Read Tobelo O TAWARIKH MADODIHIRAKA 18 Bible Online

O TAWARIKH MADODIHIRAKA 18 - Tobelo bible

O TAWARIKH MADODIHIRAKA 18

¹O öraha muruono naga ipahaika, ma Koano Daud waparangi de wahihangoka o Filistin manyawa ikali waora o Gad makota kamamoi o kapo-kapongo magilolitino.

²O Daudö wahihanga o Moab manyawa hiädono önanga yoihene de yofangu o soungu unangika.

³Ipaha o Daud wihihanga o Hadadezer o Zobaka manga koano itigika o Hamat madaera o Siria mabereraka. O oraha gënanga o Hadadezer magogiria o dodagi magoronaka mangale wakuaha o daera o Efrat ma Ngairi mautu madatekoka.

⁴O Daud waora o kureta i hipoparangi o yaribuhu moi, de watagoko o tentara yokokuda-kuda yaribuhu tumidi, ikali o tentara imadodagi-dagi yayaribuhu monaoko. Unanga wakokiluguoka mata-mata o kuda, sowali ua o hidoku moi, mangale yaoaka o kureta ihipoparangi o ratuhu moi.

⁵O Siria manyawa o Damsyikino yahidingoto o tentara mangale iwi riwo ma Koano Hadadezer, ma o Daud wähihangoka önanga de watoma yamonaoko de hinoto manga ribuhu.

⁶Ipaha ünanga wo hi goko o tentara manga tau-tau toönanga manga daera magoronaka de önanga iwihigihene ikali yofangu o soungu unangika. Ma Jou wihidoaka o utumu o Daudika kiakadika ünanga woparangi.

⁷O dadatoko-o dadatoko o gurasi yapöpake-pake o Hadadezer aitentara waora o Daud de wao o Yerusalemika.

⁸ Ma homoa genanga o Daud ö wal̄ë duru kohangöe o tabaga o Tibhat deʼ o Kunino, o kota-o kota madodihiraka wakokuaha o Hadadezer. (O wange maduruino o tabaga gënanga wapake o Salomo mangale wadiai o rube, ikali o liate-o liate de o puji mapakakaha ma Jou Ai Tau oka.)

⁹Ma Koano Tou o Hamatino woihene o Daud wahihangoka o Hadadezer aitentara yongodumu.

¹⁰Daha ünanga wihuloko aingohaka o nauru o Yoram mangale wohiadono aitabea ma Koano Daudika de wotemo halamati mangale aiutumu gënanga, hababu o Hadadezer mamoi iböto imaparangi de o Tou. O Yoram waika o Daudika de woao o hadia kohangöe o gurasi, o haaka de o tabaga.

¹¹Ma Koano Daud wohihuba mata-mata o hadia gënanga ma Jouika mangale ihipake o puji maupacara nagoronaka. Hoko genangoli wadiai de o kiahonanga o gurasi de o haaka waö ora-oraka o Hadadezer ino de o hoana de o berera wahöhohihangoka, enagënanga o hoana o Edom, o Moab, o Amon, o Filistin deʼ o Amalek.

¹² O Abisai (ngoi ayo amiromanga o ngo Zeruya) wahihangoka de wätoma o Edom manyawa ya 18.000 o Asin ma Waioka,

¹³Daha wohigoko o tentara manga tau-tau o Edom yamode-modekika. Done o Edom manyawa iwihigihene ma Koano Daudika. Ma Jou wihidöaka o utumu o Daudika kiakaö ünanga woparangi.

¹⁴Hoko gënanga o Daud wäpareta o Israeloka yongodumu de wagoana hupaya ai kawaha hokogenangika wahidiai de maadili de yaoa.

¹⁵Nenanga o pangka-pangkati yokokurutil̄e wagögora-goraka o Daud: O tentara yopoparangi manga kapita: o Yoab o Abisai airiaka. O kadatoka wotötuli-tulihi: o Yosafat o Ahilud aingohaka O imam-imam: o Zadok o Ahitub aingohaka de o Ahimelekh o Abyatar aingohaka, O negaraka wotö tuli-tulihi: o Sausa Ma koano aidiri yogoa-goana manga baluhu: o Benaya o Yoyada aingohaka O Daud aingoha-ngohaka o nauru yasö o pangkati o ko kurutil̄e o pareta magoronaka.