Read Tobelo O TAWARIKH MADODIHIRAKA 21 Bible Online

O TAWARIKH MADODIHIRAKA 21 - Tobelo bible

O TAWARIKH MADODIHIRAKA 21

¹O ibilihi yoigo yahibodito o Israeloka manyawa; karana gënanga ënanga iwibaja o Daud hupaya wodiai o sensus.

²Daha o Daud witemo o Yoabika de aitentara manga balu-baluhika, ”Niadiai o sensus o Israeloka yongodumu hiädono o ngï magogurutika, karana ngohi toigo tohiöriki hokokia manga ngöe o Israeloka makawaha.”

³O Yoab wohaluhu, ”Tanu ma Jou wohidogo yowöe o Israeloka makawaha hiädono ilape o ratuhu moi toönanga manga ngöe öraha nënanga. Nomomulia, koigoungua itararonoka önanga yoihene Jou Koanoika? Yadodoa kiani nodiai o sensus? Damä, karana mahowono gënanga, o hoana yongodumu yatagongo mabalahi!”

⁴Mä ma koano kahirahi wasösö aiparetaika gënanga, ho o Yoab woiki o Israelokaika yongodumu, hiädono o ngï magogurutika, ipaha wolio o Yerusalemika,

⁵de wohingahu ma Koano Daudika mahasili o sensus gënanga. Manga ngöe o nau-nauru yadödaë-daëne madodagi mangale o tentara mamanarama naga yayasaana moi de ribuhu o ratuhu moi o Israeloka manyawa de yayaratuhu iata de moritumidi manga ribuhu, o Yehudaoka manyawa.

⁶Mä o Lewi aihöana de o Benyamin aihöana iwohamua manga gegetongo gënanga. O Yoab wodiaiua o sensus toönanga manga hidogoronaka hababu ünanga woigoua wohidagi ma koano aipareta gënanga.

⁷Ma Jou Madutu wosanangua de o sensus gënanga de Unanga wähukumu o Israeloka manyawa.

⁸Daha o Daud womaniata ma Jou Madutuika wato, ”Ya Jou Madutu, ngohi duru tobaradohaka! Nohihi apongo ngohi, hababu ahimanarama gënanga duru ibodo.”

⁹Ma Jou witemo manabi Gadika, wodadi o dodohanga manga hidogoronaka o Daud de ma Jou,

¹⁰”Noiki de nahetongo o Daudika Ngohi tohidöaka o ngongiriki hange unangika. Okia dika wairiki aha Tadiai.”

¹¹Daha o Gad woiki o Daudika de wohiädono ma Jou Ai behehongo gënanga, wato, ”Kiaka Jou Koano nairiki:

¹²O berera nënanga yabänga o balä o habirokata o taongo hangeino madekana, ekola Jou Koano nopiringana inigoginïki o haturu o mede hangeino madekana, ekola o berera nënanga ingodumu o wange hangeino madekana waparangi ma Jou de aioworo marupa o panyake o bobaku, de aimalaekat iao o honenge okiaika honanga. Naputuhu oraha nënanga okia kokiani tohiadono ma Jouika.”

¹³O Daud wohaluhu, ”Adede, tobodito ngohi! Iholoi yaoa wohihukumu ma Jou, ngaro ihihukumu o nyawa, hababu Ai dora de aihayanga ilamoko.”

¹⁴Daha ma Jou wodotagao o panyake o bobaku o Israel manyawaika hiädono ya 70.000 toönanga manga hidogoronaka yohonenge.

¹⁵Daha ma Jou wahuloko o malaekat imatengo mangale yabinaha o Yerusalem. Mä maöraha o malaekat gënanga imahi adonoka o Arauna o Yebus manyawa toünanga aigandum wobido-bidoro madatekoka, ma Jou wangali aiputuhu mangale wähukumu o hoana gënanga. Unanga wotemo o malaekatika gënanga, ”Yaoaka! Nomatogumu!”

