Read Tobelo O TAWARIKH MADODIHIRAKA 24 Bible Online

O TAWARIKH MADODIHIRAKA 24 - Tobelo bible

O TAWARIKH MADODIHIRAKA 24

¹ O Harun toünanga aingohaka o nauru yaruata: O Nadab, o Abihu, o Eleazar deʼ o Itamar. De toönanga mangaama, o Nadab deʼ o Abihu ihira yohonenge toönanga koiwa manga ngohaka. Karana gënanga o Eleazar deʼ o Itamar toönanga manga roriadodoto yodadi o imam. O Daud waregu o Harun aidifauku o doomu-o doomu magoronaka imamoteke toönanga manga manarama. Manga doomu mamanarama magoronaka gënanga o Daud iwiriwo o Zadok o Eleazar aidifauku deʼ o Ahimelekh o Itamar aidifauku.

⁴O Itamar aidifauku iregu idadi o doomu tufange, hö de o Eleazar aidifauku idadi o doomu ngimoi de butanga, hababu o Eleazar aidifauku magoronaka naga iholoi yowöe o nau-nauru manga tau manyawa ihiböbalu-baluhu.

⁵Karana yaoa o Eleazar aidifauku magoronaka yaoa o Itamar aidifauku magoronaka naga ma Jou Ai Tau mapegawe-pegawe de o agama matutuda-tutuda, mangale gënanga ihikodoku manga manarama yadiai de o undi.

⁶O Eleazar aidifauku de o Itamar aidifauku imateke totagali yol̄ë o undi, daha toönanga manga roma-romanga watulihi womatengo wotötuli-tulihi ai romanga o Semaya o Netaneel aingohaka o Lewi manyawa. Mata-mata gënanga yadiai ma koano aihimangoka kamamoi aipegawe-pegawe, ma Imam Zadok, o Ahimelekh o Abyatar aingohaka ikali o imam manga doomu manga tau manyawa manga balu-baluhu deʼ o Lewi manga doomu manga tau manyawa manga balu-baluhu.

⁷Nenanga manomor madatoro manga manarama imateketotagali yadödae-daene o undiino, mangale o doomu monaoko de iata gënanga: 1. O Yoyarib — 13. O Hupa 2. O Yedaya — 14. O Yesebeab 3. O Harim — 15. O Bilga 4. O Seorim — 16. O Imer 5. O Malkia — 17. O Hezir 6. O Miyamin — 18. O Hapizes 7. O Hakos — 19. O Petahya 8. O Abia — 20. O Yehezkiel 9. O Yesua — 21. O Yakhin 10. O Sekhanya — 22. O Gamul 11. O Elyasib — 23. O Delaya 12. O Yakim — 24. O Maazya

¹⁹Hagala o nyawa iheto-hetongo manga romanga itulihi imamoteke toönanga manga hidoku mangale yongohama ma Jou Ai Tau de yadiai o puji mamanarama wohitotatapuoka o Harun, toönanga manga ete de manga tohora, imamoteke de ma Jou Ai pareta, o Israeloka manga Jou Madutu.

²⁰Mahomoa gënanga o Lewi aidifauku magoronaka kaidogo ikahi manga tau manyawa manga balu-baluhu nenangohi: O Yehdeya, o Amram aidifauku mariri o Subael aidifauku deyaino; O Yisia, o Rehabya aidifauku; O Yahat, o Yizhar aidifauku mariri o Selomot aidifauku deyaino; O Yeria, o Amarya, o Yahaziel deʼ o Yekameam o Hebron aingoha-ngohaka imamoteke imakokadadu manga umuru; O Samir, o Uziel aidifauku mariri o Mikha aidifauku deyaino; O Zakharia, o Uziel aidifauku mariri o Yizia o Mikha airiadodoto aidifauku.

²⁷O Yaazia tounanga aingohaka o nauru yaruange: o Syoham, o Zakur deʼ o Hibri.

²⁸O Mahli toünanga aingohaka o nauru yahinoto manga romanga o Eleazar deʼ o Kis. O Eleazar koiwa toünanga ai ngohaka o nauru, mä o Kis toünanga aingohaka o nauru womatengo airomanga o Yerahmeel.

³⁰O Musi aingohaka o nauru naga yaruange: o Mahli, o Eder deʼ o Yerimot. Genanga o tau manyawa-o tau manyawa o Lewi aihoana magoronaka.

³¹Mangale yadaene toönanga manga manarama, manga tau ma nyawa manga balu-baluhu magetongo kamamoi womatengo aidodoto o nauru wol̄ë o undi hokä yadodiai toönanga manga roriadodoto, enagënanga o imam-imam o Harun aidifauku. Yol̄ë o undi gënanga yahakihi ma Koano Daud kamamoi o Zadok, o Ahimelekh ikali manga tau manyawa manga balu-baluhu o imam-imam manga doomuino de o Lewi manyawa manga doomuino.