Read Tobelo O TAWARIKH MADODIHIRAKA 25 Bible Online

O TAWARIKH MADODIHIRAKA 25 - Tobelo bible

O TAWARIKH MADODIHIRAKA 25

¹Mangale o puji maupacara-maupacara matutuda, ma Koano Daud de o tutuda-o tutuda o Lewi manyawa yäiriki o Lewi aiahali-aiahali itöturu-turuino nënanga: O Asaf, o Heman deʼ o Yedutun. Onanga yahimanarama mangale ihiädono o behehongo ma Jou Madutuino de ihinïki o musik o kecapi, o gambus deʼ o simbal. Mangale yatuda o puji de maupacara moi-moi, yäiriki o doomu-o doomu ituruino nënanga:

²O Asaf aingohaka o nauru yaruata: o Zakur, o Yusuf, o Netanya deʼ o Asarela. Toönanga manga tutuda ganga o Asaf, ihiöado-adono o behehongo ma Jou Madutuino, nako ma koano wahimanarama.

³O Yedutun aingohaka o nauru yabutanga: o Gedalya, o Zeri, o Yesaya, o Simei, o Hasabya deʼ o Matica. Manga tutuda toönanga manga ama, önanga ihiädono o behehongo ma Jou Madutuino ihinïki o musik o kecapi, de önanga ihinyanyi o higiriri manyanyi ikali yotemo sukur ma Jouika.

⁴O Heman aingohaka o nauru yangimoi de yaruata: o Bukia, o Matanya, o Uziel, o Sebuel, o Yerimot, o Hananya, o Hanani, o Eliata, o Gidalti, o Romamti-Ezer, o Yosbekasa, o Maloti, o Hotir deʼ o Mahaziot.

⁵O Heman ganga ma koano aidiri manabi. Ma Jou wihidöaka o ngohaka o nauru yangimoi de yaruata ikali o ngohaka o ngoheka yaruange o Hemanika, karana ma Jou wojajioka mangale wihi döaka o pangkati ihohoromati unangika.

⁶O Heman aingohaka mata-mata gënanga ihigogogule o musik o simbal, o kecapi de o gambus önanga manga ama aitutuda matimioka mangale ihiginïki o puji maupacara ma Jou Ai Tauoka. O Asaf, o Yedutun deʼ o Heman yamake o manarama imamoteke de o hidumutu ma koanoino.

⁷Yamonaoko deyaruata o ngohaka o nauru önanga gënanga de toönanga manga roriadodoto ganga duru yanönako-nako o musik imadödoto-dotokoka. Onanga mata-mata naga ya 288.

⁸Mangale ihitantu mangahidoku yomanarama, önanga mata-mata yol̄ë o undi — yaoa yogögö yaoa yatotimono, yaoa yanönako-nakoka yaoa daha mulaenge imadotoko.

⁹Ya 288 gënanga yaregu o doomu moi 24 magoronaka imamoteke mangatau manyawa moi-moi. Manga doomu magetongo mangangöe yangimoi deyahinoto wätuda wotengo. Nenanga madatoro toönanga manga romanga imamoteke o undi: 1. O Yusuf o Asaf aitau manyawaino — 13. O Subael 2. O Gedalya — 14. O Matica 3. O Zakur — 15. O Yeremot 4. O Yizri — 16. O Hananya 5. O Netanya — 17. O Yosbekasa 6. O Bukia — 18. O Hanani 7. O Yesarela — 19. O Maloti 8. O Yesaya — 20. O Eliata 9. O Matanya — 21. O Hotir 10. O Simei — 22. O Gidalti 11. O Azareel — 23. O Mahaziot 12. O Hasabya — 24. O Romamti-Ezer