Read Tobelo O TAWARIKH MADODIHIRAKA 23 Bible Online

O TAWARIKH MADODIHIRAKA 23 - Tobelo bible

O TAWARIKH MADODIHIRAKA 23

¹ Maöraha o Daud duru iwitimonoka ünanga wigoraka o Salomo wodadi o Israeloka manga koano.

²Ma Koano Daud watoomu mata-mata o Israeloka manga tutuda, o imam-imam de o lewi manyawa,

³daha ünanga waetongo mata-mata o nau-nauru o lewi aihöana manga umuru o taongo moruange de yakaile. Mata-mata naga ya 38.000.

⁴Daha ya 24.000 toönanga manga hidogoronaka wahimanarama mangale yasö o karajanga ma Jou Ai Tauoka, ya 6.000 mangale i hidodailako o hura-hurata de yototailako o perekara,

⁵ya 4.000 manga manarama mangale yogoana, de ya 4.000 mangale iwihigiriri ma Jou de o musik mapakakaha-pakakaha ibobotukuoka.

⁶O Daud waregu hagala o Lewi manyawa gënanga o doumu hange magoronaka imamoteke toönanga manga ahali, enagënanga o ahali o Gerson, o Kehad de o Merari.

⁷O Gerson toünanga aingohaka o nauru yahinoto: o Ladan deʼ o Simei.

⁸O Ladan aingohaka o nau-nauru naga yaruange: o Yehiel, o Zetam deʼ o Yoel.

⁹Onanga ganga o Ladan aidifauku manga ahali manga baluhu. (O Selomit, o Haziel deʼ o Haran ganga o Simei aingoha-ngohaka o nauru.)

¹⁰O Simei aingohaka o nau-nauru yaruata imamoteke toonanga manga umuru imakokadadu ganga: o Yahat, o Ziza, o Yeus deʼ o Beria. O Yeus deʼ o Beria manga difauku yowoeua, hoonanga yaetongo o ahali moi.

¹²O Kehat toünanga aingohaka o nauru yaruata: o Amram, o Yizhar, o Hebron deʼ o Uziel.

¹³ O Amram ganga o Harun deʼ o Musa mangaama. (O Harun de aidifauku kahiado-adonika wahitingakoka mangale yogoana o puji mapakakaha-pakakaha, yotuhuku o dupa ma Jouika, iwileleani ma Jou de yahibarakati o kawaha de ma Jou Ai romanga.

¹⁴O Musa ma Jou Madutu Ai gilaongo aingoha-ngohaka o nau-nauru gënanga, yahingohama o Lewi aihöana magoronaika.)

¹⁵O Musa toünanga aingohaka o nauru yahinoto, enagënanga o Gersom deʼ o Eliezer.

¹⁶Wodadi manga tutuda o Gersom aingoha-ngohaka enagënanga o Sebuel.

¹⁷O Eliezer toünanga aingohaka o nauru duga-duga womatengo, airomanga o Rehabya. Mä o Rehabya toünanga aingohaka duru komanga ngöe.

¹⁸O Yizhar, o Kehat aingohaka mahinotoka, toünanga aingohaka o nauru airomanga o Selomit; ünanga ganga manga hoana manga baluhu.

¹⁹O Hebron, o Kehat aingohaka mahangeoka, toünanga aingohaka o nauru yaruata: Duru woro ria-riaka o Yeria, dahauku o Amarya, o Yahaziel deʼ o Yekameam.

²⁰O Uziel, o Kehat aingohaka maiatoka, toünanga aingohaka o nauru yahinoto: Duru worö ria-riaka o Mikha, deʼ o Yisia.

²¹O Merari toünanga aingohaka o nauru yahinoto manga romanga o Mahli deʼ o Musi. O Mahli toünanga aingohaka o nauru yahinoto; enagënanga o Eleazar deʼ o Kis,

²²mä o Eleazar wohonenge koiwa toünanga aingohaka o nauru; duga-duga ai ngoha-ngohaka o ngoheka yokawingi de toonanga manga roriadodoto o tohora moi, enagënanga o Kis ai ngoha-ngohaka.

²³O Musi, o Merari aingohaka mahinotoka, toünanga ai ngohaka o nauru yaruange: o Mahli, o Eder deʼ o Yeremot.

²⁴Genanga manga roma-romanga o Lewi aidifauku itulihi imamoteke manga romanga manga hoana mabaluhu de manga tau manyawa moi-moi. Onanga manga umuru o taongo monaoko de yakail̄e de yamake o manarama ma Jou Ai Tauoka.

²⁵O Daud wotemo, ”O Israeloka manga Jou Madutu wahi doakoka Ai umatika irïdi, de Unanga mahirete wogogere o Yerusalemoka mangale kahi ado-adonika.

²⁶ Karana gënanga, ma Jou Ai Tau de mata-mata mapakakaha ipo pake-pake mangale o puji iparalu okauaoli yamoku o Lewi manyawa.”

²⁷Imamoteke o pareta-o pareta mabobaha o Daudino, mata-mata o Lewi manyawa, nako manga umuru otaongo monaoko iböto, kiani yatulihi mangale yomanarama.

²⁸ Onanga kiani yariwo o imam-imam o Harun ai difauku o puji maupacara mahidailako magoronaka ma Jou Ai Tauoka, yapaliara o loa-o loa de o kama-kamari ma Jou Ai Tauoka gënanga, ikali yogoana hupaya hagala moi-moi ihito tinga-tingakoka mangale ma Jou idadiua ipeseke.

²⁹Onangö yogoana mangale nenangohi: o roti ihihö huba-huba ma Jou Madutuika, o göpunu yapö pake-pake mangale o huhuba ma Jouika, o kukisi mangina-ngina yadiai yaragiua, o huhuba il̄ofo-l̄ofo, deʼ o göpunu ihigö ganu-ganu deʼ o zaitun maminya. Onanga kiani yatibangö de yasupa o huhuba-o huhuba yaö ao-ao ma Jou Ai Tauika.

³⁰Mahomoa gënanga önanga kiani yonyanyi iwihigiriri ma Jou o ngorumino ihi getongo de yohutuku ihi getongo;

³¹o öraha ihi getongö nako naga o huhuba yatuhuku mangale ma Jou o Sabat mawangeoka, o Mede ma Hungi ma rameangoka, de o rameanga-o rameanga mahomoa. Yakorona o Lewi manyawa manga ngöe kiani yomanarama o öraha ihigetongo, yadiaiokali madatoro. Mangale kahiado-adonika o Lewi manyawa kiani yadiai o manarama gënanga.

³²Onanga yahidoakö yogoana mangale yapaliara ma Jou Ai gamake matau ikali ma Jou Ai Tau de mangale yäriwo toönanga manga roriadodoto, enagënanga o imam-imam o Harun aidifauku yadiai o puji magoronaka o ngïoka gënanga.