Read Tobelo O TAWARIKH MADODIHIRAKA 22 Bible Online

O TAWARIKH MADODIHIRAKA 22 - Tobelo bible

O TAWARIKH MADODIHIRAKA 22

¹Daha o Daud wato, ”Mangïoka nënanga kiani hohigoko ma Jou Madutu Ai Tau. De o huhuba mangï nënanga o Israeloka manyawa kiani ihihuba toönanga manga huhuba itötuhu-tuhuku ma Jouika.”

²Ma Koano Daud wahuloko yatoomu mata-mata o nyawa maporetino yogögogogere o Israel manga bereraka, daha ünanga wahimanarama önanga. Utu onangino yohonotoko o helewo mangale ihigoko ma Jou Ai Tau.

³Mangale yodiai o paku de o hensel mangale ma Jou Ai Tau mangorana-mangorana ma Ago-agomo gënanga, o Daud wotoomu o behi duru kohangöe. Unangö wotoomu o tabaga hoko gënanga mangöe, hiädono yakunokaua yatibanga.

⁴O Tirus deʼ o Sidon manyawaino ’unanga wobehehongo o Libanon maliwewuru magota magegetongo kohaamoko.

⁵O Daud wadiai mata-mata gënanga karana ünanga womatibanga hokonënanga: ”Ngohi kiani tasadia okia ipoparalu mangale ihigoko-goko ma Jou Ai Tau. Hababu o Salomo ahingohaka o nauru kawogöohi de ikurangohi wohiöriki, enahioko ma Jou Ai Tau aha ihigögoko-goko gënanga kiani duru imulia de kayaheto-hetongo o dunia ingodumu.” Daha o Daud wohonenguahi, ünanga wasadia o tau mapakakaha durukoha ngöe.

⁶O Daud wiahoko aingohaka o nauru, o Salomo, de wipareta ünanga mangale wohigoko o tau ma Jou Madutuika iwihöhuba-huba o Israeloka maumati.

⁷ O Daud wato o Salomoika, ”Ahingohaka, kohadekanoka ngohi ahidungutu tohigoko moi o tau mangale ahi Jou Madutu Ai horomati.

⁸Mä ma Jou wotemo ngohi hoko gena ngika mamoi-mamoi toparangi de tatomaka o nyawa manga ngöe. Karana gënanga Unanga wohihigumal̄aua ngohi tohigoko o tau mangale Unanga.

⁹Ngaro hoko gënanga, Unanga wohidöakoka ngohino o jaji nënanga: ’Ngona aha namake o ngohaka o nauru womatengo aha wopareta de irïridi, hababu Ngohi aha tiriwo ünanga hiädono koiwa o haturu iwiparangi ünanga. Unanga aha nihiromanga o Salomo hababu madekanino ünanga wopareta, Ngohi aha tihidöaka irï ridi de koiwa maruae o Israel yamode-modekika.

¹⁰Ani ngohaka o nauru gënanga aha wohigoko o tau mangale Ngohi. Unanga aha wodadi Ahi ngohaka de Ngohi todadi ai ama. O Israel mapareta ma Kuruhi aha kahirahi aidifaukuika mangale kahiado-adonika.’ ”

¹¹Daha o Daud wotemoli, ”O öraha nënanga, ahingohaka, tanu ani Jou Madutu hokogenangika woniriwo ngona. De tanu ngona nohasili nohigoko o tau mangale ma Jou hokä wohijöjajajioka.

¹²De tanu ani Jou Madutu wonihidöaka ngonaika o barija de o mangarati mangale napareta o Israeloka imamoteke de hagala Ai tita.

¹³ Nako ngona nohingounu mata-mata o tita wohidödöa-döaka ma Jou o Musaika mangale o Israel manyawa, ngona aha nohasili. Ngona kiani nongaku de nobarani. Uha nohawana nohimanga okiaö dika.

¹⁴Yakorona ma Jou Ai Tau gënanga ngohi tohidailakoka tagou-goungu mangale totoomu o gurasi o ton o 3.400 de maboloi o haaka o ton o 34.000. Mahomoa gënanga naga o tabaga de o behi hakunua haetongo mangöe. O gota de o helewo tabötukuoka, mä ngona kiani nodogoli.

¹⁵Tongona yowöe yokokarajanga. Naga yakunu yomanarama o helewoka yoföfai-faiti, naga yomomanarama o gota, yomehe-mehele de duru manga ngöe yogögao-gao yososawaro yomanarama,

¹⁶o gurasi, o haaka, o tabaga de o behi. Ika, itaiti namulaenge! Tanu ma Jou woniriwo ngona.”

¹⁷Daha o Daud wähuloko o Israeloka manga tutuda mata-mata iwiriwo o Salomo.

¹⁸Wato, ”Ma Jou nia Jou Madutu winiriwoka ngini, de winihidöaka o dame ikali niaberera ingodumu irïdi. Unanga wohihigumal̄aka ngohi tahohihanga mata-mata o hoana mahira yogögogere o bereraka nënanga. O öraha nënanga önanga yoihene nginika de ma Jouika.

¹⁹Ho, kokiani ngini nimahigilaongo nia Jou Madutuika de niajiwa de niaröehe magahumu. Mulaenge nihigoko o tau mangale ma Jou, hupaya ai Jaji ma Peti de mata-mata mapakakaha mahomoa yapöpake-pake yodingakoka mangale o puji yakunu yonoa genangoka.”