Read Tobelo O TAWARIKH MADODIHIRAKA 17 Bible Online

O TAWARIKH MADODIHIRAKA 17 - Tobelo bible

O TAWARIKH MADODIHIRAKA 17

¹Ma Koano Daud wogogere worïdoka aikadatoka, o wange moiuku ünanga wiahoko ma Nabi Natan de witemo, ”Nolega, ngohi nënanga togogere o kadatoka yadodiai o Libanonino maliwewuru magota, enahioko ma Jou Ai Jaji ma Peti duga-duga o tau-tau magoronaka!”

²O Natan wohaluhu, ”Nadiai hagala ani mau Jou Koano hababu ma Jou Madutu woniwiro Jou Koano.”

³Mä o hutu gënanga ma Jou Madutu witemo o Natanika,

⁴”Noiki de nohi ädono Ahi gilaongika o Daud Ahi behehongo nënanga, ’Kongonaua aha nohigoko o tau mangale Ngohi.

⁵Mamulaenge o Israeloka manyawa Tahibebasi o Mesirino hiädono o öraha nënanga, komaiwahi Ngohi togogere moi tau magoronaka. Hoko genangika Ngohi tongika-ngino de Togogere moi tau-tauoka.

⁶Madekanino Tongika-ngino mimakinïki o Israeloka manyawa komaiwahi Ngohi täleha o tutuda-tutuda Taö iri-irikoka, okia mahababu önanga ihigokoua moi o tau o Libanonino ma liwewuru magota mangale Ngohi.’

⁷Hababu gënanga, Natan, nihingahu Ahi gilaongika o Daud Ngohi, o Jou o Jou to Kokuaha, titemo unangika, ’Ngona Toni l̄ëoka ani manaramino o duba nogögoa-goana o tonaka malua-luasoka, de Tihidadi o koano mangale Ahi umati o Israeloka.

⁸Ngohi toniriwoka ngona okiaikaö ngona noiki, de hagala anihaturu Tabinaha maöraha ngona nimateke parangi. Ngona aha Tonidiai kaini heto-hetongo hokä o tutuda-o tutuda duru yolöago-agomo o duniaka.

⁹Mangale Ahi umati o Israeloka, Tasadiaka o ngï mangale idadi toönanga manga tonaka madutu hupaya önanga yakunu yowango yorïdi koiwaoli maruae. Maöraha mahira önanga yadono o tonakino nënanga, de toönanga koiwahi manga koano, önanga yaparangi hagala o nyawa yoöigo-igo yapakisa. Ma o hali gënanga aha idadi okauaoli. Ngohi tojaji aha nahohihanga mata-mata anihaturu, de Ngohi aha tonihidöaka ngonaika o ngohaka de o danongo.

¹¹Aha, nako yadono aniajali de ngona inilungunu aniete de anitohora manga jereoka, womatengo aningohaka o naurino aha Tigoraka wodadi o koano. Unanga aha wohigoko o tau mangale Ngohi. Ai pareta aha Takuata, de mangale kahiado-adonika womatengo aidifaukuino aha wopareta hokä o koano.

¹³ Ngohi aha todadi aiama de ünanga aha wodadi Ahingohaka o nauru. Ngohi aha kahirahi todiai maoa-oa unangika imamoteke de Ahi jaji. Ahi jaji unangika aha kahirahi Tasoso, Tadiaiua hokä o Saulika Tihitingakoka aiparetaka hupaya ngona yakunu nodadi o koano.

¹⁴Ani ngohaka o nauru Ti iri-irikoka gënanga aha Tihidadi o koano mangale Ahi umati de Ahi pareta mangale kahiado-adonika, de aingohaka de aidanongo manga difauku aha yopareta hokä o koano.’ ”

¹⁵O Natan wihingahu o Daudika hagala wohinyo nyata-nyataka ma Jou Madutu unangika.

¹⁶Daha ma Koano Daud wowohama ma Jou Ai Tau magoronaika. Unanga wogogeruku de womaniata, ”Ya Jou, Madutu, ngohi de ahitau manyawa ipatutua miatarima hagala o oa-oa Ngona nohidö dumu-dumutoka ngohino madekanino nënanga.

¹⁷Koaholi Ngona nodiai iholoi de gënanga; Ngona nodiaioka o jaji yakorona ahidifauku mangale maöraha aha iböboa-boa. Ngona koaho nohihidiai ngohi hokä o nyawa yolöago-agomo.

¹⁸Okiali yakunu totemo Ngonaika, ya Jou Madutu? Ngona nohi öriki hagala moi-moi mangale Ani gilaongo nënanga, mä Ngona nohihidöaka o horomati ngohino.

¹⁹Mangale Ani mau mahirete de mangale ahiparalu Ngona nodiai o manarama maago-agomo mata-mata nënanga de inyata-nyata.

²⁰Duga-duga Ngonala o Jou Madutu, koiwa imaketero dede Ngona. Ngomi mihiöriki o hali gënanga hababu kahuruonikahi imihingahuoka.

²¹O dunia ingodumu koiwa o hoana de o berera hokä o Israeloka. O Israel ganga o hoana imatengo-tengoka nahibebasoka o gilaongino mangale yodadi Ani umati mahirete. Hagala o manarama maago-agomo de ihöhera-heranga Nadödodiai mangale önanga yadiai Ani romanga kayaheto-hetongo o dunia ingodumu. Ngona nahilapahioka Ani umati o Mesirino, de Nahititoko o hoana de o berera mahomoa maöraha Ani umati yotagi manga himangika yoparangi.

²²O Israeloka manyawa Nahidadi Ani umati mahirete mangale kahiado-adonika. De Ngona, ya Jou, nodadi toönanga manga Jou Madutu.

²³O öraha nënanga, ya Jou, o Jou Madutu, nomau nakuata mangale kahiado-adonika, o jaji Nohidödemo-demo yakorona ahidiri de ahidifauku. Nomau nadiai okia nohijöjäjajioka gënanga.

²⁴Kiaka honanga o nyawa aha hokogenangika ihimulia Ani romanga de yotemo, ’Ma Jou Woko Kuaha enagënanga mangale o Israeloka manga Jou Madutu.’ Mangale kahiado-adonika ahidifauku womatengo aha wopareta hokä o koano.

²⁵Ngohi tohibarani ahidiri tohidoa o niata nënanga Ngonail̄e, ya Jou Madutu, hababu Ngona mahirete nohingahuoka ngohino ahingohaka de ahidanongo manga difauku aha Nahidadi o koano mangale o hoana nënanga.

²⁶Ngona, Jou, ganga o Jou Madutu, de o hali mahohailoa gënanga nohijäjajioka ngohino.

²⁷Karana gënanga, ngohi togahoko, noigo Nahibarakati ahidifauku hupaya kahiado-adonika önanga kahirahi yamao Ani dora. Hababu, Ngona nahibarakatioka Ani umati, ya Jou, done önanga aha kahirahi Nahibarakati mangale kahiado-adonika.”