Read Tobelo O TAWARIKH MADODIHIRAKA 19 Bible Online

O TAWARIKH MADODIHIRAKA 19 - Tobelo bible

O TAWARIKH MADODIHIRAKA 19

¹O öraha muruono naga ipaha o Nahas o Amon manga koano wohonenge, de aingohaka o nauru o Hanun wodadi o koano.

²Daha ma Koano Daud wotemo, ”O Nahas ganga ahidodiawo wososetia, hoʼ ngohi kokiani hokogenangö o Hanunika, aingohaka.” Karana gënanga o Daud wahidingoto aihuhuloko o Amon mabereraika mangale iwil̄aru ünanga aiama aihonenge mal̄okuoka. Maöraha önanga imahiädono o Amonoka,

³o berera matutuda-tutuda gënanga iwitemo ma Koano Hanunika, ”Uha Jou Koano napikiri o Daud wahidingoto aihuhuloko gënanga karana ünanga womau wihoromati aniama Jou Koano! Unanga wahidingoto hagala o nyawa gënanga nenangino hokä yotötailako mangale yatailako tongone nanga berera hupaya yakunu yaora!”

⁴Ma Koano Harun wätagoko o Daud aihuhuloko-aihuhuloko gënanga, wakori toönanga mangaparahi, watobiki toönanga manga pakeanga mamodipokouku manga guluino, de yähuloko önanga yoiki.

⁵Mä önanga yamal̄eke mangale yolio, hoʼ önanga yoiki o Yerikhoika. Maöraha o hali gënanga ihingahu o Daudika, ünanga wohidingoto o behehongo hupaya o huhuloko-o huhuloko gënanga yogogere o Yerikhoka hiädono toönanga manga parahi iwango okali.

⁶Daha ma Koano Hanun deʼ o Amon manyawa yamao toönanga manga manarama idadioka o hababu o Daud wahaturu önanga. Karana gënanga önanga ihidingoto o haaka o kilo o ribuhu moruange de iata o Mesopotamia Il̄oku-l̄okuil̄e madaeraika, ikali o Maakhaika deʼ o Zoba o Siriaka mangale yahewa o kereta ihipoparangi o yamoruange de hinoto manga ribuhu de o tentara yokökuda-kuda. Daha yoboa o Maakha manga koano aitentara de mata-mata o kereta ihipoparangi yahewa-hewa gënanga de imatau o Medeba madatekoka. O Amon manyawaö yoboa toönanga manga kotaino mata-mata mangale imateke parangi.

⁸Maöraha o Daud woihene o hali gënanga ünanga wihuloko o Yoab de aitentara yopoparangi yongodumu yoiki yalawani manga haturu.

⁹O Amon manyawa yohupu de yatatoro toönanga manga duduono o Raba mangorana maamo-amoko mahimangoka, toönanga manga kota matiti, mä enahioko o kokoano yobö boa-boainoka mangale yariwo önanga, yatatoro manga duduono o tonaka malua-luasoka.

¹⁰O Yoab wamake iwihidobilatu o haturu manga duduono aihimangoka de aiporetoka. Karana gënanga ünanga wairiki o Israeloka manga tentara maoa-oa de wahigogere önanga imateke rihima de o Siria manga tentara.

¹¹O Israeloka manga tentaraino maboloi wahilapahi aidodotika o Abisai, watatoro toönanga manga duduono imateke rihimanga de o Amon manga tentara.

¹²O Yoab witemo aidodotika gënanga, ”Nako ngohi takunokauaoli tomatumungu o tentara o Siriaika, itaiti noboa nohiriwo ngohi. I idulu yaino, nako ngona nakunokauaoli nomatumungu o Amon manga tentaraika, aha toboa toniriwo ngona.

¹³Nomatotongohono! Naino ngone hoparangi de nanga barani mangale tongone nanga hoana de mangale tongone nanga Jou Madutu aikota-kota. Tanu ma Jou wadiai okia womö mau-mau.”

¹⁴O Yoab de aiduduono yangika yaparangi, hiädono o Siria manga tentara yopiringana.

¹⁵Maöraha o Amon manyawa yämake o Siria manga tentara ihioaroka manga diri, onangö o Abisaioka de yopiringana de imadohuku o kota magoronaika. O Amon manyawa waparangi ibötino, o Yoab wolio o Yerusalemika.

¹⁶O Siria manyawa imamao önanga yahohihangoka o Israel manyawaika. Daha önanga yaahoko toönanga manga tentara o Efrat ma Ngairi o wange mahiwaroko idaduoka madaeraino deʼ yahuloko manga tentara gënanga imateke parangi watuda o Sobakh o Hadadezer o Zoba manga koano aitentara yopoparangi manga kapita.

¹⁷Woihene o hali gënanga, o Daud wätoomu o Israeloka manga duduono ingodumu, daha yatobongo o Yordan ma Ngairi de ihidatoro mangaduduono imateke rihimanga de o Siria manyawa. Daha önanga imateke parangi,

¹⁸de o Siria manga tentara yagohara yahidodohuku mangale o Israeloka manga tentara. O Daud de aiduduono yätoma yaribuhu tumidi o kereta ihipoparangi yoöao-ao de yamoruata manga ribuhu o tentara imadödagi-dagi. O Sobakh o Siria manga kapita gënanga maiwitomaka.

¹⁹Maöraha o kokoano wäkokuaha o Hadadezer yamake önanga yahihangoka mangale o Israeloka manga tentara, önanga yogahoko imakadame de o Daud, de yoihene unangika. Iböto gënanga o Siria manyawa yolukokaoli yariwo o Amon manyawa.