¹⁶O Daud wamake o malaekat gënanga imawötika o dihanga de o dunia mahidogoronaka. De o oworo magiamoka, o malaekat gënanga imahidiai mangale yabinaha o Yerusalem. Daha o Daud de o kawaha manga tutuda-tutuda öraha gënanga magogiria imahi pakeika o karongo manonako imatoduba, yatilabukuku o tonakuku.

¹⁷O Daud womaniata, wato, ”Ya Jou Madutu, ngohila tahowono. Ngohila tähuloko yodiai o sensus gënanga. O hoana nënanga duruhë koyahowonua! Ya Jou, ahi Jou Madutu, nohi hukumu ngohi de ahitau manyawa, mä nohikurutika o huha nënanga de Ani umati.”

¹⁸Daha ma Jou Ai malaekat iwihuloko o Gad witemo o Daudika ünanga kiani wodoa to Arauna aigandum wobido-bidoro mangïil̄e de wohigoko o huhuba mangï ma Jouika genangoka.

¹⁹Daha o Daud womagoraka imamoteke de ma Jou Ai pareta iwihiado-adonoka unangika itilakuru o Gad.

²⁰O gandum mabibidoro mangïoka gënanga o Arauna de aingohaka o nauru yaruata magogiria yohidoro o gandum. Yamake o malaekat gënanga, o Arauna aingohaka yaruata gënanga yoara imangiunu.

²¹Maöraha o Arauna wimake ma Koano Daud woboa, ünanga wibuhukika o Daud de watilabukuku aihimangoka.

²²O Daud wato unangika, ”Ngohi tomau tohigoko o huhuba mangï o ngïoka nënanga mangale ma Jou, hupaya o panyake o bobaku nënanga imatogumu. Karana gënanga nahukunu o tonaka nënanga ngohino. Nahetongo muruono maija, ngohi aha tofangu.”

²³”Eh, nal̄ë dika, Jou Koano,” o Arauna wohaluhu, ”de nadiai okia Jou Koano namao yaoa. Nenanga hagala o hapi mangale o huhuba ituhu-tuhuku, de mangale magota ihidö dofo-dofo Jou Koano yakunu napake yoböbido-bidoro mapapanga-mapapanga nënanga. Ika nal̄ëö o gandum mangale o huhuba. Ngohi tohidöaka mata-mata gënanga, ngaro uha ahi Tuanga nafangu.”

²⁴Mä ma koano wohaluhu, ”Uha! Ngohi tomau tagoko dema ija itototomo. Ngohi toluku tohihuba ma Jouika okianaga tongona madutu ekola okianaga moi tamake de kapoparahaja.”

²⁵Daha o Daud wofangu o Araunaika o tiwi o gurasi o 600 mangale o ngï gënanga.

²⁶Daha o Daud wohigoko moi o huhuba mangï genangoka ma Jouika, de wohihuba o huhuba itö tuhu-tuhuku ikali o dame mahuhuba. Ipaha ünanga womaniata de ma Jou wobaluhu ai niata gënanga de wohiguti o uku o dihanguku yatuhuku o huhuba-o huhuba, o huhuba mangï mal̄okuoka gënanga.

²⁷Daha ma Jou wahuloko o malaekat gënanga yaharumokali maoworo, daha o malaekat gënanga yadiai ma Jou Ai pareta gënanga.

²⁸Maöraha o Daud wamake ma Jou wobaluhu ai niata karana o huhuba gënanga, daha ünanga wohihubali o huhuba mangïoka gënanga.

²⁹Oraha gënanga ma Jou Ai Tau o Musa wadodiai o tonaka makokakahaka, de o huba mangï mangale o huhuba itö tuhu-tuhuku kanagahi o puji mangïoka o Gibeonoka.

³⁰Mä o Daud wobaraniua dokengika mangale ima ade-ade de ma Jou Madutu, hababu ünanga womodongo ma Jou Ai malaekat maoworika.