Read Tobelo O TAWARIKH MADODIHIRAKA 28 Bible Online

O TAWARIKH MADODIHIRAKA 28 - Tobelo bible

O TAWARIKH MADODIHIRAKA 28

¹Ma Koano Daud wohipareta hupaya o Israeloka manga tutuda mata-mata imatoomu o Yerusalemoka. Ho, o hoana manga balu-baluhu, o pangka-pangkati ihidodailako o pareta, o ahali mabalu-baluhu, yogögoa-goana o arata de ma koano aiaiwani o gigini ikali aingohaka o nau-nauru — de madipoko yolöago-agomo o kadatoka, o tentara manga baluhu de o nyawa yobobaraguna, mata-mata imatoomu o Yerusalemoka.

² O Daud womaokoino toönanga manga himangoka de wotemo, ”Ahi roriadodoto o hoana moi, niihene! Madekanoka ngohi tomau tohigoko moi o tau o mehele mangale o Jaji ma Peti, tongone nanga Jou Madutu Ai lou mahohole. Ngohi tohidiai iböto mangale tohigoko moi o tau tihuba Unanga mangi.

³Mä ma Jou wohihigumal̄aua ngohi tadiai o hali gënanga karana ngohi o tentaraoka tomatengo maamokoka takopoa o awunu.

⁴O Jou, o Jou Madutu iwihö huba-huba o Israeloka, wohi irikoka ngohi de ahidifauku mangale miapareta o Israeloka kahiado-adonika. Mangale wohidiai womatengo o tutuda Unanga wäiriki ahiama aitau manyawa. De ahiama aitau manyawaino mata-mata gënanga Unanga aihininga yadaene wohiiriki ngohi de wohihidadi ngohi o koano mangale o Israeloka yongodumu.

⁵Unanga wohihidöaka o ngohaka iwöe ngohino de ahingohakino mata-mata gënanga Unanga wïiriki o Salomo mangale wapareta o Israeloka, ma Jou Ai popareta.

⁶Ma Jou wotemo ngohino hokonënanga, ’O Salomo ani ngohaka aha wohigoko o tau mangale Ngohi. Unanga Tiirikoka wodadi Ahi ngohaka, de Ngohi aha todadi aiama.

⁷Nako ünanga dewa gou-goungu wohigila-gila wamoteke mata-mata o tita de Ahi pareta-pareta hokä wadodiai oraha nënanga, Ngohi aha takuata aipareta mangale kahiado-adonika.’ ”

⁸Daha o Daud wotemo wohigila-gila, ”Ho öraha nënanga, hei ahikawaha, tongone nanga Jou Madutu Ai himangoka de o Israeloka ningodumu niagamake mahimangoka, ma Jou Ai umati nënanga, ngohi togahoko ngini de nia gou-goungu niamoteke hagala ma Jou Ai pareta tongone nanga Jou Madutu. De hokogënanga ngini yakunu kahirahi katingini o berera maoa-oa nënanga de niahipuhaka niadifaukuika mangale kahiado-adonika.”

⁹Daha o Salomoika, o Daud witemo, ”Ahingohaka, kokiani ma Jou Madutu tihöhuba-huba ani ama, nihigoungu hokä ani Jou Madutu. Ngona kiani nomahigilaongo Unangika de anihininga iriko-rikoto de anihininga mangigo. Hababu Unanga wohiöriki mata-mata o dibanga de tongone nanga hininga manahihu. Nako ngona nilingiri Unanga, Unanga aha nimake, mä nako ngona nimal̄a Unanga, Unanga aha wonitila ngona mangale kahiado-adonika.

¹⁰Nohininga nohidodiai ma Jou woniirikoka ngona mangale nohigoko o tau ihitötinga-tingakoka mangale Unanga. Aa, öraha nënanga namanarama gënanga de animau ikua-kuata.”

¹¹Iböto gënanga o Daud wohilapahi o Salomoika madatoro mangale ma Jou Ai Tau imaoko, o gudang-gudang, mata-mata makamari, de o Ngï Duru i Tebi-tebini, o baradoha ma apongo mangï.

¹²O Daud wohilapahiö mata-mata o datoro watötiba-tibangoka mangale malöa-löa de makama-kamari yakilolitino, de mangale ma Jou Ai Tau mapakakaha magudang-gudang gënanga ikali o gudang-gudang o ngongike-o ngongike mangale ma Jou magö gogono mangï.

¹³Wohilapahiö o datoro yakorona manga doomu o imam-imam de o Lewi manyawa, yakorona o manarama-o manarama kokiani önanga yamanarama enagënanga toönanga manga manarama ma Jou ai Tauoka de yapaliara o puji mapakakaha mata-mata.

¹⁴Unanga wohidöaka o hidumutu-o hidumutu yakorona madodagi yamanarama o gurasi de o haaka mangale yadiai o pakakaha-o pakakaha,

¹⁵mangale o hilo yogetongo de o hilo matotodenge,

¹⁶mangale o meja-o meja o haakaino, de mangale o meja o gurasi yogetongo o roti ihidodiai mangï mangale ma Jouika.

¹⁷O hidumutu-o hidumutuö yakorona magegetongo o gurasi madutu kokiani yapake mangale yadiai o garpu, o mangko de o buyu-buyu, yakorona mangöe o haaka de o gurasi mangale yadiai o dodai-dodai,

¹⁸yakorona mangöe o gurasi madutu mangale yadiai o huhuba mangï o dupa ituhu-tuhuku mangï de mangale yadiai o kereta mangale o dodadi o horogaino de magogahuhuoka madulada-dulada de magahuhu yahoheika ma Jou Ai Jaji ma Peti mal̄okuoka.

¹⁹Daha ma Koano Daud wotemo, ”Mata-mata gënanga iwohama o datoro magoronaka itötuli-tulihoka imamoteke de o hidumutu wohidödöa-döakoka ma Jou mahirete ngohino mangale tadiai.”

²⁰Ipaha ma Koano Daud wotemoli o Salomoika aingohaka o nauru, ”Ngona kiani nongaku de nobarani. Mulaenge o manarama gënanga de uha nododato nohimanga okiaö dika. Ma Jou Madutu tihöhuba-huba aha woniriwo ngona. Unanga aha wonimal̄aua ngona. Unanga aha wonidatekuku ngona hiädono o manarama mata-mata gënanga iböto.

²¹Imahikodoku o puji mamanarama ma Jou Ai Tau magoronaka ihitantuoka o imam-imam de o Lewi manyawa manga hidogoronaka. Yomomanarama duru yanönako-nako manga daera moi-moi aha iniriwo ngona de manga hininga isosanangi, de o tutuda-tutuda kamamoi o kawaha yongodumu aha ihi ngounu anipareta.”