Read Tobelo O TAWARIKH MADODIHIRAKA 26 Bible Online

O TAWARIKH MADODIHIRAKA 26 - Tobelo bible

O TAWARIKH MADODIHIRAKA 26

¹Nenanga manga manarama mahidoku mangale o Lewi manyawa ma Jou Ai Tau magogoana. O Korah aiahalino iwitumutu o Meselemya o Kore aingohaka o Ebyasaf aitau manyawaino.

²To ünanga aingohaka o nauru yatumidi itulihi imamoteke manga umuru imakokadadu: o Zakaria, o Yediael, o Zebaja, o Yatniel,

³o Elam, o Yohanan, o Elyunai.

⁴ Inoli iwitumutu o Obed-Edom. Ma Jou Madutu wihibarakati ünanga de aingohaka o nauru yatufange itulihi imamoteke manga umuru imakokadadu: o Semaya, o Yozabad, o Yoah, o Sakhar, o Netaneel,

⁵o Amiel, o Isakhar deʼ o Peuletai.

⁶O Semaya o Obed-Edom aingohaka mariaka toünanga aingohaka o nauru yabutanga: o Otni, o Refael, o Obed, o Elzabad, o Elihu deʼ o Semakhya; mata-mata o nyawa yoböbaraguna toönanga manga ahali magoronaka hababu önanga yokuata de yobarani, duru mal̄okuoka o Elihu deʼ o Semakhya.

⁸Mangale o manarama yogoana gënanga o Obed-Edom yahidöaka o nau-nauru yokua-kuata ya 62.

⁹O Meselemya aiahaluku yahidöaka o nyawa yobobarani ya 18.

¹⁰O Merari aiahalino iwitumutu o Hosa. Toünanga aingohaka o nauru yaruata: o Simri (ünanga o ngohaka o riakua, mä aiama wigoraka wodadi o tutuda),

¹¹o Hilkia, o Tebalya deʼ o Zakharia. O Hosa aitau madol̄a manyawa naga mata-mata ya 13 yodadi ma Jou Ai Tau magogoana.

¹²Ma Jou Ai Tau yogogoa-goana yaregu o doomu-o doomu magoronaka imamoteke manga ahali magoronaka. Onanga yahidöako o manarama-o manarama ma Jou Ai Tau magoronaka hokä o Lewi manyawa mahomoa.

¹³O ahali magetongo yaoa o ahali maago-agomo yaoa o ahali maiteteke, yol̄e o undi mangale imahiöriki o ngorana maamo-amoko kiaka önanga kiani yomanarama.

¹⁴O Selemya wamake o ngorana maamo-amoko o wange mahiwaroko idaduoka. Aingohaka o Zakharia, hokogenangika wohidöaka o nasihati maoa-oa, wamake o ngorana maamo-amoko o koremieuku idaduoka.

¹⁵O Obed-Edom wamake o ngorana maamo-amoko o koreharaile idaduoka de aingoha-ngohaka yamake o manarama yogoana okiahonanga magudang-gudang.

¹⁶O Supim de o Hosa yamake o ngorana maamo-amoko o wange madumuniha idaduoka de o ngorana maamo-amoko o Syalekhet naga o ngekomo idödoa-doaka. O manarama yogogoana yatatoro hokogenanga marupa hiädono hokogenangika naga yogoana o ngorana maamo-amokoka.

¹⁷O wange ihigetongo o wange mahiwaroko naga o gogoana yabutanga, o koremieuku yaruata de o koreharail̄e yaruata. Okiahonanga magudang-gudangö yogoana yaruata: O gudang magetongo yahohinoto.

¹⁸Matireoka o wange madumuniha idaduoka yahigogere yaruata o gogoana o ngekomoka de yahinoto o gogoana o tireoka gënanga mahirete.

¹⁹Hokogënanga yogoa-goana manga manarama yahikodoku o Korah de o Merari manga ahalika.

²⁰Hagala o nyawa mahomoa o Lewi aihöana magoronaka yahilapahi yogoana ma Jou Ai Tau maarata de mangale o gudang mangï yagogono o ngongike-ngongike mangale ma Jou Madutu.

²¹O Ladan ganga o Gerson aingohaka o nauru womatengo; ünanga wahiguti yamuruononaga o hoana manga doomu, yodogoika o Yehiel aingohaka aiahali.

²²O Yehiel aingoha-ngohaka, enagënanga o Zetam de o Yoel, yahidöaka yogoana hagala moi-moi mangale o gudang-gudang de ma Jou Ai Tau matiwi.

²³Manga difauku o Amram, o Yizhar, o Hebron deʼ o Uzielö yamake o hidoku yomanarama.

²⁴O Sebuel o Gersom aiahalino, o Musa aingohaka, ganga yogoana ma Jou Ai Tau maarata.

²⁵Toünanga aitau manyawa manga dodohanga deʼ o Selomit itilakuru o Eliezer o Gersom aidodoto. O Eliezer aidifauku mariri hiädono o Selomit ganga hokä hokonënanga: o Eliezer, o Rehabya, o Yesaya, o Yoram, o Zikhri, o Selomit.

²⁶O Selomit de aingohaka de airiadodoto yatagongo moi-moi mangale mata-mata o ngongike wohihöhuba-huba ma Koano Daud, mangatau manyawa mabalu-baluhu, o hoana mangatutuda-tutuda, de o tentara mangabalu-baluhu yokokurutil̄e.

²⁷O ngongike-o ngongike gënanga ganga mahononga okiahonanga yaora-oraino önanga yamake o parangi magoronaka de önanga ihihuba mangale ihitingakoka yapake ma Jou Ai Tau magoronaka.

²⁸De madipoko, o Selomit de ai tau manyawa yatagongo moi mangale hagala moi-moi ihilolapahioka mangale ihitingakoka yapake ma Jou Ai Tau magoronaka, idogoika o huhuba-o huhuba itilakuru ma Nabi Samuel wohilolapahioka ma Koano Saul, o Abner o Ner aingohaka, de mangale o Yoab o ngo Zeruya ami ngohaka.

²⁹O Yizhar aidifauku, enagënanga Kenanya ikali aingoha-ngohaka, yahilapahi o negara mabuku-buku de o manarama-o manarama hagala moi-moi yakorona o perekara yatotailako o Israeloka manga hidogoronaka.

³⁰Hagala mahidailako o agama de mahidailako o popareta o Israelokaka o Yordan ma Ngairi o wange madumuniha ihilapahi o Hasabyaika, de ya 1.700 ika aingohaka de airiadodoto: mata-mata o nyawa yolago-agomo o Hebron aidifauku.

³¹O Hebron aidifauku mangatutuda ganga o Yeria. Mataongo moruatoka ma Koano Daud aipareta yodiai o dailako yakorona o Hebron aidifauku. O dailako magoronaka gënanga inyata toönanga manga hidogoronaka naga hagala o tentara yonönau-nauru yogogere o Yazeroka o Gilead madaera magoronaka.

³²Hagala o agama mahidailako de o popareta o Israelokaka o Yordan ma Ngairi o wange mahiwaroko idaduoka — enagënanga o Ruben, aihöana madaera, o Gad deʼ o Manasye aihöana mahononga — yahilapahi ya 2.700 o Yeria aitau manyawa manga balu-baluhu, mata-mata o nyawa yolago-agomo wairiki ma Koano Daud.