana o hali-o hali imadohanga de o puji mangïoka kiaka ma Jou Ai Jaji ma Peti yagogogogono. O wange ihi getongo önanga kiani yomanarama genangoka,

³⁸o Obed-Edom o Yedutun aingohaka wariwo, ikali ya 68 ma homoa o ahali moi dede ünanga. O Obed-Edom deʼ o Hosa ganga o ngorana-o ngorana maago-agomo magogoana.

³⁹Mä o Zadok deʼ o imam-imam mahomoa yahimanarama mangale kahirahi yogoana o puji-o puji mangïoka o Gibeonoka.

⁴⁰O ngorumino de o bimaoa magetongo önanga kiani ihihuba o huhuba itö tuhu-tuhuku o huba mangï mal̄okuoka imamoteke de o tita-o tita ma Jou wohidö doa-doaka o Israel manyawaika.

⁴¹Ma imam Zadok deʼ o imam-imam gënanga yariwo o Heman deʼ o Yedutum ikali hagala o nyawa mahomoa yahitötinga-tingakoka yairiki mangale ihinyanyi o higiriri ma Jouika karana Ai dora ikokakali de kahi ado-adonika.

⁴²O Heman deʼ o Yedutunö yomanarama mangale o trompet, o simbal deʼ o musik mapakakaha mahomoa ihigogule mangale ihinïki o higiriri manyanyi-manyanyi. O Yedutun aiahaluku manyawa yahimanarama mangale yogoana o ngorana-o ngorana maago-agomo.

⁴³ Ipaha o nyawa mata-mata yolio manga tauika moi-moi. Hoko genangoli o Daud wolio mangale walega aitau manyawa.